Днямі на базе адпачынку «Дружба» адбыўся чарговы (ужо 17-ы) рэспубліканскі конкурс прафесійнага майстэрства сярод паштальёнаў па дастаўцы паштовых адпраўленняў, друкаваных СМІ і аператараў сувязі. Як і варта было чакаць, з'ехаліся на яго лепшыя з лепшых — гэта значыць, пераможцы аналагічных раёных і абласных конкурсаў, каб абмяняцца досведам, каб паказаць сябе. Менавіта гэтага патрабавала, прынамсі, хатняе заданне.
Першая частка яго — «Мы — твар кампаніі» — дэманстравалася адразу пасля прывітальных слоў старшыні прафсаюза работнікаў сувязі Ніны Гаўрылавай і генеральнага дырэктара РУП «Беппошта» Ірыны САКСОНАВАЙ.
— Нельга нават параўнаць узровень патрабаванняў, якія прад'яўляліся раней да паштальёнаў і аператараў, з тымі, што прад'яўляюцца цяпер. Калі 10 гадоў таму мы ладзілі конкурс прафесійнага майстэрства, то для гэтага ці не машынамі завозілі рэквізіт — фанерныя скрынкі для ўпакоўкі пасылак, сургуч, шпагат... Ды што там — раней для гарадскіх і сельскіх аператараў сувязі нават конкурсы былі асобныя, — падкрэсліла Ірына Ігнатаўна. — Сёння і ўзровень ведаў, і патрабаванні, і пералік паслуг ужо аднолькавыя. І ўсе яны звязаны з найноўшымі тэхналогіямі і аўтаматызацыяй працэсаў, з выкарыстаннем камп'ютараў.
Што, у прыватнасці, і дэманстравалі каманды, выконваючы другую частку хатняга задання «Мая прафесія — прэстыжная!».
Каб даказаць гэта, каманды чаго толькі не прыдумалі: зладзілі ці не сапраўднае шоу «Шукаю цябе», набіралі каманду на «Паштовы каўчэг», малявалі на пяску, чыталі цэлыя паэмы, спявалі куплеты, цытавалі класікаў... Іншымі словамі — агітавалі за сваю прафесію ўсімі магчымымі сродкамі! Прычым рабілі гэта настолькі прыгожа і шчыра, што прысутным было цяжка ўстрымацца ад слёз.
З чаго вынікала, здаецца, агульнавядомае. Ну па-першае, з прафесіяй і паштальёна, і аператара сувязі заўсёды і ўсюды знойдзеш працу, знойдзеш заробак і так званую сацыяльную абароненасць, атрымаеш пастаянную магчымасць для прафесійнага росту і пашырэння кругагляду... Немалаважна і тое, што цябе будуць пазнаваць на вуліцах і чакаць у кватэрах, як самых блізкіх сяброў.
Ацэньвала журы і адмысловыя выступленні на тэму беражлівасці, падчас якіх каманды заклікалі захоўваць не толькі звычайнае (электраэнергію, ваду, паперу...), але і час сваіх кліентаў, і іх нервовыя клеткі, і — што было досыць нечаканым — нават кнігу скаргаў, бо калі туды нічога не пісаць, яна... паслужыць даўжэй.
Зрэшты, вось гэта — дэманстрацыя выдумкі, знаходлівасці, артыстычнасці і безлічы іншых талентаў — патрабавалася пераважна ў самым пачатку конкурсу. На другі дзень пачалася праверка ведаў і практычных навыкаў.
— Не магу сказаць, што пытанні былі складаныя, бо ўсё яны датычыліся таго, з чым сутыкаешся кожны дзень, — прызнавалася потым паштальён АПС № 2 Барысаўскага РВПС Таццяна Альшаннікова
. — Але ж у экзаменатараў часам было жаданне трошкі заблытаць, збіць з панталыку. Я на гэта старалася не паддавацца.
І мела ж рацыю! Бо менавіта яна, Таццяна, стала лепшай, першай сярод паштальёнаў! Яна ж набрала максімальную колькасць балаў як у веданні тэорыі, так і ў дэманстрацыі практычных навыкаў, чым заслужыла ганаровыя званні «Лепшы знаўца паштовай справы» і «Лепшы майстар паштовай справы».І ўсё гэта — пасля... двух гадоў працы па прафесіі!
— Да гэтага я, можна сказаць, шукала сябе, — расказвала пераможца. — Працавала прадавачкай у крамах і на рынку, была кур'ерам... Усё нешта не тое было. А тут, на пошце, мне вельмі спадабалася! У нас цудоўны калектыў, цудоўная начальнік аддзялення сувязі. Да таго ж тут большая зарплата... Але яе яшчэ трэба зарабіць. Шмат залежыць ад падпіскі, бо паштальён, што б там ні казалі, усё ж можа зацікавіць тым ці іншым выданнем. Мне бывае крыўдна, калі ў нейкую сям'ю не прыходзіць нічога. Гэтак жа і чытаць можна развучыцца! Таму я, бывае, афармляю падпіску ў падарунак — за свае грошы. А там, глядзіш, людзі за месяц прывыклі нешта атрымліваць і ўжо выпісваюць самі, прычым не адно выданне, а некалькі... Каб нешта ўзышло, трэба сеяць!
У гэтым выпадку паміж паштальёнам і яе кліентамі «ўзышла», так бы мовіць, самая шчырая сімпатыя, бо апошнія падчас конкурсу вельмі перажывалі за Таццяну, тэлефанавалі ёй. І як жа рады былі перамозе! Не кажучы ўжо пра саму жанчыну, якая проста не магла трымаць у руках усе граматы, кветкі, прызы і дыпломы!..
Другое месца журы прысудзіла паштальёну аддзялення паштовай сувязі (АПС) «Абяроўшчына» Камянецкага РВПС Наталлі Сукач, трэцяе — Святлане Кісель з АПС № 3 Слуцкага РВПС.
Сярод аператараў першынство заваявала Людміла Шум (АПС «Краснасельскі» Ваўкавыскага РВПС), другое — Наталля Рудзяк (АПС № 16 цэха паштовай сувязі Брэсцкага філіяла) і трэцяе — Катажына Прыймак (Смаргонскі РВПС). Усім пераможцам былі ўручаны адпаведныя дыпломы і падарункавыя сертыфікаты на суму ад 4 (за першае месца) да 3 мільёнаў рублёў.
Дыплом і кубак пераможцы ў напружанай каманднай барацьбе заваявала каманда Гродзенскага філіял, на другім месцы — Брэсцкі філіял, на трэцім — Гомельскі.
Як заўсёды, адзначыла журы і найлепшае хатняе заданне (першае месца ў каманды Гомельскага філіяла), і найцікавейшы дызайн фірмовага адзення (першынство ў Віцебскага філіяла), і найлепшае веданне тэхнікі бяспекі, і вернасць прафесіі, і самы яркі прафесійны дэбют, і смеласць ды знаходлівасць... Нават усмешку, індывідуальнасць!
А яшчэ была безліч кветак і розных падарункаў — ад аб'яднанай арганізацыі прафсаюза і, вядома ж, ад рэдакцый газет. Нашы, звяздоўскія, сувеніры ўручаны паштальёнам Вользе Міронавай з АПС Балотня Рагачоўскага РВПС, Людміле Лысені з АПС Новадзявяткавічы Слонімскага РВПС і ўсё той жа Таццяне Альшаннікавай з АПС-2 г. Барысава, бо, як высветлілася, менавіта яны носяць падпісчыкам максімальную колькасць экземпляраў «Звязды».
А яшчэ ўсіх удзельнікаў конкурсу мы прасілі ва ўсе куточкі краіны развезці нашы календары — у тым ліку і на новы 2014 год. З надзеяй, што і надалей будзем з чытачамі — дзякуючы аператарам паштовай сувязі і паштальёнам, якія аформяць падпіску і потым пяць разоў на тыдзень будуць прыносіць свежыя нумары адзінай штодзённай беларускамоўнай газеты.
Валянціна ДОЎНАР
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.