22 лістапада ў беларускай сталіцы пройдзе заключны — рэспубліканскі — этап конкурсу «Студэнт года — 2013». А напярэдадні са сваімі прадстаўнікамі вызначыліся ўсе вобласці і Мінск.
1384588745763_16-26
Для ўдзелу ў мінскім адборачным туры было адабрана 15 заявак. Усе канкурсанты сталі пераможцамі ў сваіх ВНУ, у тым ліку і Сяргей Казловіч, студэнт 4 курса факультэта тэлекамунікацый БДУІР.
Дарэчы, стаць удзельнікам конкурсу мог далёка не кожны: адна з галоўных умоў для канкурсантаў — поспехі ў вучобе (сярэдні бал не ніжэй чым 8,0), а таксама актыўны ўдзел у грамадскім жыцці, дзейнасці Беларускага рэспубліканскага саюза моладзі і органах студэнцкага самакіравання.
У фінале гарадскога конкурсу больш як тры гадзіны лепшыя студэнты сталіцы дэманстравалі свае таленты і абаранялі праекты. Сяргей Казловіч прадставіў на суд журы тэлевізійны праект (цыкл праграм) «Ветэраны: каб помнілі!»
— Гэты праект зусім не падобны на мае папярэднія, — прызнаецца Сяргей. — Па-першае, работа з ветэранам вымагала асаблівай канцэнтрацыі, па-другое, былі выязныя здымкі ў горадзе, ну і, безумоўна, складаны мантаж. Але сам працэс здымак і падрыхтоўкі да іх заўсёды дастаўляе мне вялікае задавальненне...
Перад журы стаяла няпростая задача — выбраць тройку пераможцаў, якія годна прадставяць сталіцу ў рэспубліканскім фінале. Права змагацца за ганаровы тытул «Студэнт года—2013» у фінальнай бітве атрымалі Сяргей Казловіч (БДУІР), Анастасія Луферчык (Камандна-інжынерны інстытут МНС) і Ірына Марцінкевіч (БНТУ).
— У падрыхтоўку да конкурсу ўкладзена шмат сіл. Я вельмі хваляваўся, але спадзяваўся прайсці ў фінал. Толькі дзеля ўдзелу няма чаго ісці на конкурс — трэба перамагаць. Мне вельмі дапамагла вялікая група падтрымкі, і ўсё ў мяне атрымалася, — з задавальненнем адзначае Сяргей Казловіч.
Сёння сябры дапамагаюць Сяргею падрыхтавацца да «фінальнага акорда». У першай палове дня хлопца чакае вучоба ва ўніверсітэце, а ў другой — праца відэаінжынерам на тэлеканале АНТ. Таму ўвесь дзень у яго літаральна распісаны па хвілінах...
У фінале конкурсу «Студэнт года—2013», які менш чым праз тыдзень пройдзе ў Нацыянальнай бібліятэцы, журы будзе ацэньваць «візітку», творчы конкурс, абарону праекта, спартыўны конкурс і аратарскае майстэрства лепшых прадстаўнікоў беларускага студэнцтва...
Надзея НІКАЛАЕВА.
Фота Марыны БЕГУНКОВАЙ
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
