На праваслаўныя Каляды ў невялікім пасёлку Рэпішча з года ў год адбываецца абрад «Свяча». У гэты дзень з адной вясковай хаты ў другую пераносяцца некалькі абразоў і тры вялікія свечкі. Абрадавы комплекс уключае ў сябе набажэнствы ў хатах, застоллі-частаванні, высціланне саломаю дарогі, абмен хлебам-соллю, пералазанне пад Свячою — галоўным абразом «Нараджэнне Хрыстова».
Сёлета, згодна з даўнімі традыцыямі, Свячу праводзіла Людміла Халаева, а сустракала і прымала гэтую вясковую святыню Валянціна Зайцава. Для абедзвюх жанчын-гаспадынь падзея была святочнай і хвалюючай, як, між іншым, і для ўсёй вёскі. Удзельнікамі свята сталі не толькі родныя гэтых гаспадынь — дзеці, унукі, пляменнікі, але і ўсе вяскоўцы, якія ў гэты дзень знаходзіліся ў Рэпішчы: як правіла, на Каляды дзеці прыязджаюць да бацькоў. Ганаровым госцем быў праваслаўны святар айцец Аляксандр, малітвы і казанне якога дапамагалі спасцігаць глыбінны сэнс абраду і таямніцы Божага Нараджэння.
Яшчэ загадзя Людміла Лукінічна Халаева падрыхтавалася да праводзін Свячы: пафарбавала аправу іконы, пашыла новыя «сукенкі» для свечак, а самі свечкі яна замовіла ў Бацвінаўскай царкве. Увечары напярэдадні адпраўлення з суседкамі памалілася каля абразоў, наладзіла развітальную вячэру. Для 77‑гадовай пенсіянеркі не ўпершыню было браць і праводзіць Свячу. Сёлета гэта быў ужо пяты раз.
— Ведаеце, у тыя часы, калі я працавала ў школе настаўніцай, а мой муж быў «парцейны», мы не маглі браць Свячу, хоць і вельмі хацелася, — прызналася Людміла Лукінічна. — Цяпер я гатова прымаць яе хоць кожны год альбо пакінуць у сваёй хаце на некалькі гадоў запар — гэтак можна. Не пакідаю, бо іншыя вяскоўцы чакаюць. Свяча ратуе нас, аб'ядноўвае, дае здароўе і даўгалецце. А яшчэ не дае забыцца пра жудасныя падзеі вайны.
Вайна ў лёсе вёскі засталася несуцешным болем, хоць і мінула з тае пары больш за 70 гадоў. 14 кастрычніка 1943 года вёска была ўшчэнт спалена нямецкімі акупантамі, у агні загінула больш за паўсотню жыхароў. Насуперак страшэннаму гору, тыя, хто ацалеў, вярнуліся на папялішчы і нанова пабудавалі вёску. Гэта дзякуючы ім сёння і жыве Рэпішча, а не лічыцца ў хатынскім спісе страчаных беззваротна. Каб ліха больш не чапала людзей, жыхары распачалі ахоўна-аброчны абрад пераносу Свячы, як рабілася гэта ў шматлікіх вёсках Чачэршчыны і суседніх з ёю раёнах. Паколькі ў Рэпішчы прастольным святам заўсёды лічыўся дзень Божага Нараджэння, была замоўлена ікона з адпаведным біблейскім сюжэтам. Ікону намалявала мастачка-манашка з манастыра ў вёсцы Прычалесня. Насіць Свячу пачалі адразу пасля вайны. І што цікава, нават у часы атэізму здзяйсняць абрад не забаранялася.
— Наколькі я памятаю, Свяча ў вёсцы пачала хадзіць у 1946 годзе, — прыгадала найстарэйшая вясковая жыхарка Марыя Бяляева, якой у вайну было амаль 15 гадоў. Жанчына добра памятае падзеі рэпішчанскай трагедыі. Цяпер Марыя Еўдакімаўна жыве ў дачкі ў Гомелі, і не прыехаць на Свячу яна проста не змагла б. Таму яна зноў сярод вяскоўцаў. Свяча для яе — гэта яшчэ і памяць пра загубленых аднавяскоўцаў, якіх яна бачыць у сваіх снах і ўспамінах.
А Валянціна Мікалаеўна Зайцава ўзяла да сябе Свячу ўпершыню. Бо сама жыве ў вёсцы не так даўно. Гэта хата яе бацькоў, пастаўленая пасля вайны. Бацькі былі простымі сялянамі, людзьмі веруючымі. Калі падыходзіла «чарга» на Свячу (раней лічылася грахом, калі Свяча абыходзіла двор), прымалі святыню, ставілі ў чырвоны кут. Калі бацькоў не стала, а ў Валянціны падышоў пенсійны ўзрост, яна вырашыла вярнуцца ў Рэпішча. Цяпер пад яе апекай і будзе захоўвацца вясковая рэліквія.
— Я ўжо вырашыла, што Свяча будзе стаяць у мяне не год, а два. Чаму? А таму, што нас шмат: у мяне чацвёра дзяцей і ўжо 12 унукаў. Пакуль за кожнага памалюся, дык і год пройдзе, — нібы з усмешкаю кажа Валянціна, а ў самой слязінкі на вачах блішчаць. — А каб вяскоўцы дазволілі, дык і тры гады трымала б — гэта ж якая радасць!
Жыхароў у Рэпішчы ўжо не шмат — 16 чалавек, ды і тыя пераважна пенсійнага ўзросту. Сярод іх жывуць яшчэ і сведкі трагедыі вёскі — Феня Халаева і Аляксандра Дамасканава. Яны таксама сталі ўдзельніцамі пераносу Свячы: без іх аніяк. І таксама, як іншыя, яны кажуць: «Не, мы ніколі не кінем нашу Свячу. Колькі будзем жыць — будзем яе шанаваць. Бо яна нам дапамагае».
— У Рэпішчы жывуць вельмі добрыя і ахвярныя людзі, сапраўдныя вернікі. Вялікая ўдзячнасць ім за захаванне гэтай абрадавай традыцыі. Я заўсёды малюся за іх, імкнуся напоўніць іх жыццё надзеяй і верай у лепшае, — сказаў пра вяскоўцаў айцец Аляксандр.
Айцец Аляксандр не толькі духоўны настаўнік, але і, бадай, сапраўдны сябар многіх жыхароў Рэпішча, Матнявічаў і іншых тутэйшых вёсак, хоць гэта і не яго прыход. Ён добра ведае гісторыю і многія звычаі, традыцыі. Дзякуючы святару я даведаўся і пра «Свячу» — адзіны ў Беларусі Калядны аброчны абрад. Пра трагедыю вёскі і пра даўнюю падпісчыцу «Звязды», настаўніцу з амаль 40‑гадовым стажам Людмілу Лукінічну Халаеву, а таксама пра іншых жыхароў Рэпішчаў.
Анатоль Кляшчук.
Фота аўтара.
Чачэрскі раён.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.