ЦК Беларускага прафсаюза работнікаў адукацыі і навукі накіраваў у Савет Міністраў афіцыйны зварот з просьбай звярнуць увагу на трывожную сітуацыю, якая склалася ў адукацыйнай галіне. Зварот быў падрыхтаваны па даручэнні V Пленума ЦК Беларускага прафесійнага саюза работнікаў адукацыі і навукі.
У прыватнасці, галіновы прафсаюз звяртае ўвагу ўрада на адсутнасць арыенціраў у аплаце працы педагагічных работнікаў. Як падкрэсліваецца ў звароце, закон Рэспублікі Беларусь «Аб адукацыі» такія арыенціры змяшчаў. Так, згодна з законам, сярэднямесячная заработная плата педагагічных работнікаў павінна была быць не ніжэйшай за сярэдні ўзровень заробкаў у прамысловасці, а прафесарска-выкладчыцкага саставу — перавышаць яго не менш чым у 1,5 раза. Закон устанаўліваў таксама і аб'ёмы бюджэтнага фінансавання галіны. А Кодэкс аб адукацыі такія нормы не змяшчае.
Па факце суадносіны ўзроўню сярэднямесячнай заработнай платы работнікаў сістэмы адукацыі да ўзроўню заробкаў у прамысловасці склалі ў Беларусі ў 2011 годзе 68,6%, у 2012 годзе — 65,6% і за студзень—кастрычнік 2013 года — толькі 60,1%.
Галіновы прафсаюз прыводзіць у якасці прыкладу досвед Расіі, дзе, у адпаведнасці з федэральным Законам «Аб адукацыі ў Расійскай Федэрацыі», выдаткі на аплату працы педагагічных работнікаў не могуць быць ніжэйшыя за ўзровень сярэдняй заработнай платы ў адпаведным суб'екце Расійскай Федэрацыі, на тэрыторыі якога размешчаны агульнаадукацыйныя арганізацыі.
Ва Украіне арыенцірам у аплаце працы педагогаў служыць паказчык сярэдніх заробкаў у прамысловасці.
Кіраўніцтва Беларускага прафсаюза работнікаў адукацыі і навукі канстатуе, што павышэнне з 1 верасня 2013 года тарыфных ставак педагагічным работнікам на 25%, якое адбылося адначасова з павелічэннем нормаў педагагічнай нагрузкі, фактычна толькі кампенсавала рост педагагічнай нагрузкі. Так, за дзесяць месяцаў 2013 года сярэднямесячная заработная плата настаўнікаў павялічылася на 12,9%, а паказчык сярэдняй педагагічнай нагрузкі на настаўніка з 1 верасня павялічыўся на 12,2 працэнта. Больш за тое, у настаўнікаў з высокім узроўнем нагрузкі адбылося нават зніжэнне заробкаў.
На павелічэнне тарыфных ставак не выдзяляліся дадатковыя сродкі. Павышэнне адбылося ў рамках бягучага фінансавання.
Прафсаюз просіць урад звярнуць увагу таксама на тое, што за апошнія гады не прымалася рашэнняў у галіне аплаты працы прафесарска-выкладчыцкага саставу, акрамя павышэння з 1 студзеня 2012 года на 50% акладаў выкладчыкам, якія не маюць вучоных ступеняў і званняў.
Таксама на пагаршэнне сацыяльна-эканамічнага становішча работнікаў паўплывала змяншэнне выплат па лістках часовай непрацаздольнасці.
Надзея НІКАЛАЕВА
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».