Як сцвярджаюць спецыялісты, лісце хларафітума акумулюе шкодныя для здароўя чалавека і жывёл злучэнні серы, азоту і фармальдэгіды, якія ўтвараюцца, у прыватнасці, пры спальванні бытавага газу. Таму рэкамендуецца размяшчаць хларафітум на кухні, дзе ёсць газавая пліта. Гэта непераборлівая расліна, здольная нейтралізаваць шкодныя і нават атрутныя рэчывы ў паветры памяшканняў, адыграе неацэнную ролю і пасля рамонту. Хларафітум — адна з самых карысных пакаёвых раслін. Для ачышчэння паветра пакоя плошчай 18—20 кв. м неабходна не менш за 6 раслін, якія можна размяшчаць у скрынках. Дарэчы, шмат такіх скрынак абцяжарыць прыбіранне памяшкання.
Герань (пеларгонія) выконвае ролю своеасаблівага пакаёвага доктара пры анкалогіі, захворваннях нервовай сістэмы, асабліва пры функцыянальных яе расстройствах, неўрозах рознай этыялогіі, пры бяссонніцы. Галоўны дзейсны кампанент герані — гераніёл. Ён валодае антыбактэрыяльнай і антывіруснай актыўнасцю.
У хатніх лімонаў гаючую сілу маюць не толькі плады, але і духмянае лісце. Яно змяшчае 85 розных гаючых рэчываў. У памяшканні, дзе знаходзяцца лімоны, паветра амаль стэрыльнае. Калі ў пакоі будзе расці лімон, то шматлікія хваробатворныя мікробы, якія ёсць у гэтым пакоі, страцяць здольнасць размножвацца.
Антымікробнымі ўласцівасцямі валодаюць таксама брызгліна, мірт. Каланхоэ і эўкаліпт здольныя папярэдзіць развіццё прастудных захворванняў. Асабліва гэта актуальна ў халодную пару года. Група з 4—5 такіх раслін валодае антымікробным дзеяннем на адлегласці 1,5—2 м. Чысцяць наша жыллё філадэндран, плюшч звычайны, іглічныя, карлікавы фікус, бягонія. Склаўшы кампазіцыі з фітанцыдных раслін, можна захаваць і ўмацаваць здароўе, пазбавіцца ад стрэсавых станаў і павялічыць працаздольнасць.
У зачыненых памяшканнях можна выкарыстоўваць размарын лекавы, фітанцыды якога паказаны пры лячэнні хранічнага бранхіту, эмфізэмы лёгкіх, катару верхніх дыхальных шляхоў, бранхіяльнай астмы і іншых хвароб. Лаўр высакародны дапамагае пры спастычных станах (ангіяспазмах), спазмах кішэчніка і жоўцевыводных шляхоў.
Калі вы жадаеце, каб фітакампазіцыя аказвала агульнае аздараўленчае ўздзеянне і чысціла паветра ад патагенных мікробаў, то выкарыстоўвайце арыгінальнае спалучэнне альяса дрэвападобнага ці каланхоэ пёрыстага з рознымі формамі хларафітума.
ВАЖНА! Пры тэмпературы больш 25°С расліны паглынаюць газ у два разы інтэнсіўней, чым пры 13°С.
ВАЖНА! Драўняныя расліны ажыццяўляюць газаабмен у 3-10 разоў інтэнсіўней, чым травяністыя.
Ірына ТАМКОВІЧ
Канцэрт для дзяцей і моладзі, пластычны спектакль Ягора Дружыніна і «Рок-панарама».