Сустрэліся на дзіцячай пляцоўцы з суседкай. Пакуль мой Антон і яе Алеся, усмешлівая і вельмі кантактная асоба двух з паловай гадоў, будавалі ў пясочніцы чыгунку, мы чарговы раз заняліся абмеркаваннем новых уменняў сваіх дзяцей. Нам заўжды ёсць што абмеркаваць: Алеся ж усяго на два месяцы старэйшая за Антона… Але гэтым разам мне давялося слухаць адзін працяглы суседчын маналог з нагоды нядаўняга візіту ў дзіцячую паліклініку, дзе Алесі паставілі дыягназ «затрымка нервова-псіхічнага развіцця». І выпісалі аж тры найменні лекаў, якія павінны дапамагчы ёй загаварыць. Я, безумоўна, не ўрач, але Алесю ведаю ці не з яе першага дня нараджэння. І што-што, а нешта там «нервова-псіхічнае» — гэта дакладна не пра яе. Ды і са слыхам у малой яўна добра. Ну не размаўляе яна сказамі — дык што? Вунь як выдатна паразумеліся з Антонам…
Згадваю, як сама першы раз завітала ў дзіцячую паліклініку. Сыну толькі споўніўся месяц, і мы з ім мусілі зайсці да хірурга, артапеда, неўролага, афтальмолага… Спіс урачоў, абавязковых да наведвання ў гэтым узросце, уражвае сам па сабе, але ўчастковы педыятр накіраваў нас яшчэ да кардыёлага з уролагам — «на ўсялякі выпадак». Ніводзін урач не прызнаў Антона цалкам здаровым, і кожны выпісаў нам нешта ў кроплях ці парашках. Дома я перагледзела ўсе рэцэпты і жахнулася — месячнаму дзіцяці прапаноўвалася 9 розных лекаў, ды яшчэ некалькі разоў на дзень! Проста «на ўсялякі выпадак». Нічога сур`ёзнага, што патрабавала б сапраўднага лячэння, у Антона не знайшлі. І кожны са спецыялістаў шчыра прызнаў, што свае дробныя недасканаласці арганізм малечы, хутчэй за ўсё, неўзабаве перарасце. Але, маўляў, раз вы ўжо да нас прыйшлі… У выніку я вырашыла не даваць сыну нічога, акрамя адзінага сродку (пра што потым не раз пашкадавала, але гэта зусім іншая гісторыя). Праз колькі месяцаў ад усіх «дыягназаў» і следу не засталося.
Ну праўда ж — 30, 40, 50 гадоў таму, калі не было такога багатага выбару лекаў, маленькіх дзяцей лячылі ў выключных, сапраўды сур'ёзных выпадках. І ўсе — хто раней, хто пазней — выдатна навучыліся бегаць і размаўляць. Мая найлепшая сяброўка, напрыклад, сцвярджае, што майстэрства карыстацца словамі ёй не давалася да трох гадоў. Дык мне б яе сённяшняе ўменне весці філасофскія гутаркі! Пры тым, што я, па сведчанні бацькоў, загаварыла вельмі рана. Амаль на год раней за свайго брата, з якім мы нарадзіліся ў адзін дзень з розніцай у 10 хвілін…
Кажуць, што час, калі дзіця пачынае гаварыць, не ў апошняй ступені залежыць ад спадчыннасці. Напэўна, у нашых з братам бацькоў гэты працэс распачаўся таксама вельмі па-рознаму (толькі нашы, абедзьве шматдзетныя, бабулі такімі «дробязямі» не заклапочваліся і першыя словы сваіх далёка не першых дзяцей у памяці не захавалі)… Зрэшты, як адказная маці, яшчэ падчас цяжарнасці я паспрабавала вызначыць, што мне трэба рабіць, каб маё дзіця пачало размаўляць належным чынам у належны тэрмін. І… заблыталася ў шматлікіх тэорыях. Напрыклад, адны даследчыкі сцвярджаюць, што важней за ўсё колькасць слоў, якія чуе малое ад маці на працягу дня. Прычым запамінаць гэтыя словы дзіця пачынае задоўга да нараджэння. Іншыя ж лічаць, што ўсё гэта не мае ніякага значэння, а галоўная задача дарослых — навучыць немаўля ўважліва слухаць хоць магнітафонную стужку. Стаць для малога прыкладам не столькі актыўнага суразмоўцы, колькі пільнага слухача… Урэшце для мяне стала відавочным: не зважаючы на ўсе дасягненні цывілізацыі, з'яўленне чалавечага маўлення дагэтуль застаецца таямніцай. У чым пазней асабіста і пераканалася.
Ледзь не сто гадоў псіхолагі спрабуюць вызначыць, колькі слоў павінны ведаць дзеці кожнага ўзросту. Але малыя да трох гадоў вельмі адрозніваюцца адно ад аднаго, каб падлічыць нешта сярэдняе. Урэшце, за норму (якой кіраваліся яшчэ савецкія педыятры) прынялі вынікі даследаванняў аўстрыйска-амерыканскага псіхолага Шарлоты Бюлер, якая падлічыла, што, напрыклад, у год і тры месяцы мінімальны слоўнік дзіцяці складае… усяго 4 словы. А максімальны — аж 232!
Дык вось, у год і тры месяцы слоўнік Антона быў нулявы. Я безупынна размаўляла з ім, мы бясконца слухалі разам усё, што толькі можна слухаць, але ўся Антонава «гутарка» зводзілася да паказвання пальцам на рэчы, якія яму хацелася пакруціць ці пагрызці… А мінулай зімой, тупаючы са мною ў краму, ён раптам прыпыніўся каля шлагбаума, што трапіўся нам па дарозе, і вельмі выразна вымавіў: «Шлагбаум». Пасля чаго замаўчаў яшчэ на тры месяцы. Наступным словам было класічнае «Дай!»… А ў дзень, калі сыну споўнілася два гады, словы пасыпаліся з яго, быццам з чароўнага куфэрка. Неўзабаве ён нават пачаў прыдумляць казкі, якія я толькі паспявала запісваць. Скажам, улюбёны Антонаў персанаж — вялікі чорны сабака Паксі, які жыве ў будцы разам з гаспадаром і ходзіць на працу запускаць фантаны. Апошнім разам, напрыклад, з Паксінага фантана выплыў карабель, з якога саскочыла малпачка. І цяпер Паксі вымушаны тэрмінова будаваць новую будку, бо ў старой даўно не хапае месца для ўсіх, каго Паксі прывёў туды жыць яшчэ да сустрэчы з малпачкай… Калі б раней мне сказалі, што двухгадовае дзіця складае падобныя гісторыі, дакладна не паверыла б! Ды што я ведала пра дзяцей раней?.. І што ведаю пра свайго Антона цяпер?
Падбягае да мяне хвіліну таму: «Мама, я прыдумаў, што Дзед Мароз падорыць мне праз год! Залатую рыбку. І ў мяне заўжды будзе шмат новых машынак!» Вам такое прыйдзе ў галаву?
Дарэчы, калі напярэдадні Новага года мы запыталіся, што Антон хацеў бы атрымаць ад Дзеда Мароза, ён вымавіў толькі адно слова: «Чыз!» Не зразумеўшы, мы перапыталіся. «Гэта каб усе ўсміхаліся, — удакладніў сын. — І яшчэ адну машынку»…
Марына БЕРАЗЕНСКАЯ.
Мерапрыемства праводзіцца на добраахвотнай аснове.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.