Паважаная рэдакцыя музычных перадач! Месяц таму я прасіў вас да жончынага юбілею паставіць песню «Лада», пад якую мы з ёю любілі танцаваць, у тым ліку на ўласным вяселлі. Я тады не саромеўся падпяваць: «… И когда ты станешь бабушкой, всё равно ты будешь Ладушкой, Ла-да!»
З таго, майго першага ліста вы, здаецца, зразумелі ўсё. І нават паведамілі, калі нам уключаць радыё. Мы з жонкай былі напагатове, як і ўся наша радня. Зяць настроіў магнітафон — з мэтаю ўсё запісаць, каб захаваць навекі. Аднак атрымалася абы-што.
За добрыя словы ў адрас жонкі, безумоўна, дзякуй. Але ж потым, папрасіўшы прабачэння за тое, што «ў базе» ці «на базе» не аказалася песні «Лада», вы паставілі іншы музычны (калі можна так назваць?) твор. Словы яго — «Я готов целовать песок, по которому ты ходила…» — падкасілі ўшчэнт. Не, без прывязкі да мяне яны хай гучаць. Але ж я працую вартаўніком на пясчана-гравійным кар'еры, хаджу іншым разам на абед, і тады мяне падмяняе жонка. Насуперак, дарэчы, інструкцыі. Таму зараз мяне могуць турнуць з работы — за парушэнне інструкцыі і страту пільнасці. Бо на табе — ён пясок цалуе…
А пакуль зменшчык пад'юджвае: маўляў, як даўно я гэта раблю, ці не «забіваецца» пры пацалунках нос?..
Зяць таксама свой нораў паказаў. Ён з нашага кар'ера гравій вывозіць. Летась на самазвале двойчы кульнуўся. Таму напамін пра пясок — як той нож яму ў сэрца…
І жонка крыўдуе: у кар'ер, сказала, ні нагой больш…
А таму, раней паважаная рэдакцыя музычных перадач, пішу вам яшчэ раз: трэба выпраўляць становішча. Калі гаварыць шчыра — ратаваць сям'ю. Як?
Мяркую, на вашай «базе» захавалася апаратура, на якой можна было б прайграць грампласцінку з песняй «Лада»? Яе ў любы момант можа падкінуць у студыю зяць. Не дужа толькі здзіўляйцеся, што адзін бок грампласцінкі, з песняй «Адпусціце мяне ў Гімалаі», будзе надзейна заклеены пластырам, а паверх — яшчэ і скотчам. Я не магу больш рызыкаваць і ўвесь час баяцца, што вы там зноў нешта пераблытаеце: паставіце, напрыклад, пласцінку не тым бокам.
Дарэчы, няўжо ў вашых «базах» няма такіх цудоўных задушэўных песень, як, напрыклад, «Зорачка мая» ці канкрэтна — «Зорка Венера»? Альбо «Лягу-прылягу…»? Мы таксама паслухалі б… А то і паляжалі… Нават на пясочку. Тым самым… Рукі-ногі раскінулі б і ў думках дзякавалі вам за тое, што зноў наладзілі нам жыццё.
З надзеяй —
Антось Цэбрыкаў.
Васіль Найдзін
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.