...Чым даўжэй жывеш на свеце, тым часцей успамінаеш мінуўшчыну, жыццё сваіх бацькоў, іх спагаду і шчырасць, тым часцей думаеш, што мы, беларусы, мабыць, заўсёды выжывалі, дзякуючы сваёй дабрыні, сваёй павазе да людзей.
На ўсё жыццё мне запомнілася, як пасля вайны каля нашай зямлянкі з'яўляліся двое хлопчыкаў гадоў шасці-сямі. «Падайце што-небудзь», — прасілі яны. І бабуля ці мама заўсёды клалі ім у торбачку хоць пару бульбінак, або кавалачак праснака ці жменьку ячнай крупы. Калі-нікалі малым налівалі ў місачкі нейкага варыва, бо болей і ў саміх нічога не было.
Як гэтыя дзеці з хворай матуляй трапілі да нас з Украіны, не ведаю. Ведаю, што іх маці людзі выхадзілі, і яна яшчэ доўга жыла, працавала ў мясцовым саўгасе. А хлопцы (ды якія ж прыгожыя!) там жывуць і сёння...
Яшчэ ў памяці, як у нас заначавала жанчына з дачушкай, у якой не было пазногцікаў. Я, амаль такое ж дзіця, мала што разумела ў размовах дарослых, але помню, што ўсе яны плакалі, бо дзяўчынка тая была ў канцлагеры і ў яе бралі кроў...
З зямлянкі мы вылезлі ў 1950-м — пабудавалі хату. Саўгас наш быў вялікі, садзілі шмат бульбы, гародніны, а ўбіраць іх з'язджаліся людзі з іншых раёнаў. Памятаю, кватаравалі ў нас шэсць жанчын. Яны вельмі хацелі зарабіць — і грошай, і гародніны — для сваіх сем'яў. А самі — на ўсім эканомілі, харчаваліся бульбай. Мама разумела гэта і ніякай платы за жытло з іх, вядома ж, не брала, наадварот — чым магла частавала: хоць агуркамі, хоць малаком, бо лішняга ж таксама нічога не было.
Але дабро людзі помнілі. Аднойчы дзве нашы «кватаранткі» прынеслі кошык журавін, а нейкі дзядзька прывёз шмат рыбы. Сказаў: «Гэта вам за тое, што жонцы маёй давалі прытулак».
Пазней, недзе з 50-х—60-х гадоў, дома ў нас заўсёды ляжаў кавалачак сала, кумпячка — для госця. Бо калі добры чалавек заходзіў у хату, яго нельга было адпусціць не прывеціўшы, не пачаставаўшы.
Так жылі нашы дзяды, нашы бацькі. Гэтак жывём мы і нашы дзеці. А якія парадкі будуць весці ўнукі, ужо невядома. Але ж дай Бог, каб і яны трымаліся нашых традыцый, адна з якіх — гасціннасць.
Лідзія Лук'янава,
в. Швабы, Лагойскі раён
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».