Нацыянальная культура: як сумясціць традыцыі і сучасныя формы?
Менавіта пытанне, вынесенае ў падзагаловак, мы і прапанавалі абмеркаваць удзельнікам «круглага стала», які арганізавалі ў рэдакцыі газеты «Звязда». Пытанне глабальнае, шматграннае, яно падчас размовы пацягнула за сабой не менш актуальныя: аб сённяшнім успрыняцці культуры новым пакаленнем, аб стасунках культуры і цывілізацыі, аб мэтазгоднасці заканатворчасці і рэгулявання ў сферы культуры. Яно і не дзіўна: у гутарцы прымалі ўдзел людзі не толькі дасведчаныя, але і зацікаўленыя. Прычым, забягаючы наперад, зазначу, што прысутнасць на пасяджэнні «круглага стала» доктара хімічных навук толькі дабавіла дыскусіі вастрыні — адвечная спрэчка «лірыкаў» і «фізікаў» заўсёды цікавая сама па сабе, пра якую б сферу ні гаварылі, бо спрачаюцца, як правіла, творчая захопленасць і здаровы прагматызм.
Гэтым разам у нашай зацікаўленай размове ўдзельнічалі член Пастаяннай камісіі Палаты прадстаўнікоў Нацыянальнага сходу Рэспублікі Беларусь па культуры, адукацыі і навуцы Наталля КУЧЫНСКАЯ, галоўны спецыяліст упраўлення ўстаноў культуры і народнай творчасці Міністэрства культуры Людміла ЛЕБЕДЗЬ, загадчык лабараторыі нанахіміі БДУ «Навукова-даследчы інстытут фізіка-хімічных праблем», доктар хімічных навук Міхаіл АРЦЕМ'ЕЎ, дырэктар Інстытута мастацтвазнаўства, этнаграфіі і фальклору НАН, доктар мастацтвазнаўства Валерый ЖУК, загадчык аддзела старажытнай беларускай культуры Інстытута мастацтвазнаўства, этнаграфіі і фальклору НАН, кандыдат мастацтвазнаўства Барыс ЛАЗУКА, першы намеснік генеральнага дырэктара Нацыянальнага акадэмічнага Вялікага тэатра оперы і балета Уладзімір РЫЛАТКА, начальнік аддзела па справах нацыянальнасцяў апарату Упаўнаважанага па справах рэлігій і нацыянальнасцяў Аляксандр САСНОВІЧ.
«Звязда»:
— Доўгі час беларускую нацыянальную культуру атаясамлівалі выключна з культурай народнай, з фальклорам: лапці, андаракі, працяжныя песні... Прычым атаясамлівалі не толькі нашы суседзі — мы самі, і нярэдка працягваем гэта рабіць. Але ж нацыянальная культура сёння — гэта паняцце значна шырэйшае, да яго адносяцца не толькі захаваныя і трансфармаваныя традыцыі ды абрады. Давайце паразважаем, што сёння можна назваць складнікамі нашай нацыянальнай культуры?
Валерый Жук:
— Хачу адразу сказаць, што агучанае вамі меркаванне аб «лапцях» і «андараках» не зусім адпавядае рэчаіснасці. У пашане ў народа, акрамя іншага, заўсёды былі адукаванасць і выхаванне — яны таксама былі неад'емнай часткай нашай культуры. А пра «лапці» наогул стэрэатып невядома адкуль узяўся: нашы людзі, нават сяляне, нашмат часцей хадзілі ў ботах, чаравіках, пасталах, але зусім не ў лапцях...
Барыс Лазука:
— Перш чым упісваць у паняцце «нацыянальная культура» нейкія новыя праявы і формы, трэба паклапаціцца аб тым, каб захаваць базіс — культурныя набыткі. Бо калі ў народа іх адняць, ён ператвараецца ў насельніцтва. Калі мы будзем ставіцца да мінулага з пункту гледжання сучаснасці, усё роўна нешта будзе не ўпісвацца ў нашу парадыгму сённяшняга жыцця. Але ж гэта частка нашай гісторыі. Іншая справа, што ў нашым грамадстве — у культурным, навуковым асяроддзі, у СМІ, сярод інтэлігенцыі — былі і дагэтуль захаваліся пэўныя стэрэатыпы. У іх традыцыйная культура, на жаль, успрымаецца менавіта так, як вы сказалі. Хаця традыцыйная культура — гэта найвышэйшае дасягненне нацыі. Калі мы гаворым аб фарміраванні нейкіх устояў і ідэалаў у грамадстве, узяць іх можна толькі з вытокаў. І шукаць гэтыя вытокі — наш першы абавязак.
Але тут нельга ўдавацца ў крайнасці, як у нас і адбывалася. Тая частка нацыянальнага мастацтва і культуры, якая на працягу некалькіх стагоддзяў развівалася ў арыстакратычным асяродку, у колах сацыяльнай эліты, з палітычнай пазіцыі разглядалася як небяспечная, яна была маркерам таго сацыяльнага асяроддзя, якое «панавала, прыгнятала» і г.д. Тыя ж самыя Радзівілы трактаваліся ў савецкіх працах нашых даследчыкаў як распуснікі, дурні, гультаі... Напрыклад, прыводзілася паказальная гісторыя аднаго з Радзівілаў, які быў нібыта настолькі тупы, што яго вучылі лічыць... па бутэльках з-пад віна, па якіх ён страляў. І мы пры гэтым зусім забываліся, што ўся наша эліта, уся шляхта за норму лічыла набыць адукацыю ва ўніверсітэце, прычым не толькі ў «мясцовым», але і ў замежным, еўрапейскім... І тут жа іншая крайнасць — датычна нашай традыцыйнай культуры. Як мы яе ўспрымаем? Нярэдка сапраўды, на ўзроўні лапцяў, ануч і яшчэ нечага ледзь не страшнага для нашай сучаснай свядомасці. Мала таго — мы нярэдка думаем, што гэтыя бедныя няшчасныя людзі ўставалі, елі штосьці там з гаршка, пасля ішлі на працу, вярталіся, зноў елі, клаліся спаць... — і так усё жыццё. А другі варыянт — гэта тое, што мы сёння, і на жаль, нярэдка, бачым у сцэнічных вобразах — «каралеў» з саламянымі «каронамі» на галаве, ды яшчэ і на распушчаных валасах. Што ўвогуле ў традыцыйнай культуры — маркер адмоўных паводзін жанчыны.
Людміла Лебедзь:
— Я, безумоўна, пагаджуся з вамі, што «кароны», ды яшчэ на распушчаных валасах (што ўвогуле ў традыцыйнай культуры — маркер адмоўных паводзін жанчыны; параўнайце: «распушчаная дзеўка») — гэта не здабытак нашай традыцыі, хутчэй, наадварот, бо замужняя жанчына ў народнай культуры заўсёды — і ў будні, і ў святы — хадзіла ў хустцы (праўда, яе маглі па-рознаму адмыслова завязваць), і ніяк інакш. Але, калі прасачыць з'яўленне тых самых «карон», даведаешся, што яны з'явіліся нядаўна, акурат пасля вайны, гэтаксама, як і люрэксам расшытыя народныя касцюмы ў нашых сцэнічных калектываў. Людзям, якія выжылі і перамаглі ў той страшнай вайне, хацелася, каб было «красіва», і гэтая «красівасць» рабілася з таго, што было пад рукой. Атрымліваецца, што і гэта — неад'емная частка нашай гісторыі, нашай культуры, якую не варта лічыць прыкладам для пераймання, але якую варта дараваць...
А пра тое, што нашы традыцыі — гэта найкаштоўнейшы набытак, які можа стаць карысным зусім з нечаканага боку, сведчыць гісторыя народнага майстра Яўгена Блудава з Гродна, які займаецца пляценнем з лазы і саломы, у тым ліку саламяных «павукоў». Ён распрацаваў амаль навуковую тэорыю, згодна з якой пэўны ўзор «павука» (пірамідальныя спляценні) ачышчае паветра ў пакоі. Яго тэорыя пацвярджаецца на практыцы, і ў некаторых аперацыйных, дзе праводзяць аперацыі нашы вядомыя ўрачы, магчыма, у хуткім часе з'явяцца гэтыя творы нашага традыцыйнага мастацтва — вядома, не саламяныя, а з сучаснейшых матэрыялаў. Але прынцып застанецца.
Наталля Кучынская:
— Калі гаварыць пра нацыянальную культуру, яна, на мой погляд, значна шырэйшая за паняцце традыцыйнай культуры. Так, сапраўды існавала культура «лапатная». І доўгі час было меркаванне не толькі інтэлігенцыі, але і простых людзей, што «мы — ад сахі». Але побач развівалася і культура іншая — шыкоўныя замкі і сядзібы, напрыклад, якія мы таксама атрымалі ў спадчыну. «Шляхецкая» і «сялянская» культуры — не супрацьлеглыя, а ўзаемадапаўняльныя адзін аднаго складнікі нашай нацыянальнай культуры. Дарэчы, зараз у маёй акрузе, у ашмянскім музеі працуе незвычайная па сваёй прыгажосці і па глыбіні зместу экспазіцыя: вялікая зала ўяўляе сабой гасцінец ці шлях, на якім абазначаны галоўныя населеныя пункты Ашмянскага павета, а ў кожным пункце можна пабачыць як быт сялян, так і шляхціцаў.
Дадам, што, разважаючы сёння аб нацыянальнай культуры, трэба гаварыць і пра дзейнасць сучасных устаноў культуры, якія маюць асаблівы статус — «нацыянальны». Бо яны выконваюць адказную місію — фарміруюць нацыянальную самасвядомасць, аб'ядноўваюць нацыю і выхоўваюць. Як, напрыклад, культурныя праекты Нацыянальнай бібліятэкі. А адным з самых моцных маіх уражанняў была прэм'ера балета «Вітаўт» у нашым Вялікім тэатры. Вельмі сучасная і ў той жа час вельмі гістарычная пастаноўка, пранікнутая незвычайнай беларускасцю. Была заварожана з першых хвілін, як толькі ўбачыла сімвал краіны — дужага зубра. «Вітаўт» абуджае гонар за народ, да якога ты маеш дачыненне...
Людміла Лебедзь:
— На маёй радзіме — у вёсцы Бусяж на Брэстчыне каля Косава — мужчыны, сабраўшыся, гулялі ў шахматы (!), ніколі(!) не лаяліся пры дзецях і жанчынах, далікатна паводзілі сябе ў танцах...
Увогуле, у беларускай традыцыйнай культуры ёсць усё, што можа быць часткай нацыянальнай ідэі: правілы паводзін — што можна, што нельга, адказнасць за ўчынкі (своеасаблівая Канстытуцыя), маральнасць, культ сям'і, шанаванне продкаў і невычэрпны і неабдымны пласт народнага мастацтва.
Аляксандр Сасновіч:
— Да сённяшніх неад'емных складнікаў беларускай нацыянальнай культуры абавязкова трэба аднесці і культурныя набыткі больш чым 140 нацыянальнасцяў, што жывуць на нашай зямлі, узбагачаюцца ўзаемна і, несумненна, узбагачаюць і беларускую нацыянальную культуру. І — што асабліва важна — служаць папулярызацыі шматнацыянальнай культуры нашага народа. У апараце Упаўнаважанага па справах рэлігій і нацыянальнасцяў рэалізуецца надзвычай цікавы праект. Нашы нацыянальна-культурныя аб'яднанні выязджаюць за мяжу — дэлегацыі ўжо пабывалі ў Літве, Польшчы, ва Украіне. Творчыя калектывы прадстаўлялі менавіта шматнацыянальны беларускі народ. І пасля ўдзельнікі такіх паездак параўноўвалі іх з Рэспубліканскім фестывалем нацыянальных культур, які праводзіцца ў Гродне, і выказвалі вельмі цікавую думку: у Гродне на сцэне прадстаўнікі дыяспар паказваюць, што яны — лепшыя, а падчас такіх паездак — што яны з Беларусі, яны прадстаўляюць там сваю агульную Радзіму, беларускі народ.
Уладзімір Рылатка:
— Дадам да гэтага, што ў паняцце «нацыянальная культура» неабходна прымаць і беларусаў замежжа. Успамінаю, як некалькі гадоў таму ў Міністэрства культуры прыязджаў беларускі калектыў з Цюмені. Такой чысціні беларускую мову, такія аўтэнтычныя народныя песні не ва ўсіх нашых пачуеш...
«Звязда»:
— У сучасных стасунках нацыя культурная — гэта нацыя, якая не толькі шануе традыцыі, але і нацыя высокаадукаваная, якая шукае новыя формы самавыяўлення, робіць навуковыя адкрыцці. Хто паспрачаецца з тым, што даследаванні ў хіміі, адкрыццё новых наначасціц, што могуць стаць асновай лякарства ад раку (за гэта, дарэчы, наш сённяшні госць Міхаіл Арцем'еў разам з калегамі атрымаў Дзяржпрэмію) — таксама частка нашай нацыянальнай культуры?
Міхаіл Арцем'еў:
— Несумненна, высокі ўзровень культуры ў краіне мае на ўвазе высокі ўзровень навуковых ведаў. Самы зразумелы прыклад гэтаму — навука прыдумала інтэрнэт — і вы атрымалі магчымасць павысіць свой культурны ўзровень, атрымаўшы імгненны і фактычна бясплатны доступ да сусветных шэдэўраў. Ва ўсім свеце сёння навукоўцы праз СМІ, праз мерапрыемствы гавораць людзям, што навука — гэта вельмі важная рэч у жыцці кожнага. Без добрай навукі і добрай культуры будучыні не будзе... Але паміж навукай і культурай розніца ўсё ж ёсць. Сучасны вучоны — гэта чалавек абсалютна камунікабельны: без прыняцця вопыту іншых і без перадачы вопыту ўласнага ён проста не можа працаваць. У навуцы замыкацца ў сабе значыць толькі адно: што чалавек не хоча ці не можа канкурыраваць з іншымі. Так, калі нехта прыдумаў лякарства ад раку, гэта хутка стане набыткам усяго свету. У навуцы так: чым больш яна глабальная, тым больш паспяховая. У культуры ўсё наадварот — важны менавіта нацыянальны, адметны фактар.
Уладзімір Рылатка:
— А што лічыць нацыянальным фактарам? Да прыкладу, ці адносіцца да нацыянальнай культуры, да нацыянальнага рэпертуару пастаноўка «Яўгена Анегіна» ў нашым тэатры? Ці «Лятучага галандца»?.. І падобных прыкладаў можна прывесці шмат. Таму, на мой погляд, да нацыянальнай культуры ў шырокім плане можна аднесці ўсё, што робіцца ў культурным асяроддзі нашай краіны, што жыве, што актуалізавана ў гледача, у слухача.
Але, вядома, калі пачынаць паглыбляцца — ніхто, акрамя нас саміх, не будзе ў оперы, балеце, іншых відах мастацтва, шукаючы новыя сучасныя формы падачы, спрабаваць знайсці яшчэ і свае карані, выстройваць менталітэт, ідэю народа. Напрыклад, калі ставілі оперу «Сівая легенда» па Караткевічу — столькі сімвалаў пазнаходзілі! Памятаеце, як Ракутовіч крычыць Сапегу: «Леў! Ты не леў — ты ліс». Вось ён — сімвал тагачаснай шляхты: адрокся ад мовы, ад веры продкаў. А вось Ракутовіч і яго Ірына — тыя што не адракліся — чым усё скончылася? Адсеклі рукі і асляпілі. Вобраз Радзімы, вобраз нацыі, якая пачала тады страчваць сябе. Вось ён, сацыяльны і рэлігійны разрыў... І чалавек, які паслухае оперу, выйдзе з адчуваннем драмы вялікай, якая ў гісторыі народа ў той час адбывалася і наступствы якой — гэта менавіта тое дзяленне на «лапці» і «шляхту», аб якім сёння гаварылі.
І ніхто за нас, паўтаруся, адкрываць падобныя сімвалы не будзе. Мы разумеем гэта, фарміруючы сучасны рэпертуар. Не трэба стамляцца на гэтым шляху, не трэба ператвараць гэта ў аднаразовую акцыю. Опера і балет не хуткацечныя, яны ідуць дзясяткі гадоў, таму менавіта гэтыя віды мастацтва павінны даносіць нешта важнае, што праз сэрца трапляе ў чалавечае светаўспрыманне.
Наталля Кучынская:
— Магу сказаць, што шукаюць нацыянальны рэпертуар і новыя формы і іншыя тэатры. Мне пашчасціла глядзець першы нацыянальны мюзікл «Соф'я Гальшанская», пастаўлены Беларускім дзяржаўным акадэмічным музычным тэатрам. Магчыма, нейкія гістарычныя дэталі пастаноўкі і не супадаюць з традыцыйнымі (элементы касцюмаў, напрыклад). Але як цудоўна паказаны нашы абрады — тое ж Купалле! Адчуць сябе сведкам пэўнай гістарычнай эпохі дапамагае вельмі прыгожая беларуская музыка нашага сучаснага кампазітара Уладзіміра Кандрусевіча. Выходзіш з залы, думаючы пра мінулыя пакаленні, адчуваючы сябе сваім на сваёй зямлі... Сапраўды, мастацтва мае вялікую здольнасць уплываць на чалавечае ўспрыманне...
«Звязда»:
— Але ці многія з нас гатовы чытаць, глядзець, слухаць, успрымаць, аналізаваць? Здаецца, сучаснае грамадства (асабліва маладое пакаленне) у большасці не надта спяшаецца станавіцца культурным у сучасным сэнсе гэтага слова...
Валерый Жук:
— Культурнае светаўспрыманне сапраўды становіцца праблемай. Прычына ў тым ліку і ў сістэме нашай адукацыі. У школах сёння няма такога прадмета, як сусветная мастацкая культура. Гуманітарная адукацыя не паспявае за тэхнічнай.
Аляксандр Сасновіч:
— І — як вынік — менш стала дзяцей займацца творчасцю. Нават у творчыя ВНУ конкурс стаў меншы.
Барыс Лазука:
— Я хацеў бы прывесці паказальны прыклад. Ідучы з работы ў Акадэміі, сустрэў прыбіральшчыцу. Яна з пагардай спытала: «А ты не філосаф? А якая ад вас, філосафаў, карысць?» Гэтая простая жанчына фактычна адлюстравала сённяшняе стаўленне грамадства да гуманітарыяў.
Людміла Лебедзь:
— А яшчэ, мне здаецца, наша агульная віна ў тым, што мы, у пагоні за нейкімі матэрыяльнымі дабротамі, спрабуючы элементарна выжыць, страцілі пакаленне пачатку 1990-х. Цяпер гэтыя дзеці, якія раслі без належнага выхавання, выраслі са сваім прагматычным поглядам на жыццё, які, несумненна, будуць прывіваць сваім дзецям. А ці шмат мы зможам ім супрацьпаставіць? І тут, на мой погляд, на дапамогу можа прыйсці ўсё тая ж традыцыйная культура. У згаданага мною раней Яўгена Блудава трое сыноў валодаюць бацькавым майстэрствам саломапляцення. І ўсе трое пры гэтым — паспяховыя праграмісты.
Студэнт Гродзенскага медыцынскага ўніверсітэта Яўген Маркевіч з сямі гадоў займаецца ткацтвам. Цяпер на выхадныя ён прыязджае ў Лідскі цэнтр рамёстваў і народных традыцый і тчэ ўнікальныя посцілкі і ручнікі (тэхніка неверагодная!), а падчас вучобы піша навуковыя работы па медыцыне. Хлопец вясковы, выхаваны і адукаваны ў лепшых народных беларускіх традыцыях. Калі ёсць спрыт у руках — будуць і думкі ў галаве.
Міхаіл Арцем'еў:
— Мне здаецца, менавіта адсутнасць культурнага выхавання і прыводзіць да таго, што, напрыклад, у сталіцы, разбураючы прыгожы ансамбль праспекта Незалежнасці, які прэтэндаваў на ўнясенне ў спіс помнікаў ЮНЕСКА,
каля цырка раптам узводзіцца сучасны атэль... Хто аўтар гэтай «геніяльнай» ідэі? А ці многім гэта падабаецца? Ці большасці ўсё роўна? Трэба фарміраваць у нашым грамадстве тое асяроддзе, якому будзе не ўсё роўна...
Уладзімір Рылатка:
— Што датычыць архітэктуры. Дзеля справядлівасці адзначу: мала каму хочацца зрабіць горш. Але мы можам усё гэта ацэньваць толькі праз эмацыянальнае выхаванае ўспрыманне — захаплення, здзіўлення, радасці, гора і г.д. А вось слова «выхаванае» тут пачало выпадаць. А калі ў нас, пачынаючы ад дзяцей, не будзе эмацыянальнага ўспрымання, нам вельмі складана будзе вырашаць усе праблемы: прагматызм знясе нам галаву... У школах перасталі спяваць. А там неабходна, каб гучала песня. Успомніце, як мы спявалі — усім класам, незалежна ад таго, ёсць голас ці не. А мы ж менавіта з тымі песнямі, на эмацыянальным успрыняцці, заклалі ў сябе ўсе тыя глыбінныя рэчы, якія былі перададзены ў словах і музыцы. Дробязь, здаецца, спевы ў школе, але, паглядзіце, якая праблема вымалёўваецца.
Наталля Кучынская:
— Безумоўна, нацыя культурная — гэта нацыя высокаадукаваная. Але яшчэ я дадам, што гэта нацыя глыбока духоўная. На вялікі жаль, са школьнай праграмы выключаны як абавязковы прадмет «сусветная мастацкая культура». Я ж лічу неабходным яго вяртанне ў школу, бо ўрокі культуры маюць найвялікшы выхаваўчы патэнцыял, сапраўды развіваюць эстэтычны густ і фарміруюць духоўную асобу. Наконт выхавання прывяду прыклад з Іўя (таксама маёй акругі), шматнацыянальнага і шматканфесійнага мястэчка, дзе ў згодзе жывуць і беларусы, і палякі, і татары, і яўрэі... На цэнтральнай плошчы нядаўна з'явіўся незвычайны помнік — сімвал згоды чатырох канфесій: крынічка, вакол якой сімвалы каталіцкія, праваслаўныя, мусульманскія, іўдзейскія. Будавалі помнік па-беларуску — «талакой», ахвяры рабілі прадстаўнікі гэтых канфесій. Іўеўскія святары, працуючы з дзецьмі і дарослымі, па канфесіях іх не дзеляць, гавораць: «Мы ж беларусаў выхоўваем...»
Міхаіл Арцем'еў:
— А калі паглядзець на праблему культурнага выхавання вачыма навукоўца, чалавека, які аналітычна ацэньвае ўсё, што адбываецца... Чаму мы не глядзім на тое, як гэтая праблема вырашаецца ў іншых краінах, у іншых народаў. Давайце паглядзім, як у іх усё наладжана. Чаму ж мы лічым сябе такімі ўнікальнымі, што не можам вучыцца ў іншых?
Уладзімір Рылатка:
— Паміж культурай і навукай ёсць розніца. Калі б табліцу хімічных элементаў не адкрыў Мендзялееў, гэта б проста цягам часу зрабіў нехта іншы і яна б называлася іншым іменем. Мастацтва — справа абсалютна індывідуальная. Калі б Моцарт не напісаў сваю 40-ю сімфонію, яе не напісаў бы ніхто больш, хоць увесь сусветны вопыт збяры. І вось чым больш мы захаваем у культуры свайго, індывідуальнага — тым лепш. Беларускае асяроддзе захавала столькі экалагічна важных культурных набыткаў, што ўсё ў нас саміх павінна атрымацца.
Валерый Жук:
— Галоўнае, каб мы не падмянілі паняцце «культура» паняццем «цывілізацыя». Таму што ад яе адзін крок да глабалізацыі, калі ўсіх пачнуць падладжваць пад адзін капыл.
Уладзімір Рылатка:
— Цывілізацыя і культура — працэсы супрацьлеглыя. Але сёння немагчыма ўявіць развіццё культуры, калі яна не асвоіла і не выкарыстала працэсы сучаснай цывілізацыі. Культура павінна выкарыстоўваць любыя сродкі для таго, каб даносіць гуманістычныя зносіны паміж людзьмі. Мы ўсе чагосьці вартыя, і культура стараецца паказаць нам самім і навакольным гэтыя вартасці.
«Звязда»:
— А як паказаць гэтыя самыя вартасці нам самім? Як зацікавіць простых людзей мастацтвам, навукай?
Барыс Лазука:
— Нам, навукоўцам ад культуры, свой прадмет папулярызаваць лёгка. Можна наладзіць выставы, майстар-класы, нешта яшчэ цікавае — і гэта будзе прыгожа, будзе прыцягваць увагу. А як паказаць прыгожа і цікава наначасціцы?
Міхаіл Арцем'еў:
— Сур'ёзная навука — гэта, несумненна, элітарная сфера. Але, да прыкладу, у той жа Амерыцы нават самыя сур'ёзныя вучоныя кожны год павінны паказаць падаткаплацельшчыкам, на што тыя плацяць падаткі. І кожны год там праходзіць тыдзень навукі. Ладзяцца выставы, музеі падключаюцца... Гэта трэба паказаць прывабна і, як вы кажаце, прыгожа. Каб той жа малады хлопец, які мае здольнасці, займеў яшчэ і жаданне навукай займацца, паглядзеўшы, як гэта булькае, капае, працуе. А каб гэта менавіта так паказаць, патрэбны талент... А ў нас справа не толькі ў таленце, але яшчэ і ў жаданні гэтым займацца. Бо нярэдка і навуцы, і культуры не давяраюць, усё трымаецца на рознага кшталту паперках. Нярэдка вартасць той або іншай працы і мэтазгоднасць яе «прасоўвання» і фінансавання вызначае не экспертны савет, а адзін ці некалькі чыноўнікаў...
«Звязда»:
— У хуткім часе ў парламент на разгляд паступіць праект унікальнага для нашай краіны дакумента — Кодэкса «Аб культуры». Наколькі, на ваш погляд, яго прыняцце здольнае будзе вырашыць пытанні, якія мы сёння тут узнімалі?
Наталля Кучынская:
— Зараз праект кодэкса знаходзіцца ў стадыі абмеркавання, паступіць у Палату толькі ў красавіку 2015 года. На пасяджэннях рабочай групы ў Міністэрстве культуры абмеркаванне прапанаваных навацый ідзе вельмі актыўнае. Нават па тэрміне «культура» было шмат прапаноў і ўдакладненняў. Кодэкс — сістэмны і лагічны дакумент, прадыктаваны жыццём, які створыць сучаснае прававое поле ў сферы культуры. Сёння ж у сферы культуры дзейнічаюць сем законаў і больш за сотню іншых заканадаўчых актаў, прынятых у розны час, нормы якіх не заўсёды стасуюцца адна з адной, некаторыя палажэнні страцілі сваю актуальнасць. Жыццё падказала і тыя сучасныя нормы, якія сёння не маюць сілы закона і якія трэба замацаваць. Менавіта ўсе гэтыя пытанні закліканы вырашыць кодэкс. Ён прызначаны ўрэгуляваць грамадскія адносіны ў сферы культуры, стварыць арганізацыйныя, эканамічныя і правыя ўмовы для захавання культурных каштоўнасцяў, якія ёсць у нашай спадчыне, і для з'яўлення новых.
Міхаіл Арцем'еў:
— Культура — сфера, якая самаарганізуецца. Што ж тут рэгуляваць?
Наталля Кучынская:
— Толькі для прыкладу, ахову гісторыка-культурнай спадчыны, развіццё музейнай і бібліятэчнай справы, дзейнасць творчых саюзаў, фінансаванне творчых праектаў...
Міхаіл Арцем'еў:
— А хто будзе вырашаць, які праект варты? Зноў чыноўнік? У навуцы гэта больш-менш наладжана. Якасць навуковых работ вызначае камп'ютар — аўтаматычна па індэксе цытавання навуковых прац вучонага. Дадаткова праводзіцца рэцэнзаванне праектаў незалежнымі вучонымі з розных краін. Так і ў сферы культуры: механізм вызначэння больш вартага павінен быць свабодным ад валюнтарызму чыноўнікаў.
Аляксандр Сасновіч:
— Кодэкс дазволіць любому чалавеку — і творцу, і чыноўніку, і спажыўцу прадукцыі культуры — знайсці ў ім усё: і што ён можа, і чаго не можа, на што мае права і што ён абавязаны. А сёння столькі законаў і іншых дакументаў, якія часам нават супярэчаць адзін аднаму — чалавек проста губляецца. Як паказала практыка прыняцця Кодэкса «Аб адукацыі», эфект толькі станоўчы. Будзем спадзявацца, што і з Кодэксам «Аб культуры» вынік будзе не горшы.
Пасяджэнне «круглага стала» правяла Алена ЛЯЎКОВІЧ.
Фота Яўгена Пясецкага.
Ад рэдакцыі. Мяркуем, у вас, шаноўныя чытачы, з'явіліся свае цікавыя думкі, развагі, прапановы з нагоды гэтай дыскусіі. Падзяліцеся імі са сваёй газетай. Давайце працягнем абмеркаванне пытання сучаснай культуры ў нашым жыцці і нашага дачынення да сучаснай культуры. Пакідайце свае каментарыі на нашым сайце zvіаzdа.bу, пішыце на электронны ці паштовы адрас газеты. Ваша меркаванне важнае для нас!
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.