Тыдзень беларускай мовы, прымеркаваны да Міжнароднага дня роднай мовы, распачнецца 21 лютага на філалагічным факультэце БДУ.
Стартуе акцыя літаратурна-музычнай кампазіцыяй «І наша мова — з-пад крыла душы». Гасцямі свята стануць рэктар БДУ акадэмік Сяргей Абламейка, старшыня Міжнароднага камітэта славістаў, член-карэспандэнт Акадэміі навук Беларусі, прафесар Аляксандр Лукашанец, паэт, драматург і публіцыст Анатоль Вярцінскі і ансамбль акардэаністаў СШ №73 Мінска. У выкананні студэнтаў прагучаць вершы вядомых беларускіх паэтаў, а таксама творы ўласнага сачынення. Будуць праінсцэніраваны і фрагменты твораў нацыянальнай літаратуры.
Упершыню ў праграму Тыдня ўключаны тэлемост «Мінск—Віцебск», які запланаваны на 24 лютага. Удзельнікамі сустрэчы стануць выкладчыкі кафедры беларускага мовазнаўства Віцебскага дзяржаўнага ўніверсітэта імя П.М.Машэрава, супрацоўнікі філалагічнага факультэта БДУ і Нацыянальнай акадэміі навук Беларусі. Лінгвісты абмяркуюць перспектывы развіцця і функцыянавання беларускай мовы. Акрамя таго, у рамках відэадыскусіі адбудзецца прэзентацыя новых вучэбных дапаможнікаў выкладчыкаў філфака БДУ.
25 лютага на філалагічным факультэце пройдзе пазнавальна-забаўляльная гульня «Філалогія і Я». Удзел у ёй возьмуць студэнты першага курса спецыяльнасцяў «Беларуская філалогія» і «Славянская філалогія». Іх чакаюць паэтычны, граматычны, песенны і іншыя конкурсы.
Чацвёрты дзень тыдня (26 лютага) будзе прысвечаны пытанням, якія тычацца новага накірунку беларускай філалогіі, — этналінгвістыкі. Для студэнтаў будзе арганізавана сустрэча з загадчыкам кафедры аддзела славістыкі і тэорыі мовы Цэнтра даследаванняў беларускай культуры, мовы і літаратуры НАН Беларусі Мікалаем Антропавым, навуковым супрацоўнікам сектара этналінгвістыкі і фальклору згаданага цэнтра Аленай Боганевай, загадчыкам аддзела фалькларыстыкі і культуры славянскіх народаў гэтага ж цэнтра Таццянай Валодзінай і дацэнтам кафедры сучаснай беларускай мовы БДУ Анжалікай Садоўскай.
Акордам жа святочных мерапрыемстваў стане Дзень беларускага перакладу (27 лютага). Яго правядзе перакладчык філалагічнага факультэта, дацэнт кафедры гісторыі беларускай літаратуры БДУ Ірына Багдановіч.
Надзея НІКАЛАЕВА.
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.