Пытанні ўмацавання ролі мясцовых Саветаў дэпутатаў, замацавання кадраў у сельскай мясцовасці і адміністрацыйна-тэрытарыяльнага ўладкавання прааналізаваны на чарговым пасяджэнні Савета па ўзаемадзеянні органаў мясцовага самакіравання пры Савеце Рэспублікі.
Як адзначыў старшыня Савета Рэспублікі Нацыянальнага сходу Анатоль Рубінаў, Савет па ўзаемадзеянні — калегіяльны орган, да якога прыслухоўваюцца дзяржаўныя структуры. Менавіта пра гэта сведчыць уключэнне яго прапаноў у праекты прававых актаў, якія знаходзяцца на разглядзе ў кіраўніка дзяржавы. Датычацца яны разнастайных аспектаў жыццядзейнасці. Гэтае сцвярджэнне канкрэтнымі прыкладамі падмацавала старшыня Пастаяннай камісіі Савета Рэспублікі па рэгіянальнай палітыцы і мясцовым самакіраванні Святлана Герасімовіч. У прыватнасці, яна паведаміла, што на разгляд Прэзідэнта Беларусі прадстаўлены праект з прапановай Савета па ўзаемадзеянні аб вылучэнні дэпутатам аднаго вольнага ад асноўнай работы дня штомесяц для ажыццяўлення сваіх паўнамоцтваў непасрэдна ў акругах, сустрэч з выбаршчыкамі, што асабліва актуальна напярэдадні выбараў у мясцовыя Саветы 27 склікання. Акрамя гэтага, у адпаведнасці з Указам Прэзідэнта Рэспублікі Беларусь ад 4 лютага 2014 года № 59, сродкі, атрыманыя ад продажу зямельных участкаў на аўкцыёнах ці ад іх арэнды, мясцовыя Саветы могуць выкарыстоўваць на добраўпарадкаванне тэрыторый, навядзенне парадку на зямлі.
Адпаведнымі міністэрствамі і ведамствамі падтрымана таксама прапанова аб аказанні сельвыканкамам бязвыплатнай спонсарскай дапамогі ўсімі арганізацыямі, што знаходзяцца на тэрыторыі сельсавета, незалежна ад формы іх уласнасці.
Дзе кадры браць?
Летась Савет па ўзаемадзеянні органаў мясцовага самакіравання правёў выязное пасяджэнне ў Горацкім раёне Магілёўскай вобласці, прысвечанае рабоце органаў мясцовага кіравання і самакіравання па развіцці сацыяльнай сферы (у рамках рэалізацыі дзяржаўнай праграмы ўстойлівага развіцця вёскі на 2011—2015 гады). Асаблівая ўвага надавалася падрыхтоўцы і замацаванню кадраў у аграрным сектары. Святлана Герасімовіч дэталёва прааналізавала вынікі працы. У прыватнасці, яна адзначыла, што гэтыя пытанні прыцягнулі ўвагу разнастайных рэспубліканскіх структур, адпаведных міністэрстваў. Была створана рабочая група пад кіраўніцтвам намесніка прэм'ер-міністра Беларусі Міхаіла Русага, якая выпрацавала адпаведныя рэкамендацыі.
Прапановы рабочай групы знайшлі адлюстраванне ў праекце новай рэдакцыі Указа Прэзідэнта Беларусі № 80 («Аб правілах прыёму ў вышэйшыя навучальныя і сярэднія спецыяльныя навучальныя ўстановы»).
Паводле яго, мэтавы прыём абітурыентаў па сельскагаспадарчых спецыяльнасцях павялічаны з 30 да 60%. Умовы мэтавай падрыхтоўкі кадраў для аграрнага сектара эканомікі распаўсюджваюцца і на моладзь, што пражывае ў гарадскіх населеных пунктах. Адменена здача ўступных іспытаў па рускай і беларускай мовах для тых, хто паступае на скарочаны курс навучання ва ўстановы вышэйшай адукацыі сельскагаспадарчага профілю. Абітурыенты дзённай формы будуць мець права выбару: здаваць уступныя экзамены ў ВНУ або прад'яўляць сертыфікаты цэнтралізаванага тэсціравання. Абмежаваны і кантынгент ахвотных атрымліваць вышэйшую сельскагаспадарчую адукацыю на завочным і вячэрнім аддзяленнях за кошт сродкаў рэспубліканскага бюджэту.
Спадарожнікі без статусу
На пасяджэнні былі агучаны вынікі маніторынгу ў практыцы прымянення Закона «Аб мясцовым кіраванні і самакіраванні ў Рэспубліцы Беларусь». Прынамсі, у частцы вырашэння пытанняў адміністрацыйна-тэрытарыяльнага ўладкавання. Загадчык аддзела па забеспячэнні работы Пастаяннай камісіі Савета Рэспублікі па рэгіянальнай палітыцы і мясцовым самакіраванні і ўзаемадзеянні з органамі мясцовага самакіравання Міхаіл Гурыновіч падкрэсліў, што ў краіне створана неабходная заканадаўчая база ў гэтым кірунку. Але выяўлены і пэўныя недахопы ў пытаннях прававога рэгулявання па адміністрацыйна-тэрытарыяльным уладкаванні. Напрыклад, у заканадаўстве пакуль не замацаваны дакладны парадак стварэння і рэарганізацыі, ліквідацыі мясцовых Саветаў дэпутатаў і выканкамаў у выпадку змянення тэрытарыяльнага ўладкавання. У тым ліку і адзінак, якія не маюць агульнага адміністрацыйнага цэнтра. У 2006 годзе паступіла прапанова аб аб'яднанні Мінскага раёна і Заслаў'я — горада абласнога падпарадкавання, што знаходзіцца ў гэтым рэгіёне. Першапачатковае рашэнне прадугледжвала стварэнне адной адміністрацыйна-тэрытарыяльнай адзінкі: Мінскага раёна з цэнтрам у Заслаўі. Аднак зрабіць гэта на заканадаўчым узроўні не ўяўлялася магчымым, паколькі адсутнічала нарматыўна-прававая база. З гэтых жа прычын было адкладзена аб'яднанне Смалявіцкага раёна і горада Жодзіна.
На думку Міхаіла Гурыновіча, неабходна ўдасканаліць і парадак уліку меркавання грамадзян і мясцовых Саветаў дэпутатаў пры вырашэнні пытанняў адміністрацыйна-тэрытарыяльнага ўладкавання. Так, у законе «Аб мясцовым кіраванні і самакіраванні ў Рэспубліцы Беларусь» сказана, што неабходна ўлічваць такое меркаванне, але абавязковасць уліку яго застаецца пад пытаннем. Спецыяліст звярнуў увагу прысутных і на тое, што трэба вырашаць праблему з пасялковымі Саветамі, створанымі яшчэ ў часы БССР, асабліва гэта тычыцца Мінскай вобласці. Акрамя таго, не вызначаны і прававы статус у пытаннях стварэння і скасавання такіх тэрытарыяльных адзінак, як гарады-спадарожнікі.
Аптымізацыя: працяг будзе
Падтрымаў Міхаіла Гурыновіча наконт парадку ўліку меркаванняў грамадзян і старшыня Мінскага абласнога Савета дэпутатаў Іван Ліпніцкі. Здараецца так, што даводзіцца далучаць буйны населены пункт да меншага па патрабаванні нязначнай часткі насельніцтва. Разам з тым пры аптымізацыі тэрыторый сельсаветаў некаторыя з іх не ўвайшлі ў межы сельгаспрадпрыемстваў. «Мы пайшлі насустрач людзям менавіта таму, што гэтыя сельсаветы маюць багатыя гістарычныя, культурныя традыцыі, — адзначыў Іван Эдуардавіч. — Планавалася скасаваць 100 сельскіх Саветаў, але на справе атрымалася 56».
Падчас рэарганізацыі ўлічваліся экалагічныя, эканамічныя, сацыяльна-бытавыя і транспартныя аспекты. Больш за ўсё заўваг было менавіта па арганізацыі работы рэйсавых маршрутаў у цэнтры новаствораных сельсаветаў. «Нам давялося звяртацца з просьбай нават у прыватныя арганізацыі, каб пусціць туды транспарт, — канстатаваў Іван Ліпніцкі. — Сёння ўсе абяцанні, што даваліся жыхарам на агульных сходах, практычна выкананы. Мы імкнуліся таксама захаваць аб'екты дзейнай інфраструктуры, асаблівую ўвагу звярталі на павышэнне якасці паслуг, прывабнасць населеных пунктаў».
На сённяшні дзень колькасць адміністрацыйна-тэрытарыяльных адзінак пярвічнага ўзроўню на Міншчыне скарацілася з 281 да 225. Сёлета работа будзе прадоўжана.
Таццяна ЛАЗОЎСКАЯ.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.