Новыя дыстанцыйныя ўмовы для навучання і падрыхтоўкі да ЦТ з'явіліся ў вучняў сталічнага ліцэя № 1: днямі Беларускі дзяржаўны ўніверсітэт інфарматыкі і радыёэлектронікі адкрыў на яго базе кабінет відэаканферэнц-сувязі.
Ліцэй №1 і БДУІР звязвае шматгадовае супрацоўніцтва: менавіта тут навучаюцца патэнцыяльныя абітурыенты БДУІР. І адкрыццё кабінета відэаканферэнц-сувязі — гэта выхад на новы ўзровень узаемадзеяння.
Выкладчыкі БДУІР будуць праводзіць дыстанцыйна для ліцэістаў заняткі па фізіцы, матэматыцы і інфарматыцы, прычым абсалютна бясплатна. У навучэнцаў з'явіцца магчымасць больш паглыбленага вывучэння прадметаў. Яны змогуць кантактаваць з выкладчыкамі ўніверсітэта, а тыя будуць адказваць на пытанні ліцэістаў у рэжыме рэальнага часу.
Памяшканне аснашчана сучасным абсталяваннем, якое не запатрабуе мадэрнізацыі ў бліжэйшыя гады. Абсталяванне дазваляе атрымаць дакладную выяву і чысты гук. На яго закупку ўніверсітэт выдаткаваў каля 65 мільёнаў беларускіх рублёў. Дзякуючы новым тэхналогіям у ліцэістаў будзе таксама магчымасць паўдзельнічаць у семінарах, трэнінгах і алімпіядах, якія арганізуе ВНУ.
БДУІР традыцыйна выступае піянерам ва ўкараненні новых тэхналогій і рашэнняў у сферы адукацыі. І сваіх абітурыентаў сёлета ён будзе сустракаць па-новаму. Падчас уступнай кампаніі абітурыенты БДУІР змогуць падаваць заяву для паступлення па электроннай пошце. На сайце ўніверсітэта будучы студэнт зможа стварыць персанальны электронны кабінет, уваход у які магчымы толькі па персанальных пашпартных даных. У кабінеце трэба будзе размясціць інфармацыю пра сябе і ўказаць пералік спецыяльнасцяў у парадку расстаноўкі прыярытэтаў. Паколькі цяпер абітурыент зможа ўказваць усе 34 спецыяльнасці тэхніка-тэхналагічнага профілю (у парадку ўбывання прыярытэтаў), то складанне спіса пры звычайным спосабе падачы заявы займала б шмат часу. А дома, у спакойных абставінах, абітурыенту прасцей будзе вызначыцца з выбарам.
Калі заява будзе разгледжана, абітурыента выклічуць у прыёмную камісію для прад'яўлення ўсіх неабходных дакументаў: атэстата, сертыфікатаў ЦТ і медыцынскай даведкі. Асабістага наведвання прыёмнай камісіі электронная форма запаўнення заявы не выключае.
Яшчэ адна навінка будучай прыёмнай кампаніі — адкрыццё набору па трох новых спецыяльнасцях. На факультэце камп'ютарнага праектавання будзе ажыццяўляцца набор на спецыяльнасць «Інфармацыйныя сістэмы і тэхналогіі ў бізнес-менеджменце». Сёння на рынку працы вельмі запатрабаваны спецыялісты, якія валодаюць інфармацыйнымі сістэмамі і тэхналогіямі і ў той жа час здольныя прымаць аптымальныя рашэнні ў кіраванні бізнесам. Абітурыентам будзе прадастаўлена 15 бюджэтных месцаў і 45 платных на дзённай форме навучання, а таксама 30 месцаў — на дыстанцыйнай форме навучання. Выпускнікі атрымаюць кваліфікацыю «Праграміст. Бізнес-аналітык».
На кафедры электроннай тэхнікі і тэхналогій адкрываюцца дзве новыя спецыяльнасці: «Праектаванне і вытворчасць праграмна-кіруемых электронных сродкаў» і «Праграмна-кіруемыя электронна-аптычныя сістэмы». Гэта шматпрофільныя спецыяльнасці, звязаныя з камп'ютарным праектаваннем сучасных складаных сістэм.
Надзея НІКАЛАЕВА
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».