Аляксандра Дуліба заняла 6-е месца і ўстанавіла новы рэкорд Беларусі па марафонскім бегу.
Дыстанцыю Бостанскага марафону яна пераадолела за 2 гадзіны 21 хвіліну 29 секундаў, гэта лепшы вынік сярод спартсменак з Еўропы.
Пераможцай забегу трэці раз запар стала кенійка Рыта Джэпту, якая пераадолела дыстанцыю за 2 гадзіны, 18 хвілін і 57 секундаў (гэта новы рэкорд марафону). Серабро ў Бузунеш Дэбу з Эфіопіі (2:19,59), трэцяй фінішавала яе суайчынніца Марэ Дзібаба (2:20.35).
Сярод мужчын лепшым стаў амерыканскі спартсмен Меб Кефлезігі, яго вынік — 2 гадзіны, 8 хвілін, 37 секундаў. Другое і трэцяе месца занялі кенійскія бегуны — Уілсан Чэбет (2:08.48) і Франклін Чэпквоні (2:08.50). Чацвёртым стаў украінскі спартсмен Віталь Шафар, які паказаў вынік 2:09.38.
Летась падчас марафону, 15 красавіка, на фінішы дыстанцыі ўзарваліся два заплечнікі з самаробнымі бомбамі. У выніку здарэння загінула трое, пацярпела больш за 260 чалавек. Таму сёлета спаборніцтва праходзіла ва ўмовах павышаных мер бяспекі. Паліцэйскія вырашылі павялічыць колькасць загародак, якія акрэсліваюць маршрут бегуноў, задзейнічаць 3,5 тысячы праваахоўнікаў, выкарыстоўваць відэакамеры і верталёты. Бегунам загадалі насіць рэчы ў празрыстых пакетах, забаранілі браць на спаборніцтвы больш за літр вадкасці.
Усё гэта не паменшыла колькасць спартсменаў і гледачоў (сёлета ў марафоне ўдзельнічалі 36 тысяч бегуноў, гэта на дзевяць тысяч чалавек больш, чым летась). На дыстанцыі за прабегам назіралі каля мільёна гледачоў, ніякіх сур'ёзных інцыдэнтаў не адбылося.
Брытанскі марафонец Марк Хэйзелхерст сказаў перад забегам: «Я думаю, кожны з нас хоча пабегчы, каб аддаць даніну бегу і гэтаму гораду. Думаю, у гэтым галоўнае адрозненне ад леташняга марафону».
Дар'я Лабажэвіч.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.