Міністэрства адукацыі вызначылася з пералікам педагагічных спецыяльнасцяў, на якія школьныя медалісты і пераможцы абласных алімпіяд змогуць паступаць без экзаменаў.
Так, уладальнікам дыпломаў І, ІІ і ІІІ ступеняў трэцяга (абласнога і Мінскага гарадскога) этапа рэспубліканскай алімпіяды па вучэбных прадметах, праведзеных Міністэрствам адукацыі ў навучальным годзе, дадзена права паступаць без уступных іспытаў на педагагічныя спецыяльнасці, для якіх гэты прадмет вызначаны прадметам першага профільнага іспыту. Такое ж права маюць асобы, узнагароджаныя залатым і сярэбраным медалём і выпускнікі сярэдніх спецыяльных навучальных устаноў, якія маюць дыплом з адзнакай. Праўда, ёсць адна ўмова: для паступлення на педагагічныя спецыяльнасці без экзаменаў вышэйзгаданым катэгорыям абітурыентаў давядзецца прадаставіць у прыёмную камісію ВНУ рэкамендацыю ад педагагічнага савета ўстановы, якую яны скончылі.
У пералік спецыяльнасцяў увайшлі дашкольная і пачатковая адукацыя, гісторыя і грамадазнаўчыя дысцыпліны, біялогія, хімія, геаграфія, матэматыка, інфарматыка, фізіка, тэхнічная творчасць, беларуская мова і літаратура, руская мова і літаратура, тэхнічная праца і прадпрымальніцтва, абслуговая праца, выяўленчае мастацтва, лагапедыя, сурдапедагогіка, тыфлапедагогіка, алігафрэнапедагогіка, сацыяльная педагогіка і іншыя.
Пры правядзенні ўступнай кампаніі на педагагічных спецыяльнасцях у гэтым годзе было вырашана зрабіць упор на тых, хто разумее і ведае, навошта ён выбраў для сябе тую ці іншую спецыяльнасць. У Міністэрстве адукацыі ўпэўнены, што з мэтанакіраванай моладдзю трэба пачынаць працаваць яшчэ на этапе вучобы ў старшых класах. Першыя крокі ў гэтым кірунку былі зроблены яшчэ летам 2013 года, калі ў нацыянальным дзіцячым адукацыйна-аздараўленчым цэнтры «Зубраня» была арганізаваная змена для будучых настаўнікаў і выкладчыкаў.
Пералік педагагічных спецыяльнасцяў,
на якія пераможцы абласных алімпіяд
і выдатнікі змогуць паступаць без экзаменаў:
Дашкольная адукацыя
Пачатковая адукацыя
Гісторыя і грамадазнаўчыя дысцыпліны
Беларуская мова
і літаратура
Руская мова і літаратура
Біялогія і геаграфія
Матэматыка і інфарматыка
Фізіка і інфарматыка
Фізіка і тэхнічная творчасць
Тэхнічная праца
і прадпрымальніцтва
Абслуговая праца
і прадпрымальніцтва
Абслуговая праца
і выяўленчае мастацтва
Лагапедыя
Сурдапедагогіка
Тыфлапедагогіка
Алігафрэнапедагогіка
Сацыяльная педагогіка
Біялогія
(навукова-педагагічная дзейнасць)
Геаграфія
(навукова-педагагічная дзейнасць)
Матэматыка
(навукова-педагагічная дзейнасць)
Фізіка
(навукова-педагагічная дзейнасць)
Хімія (навукова-педагагічная дзейнасць)
Надзея НІКАЛАЕВА.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.