Пасля выступлення Прэзідэнта Беларусі з Пасланнем да беларускага народа і Нацыянальнага сходу дэпутаты абедзвюх палат парламента мелі магчымасць задаць кіраўніку дзяржавы свае пытанні, як правіла, сфармуляваныя ў выніку сустрэч з выбаршчыкамі. Таму адказы на іх — гэта погляд лідара краіны на надзённыя для яе жыхароў праблемы. Па найбольш складаных пытаннях Прэзідэнт даў канкрэтныя даручэнні ўраду і сваёй Адміністрацыі.
Пра службовае жыллё і пацярпелыя тэрыторыі
Аляксандр Лукашэнка пагадзіўся з дэпутатам ад Быхаўскай выбарчай акругі № 81 (Магілёўская вобласць) Таццянай КАНАНЧУКпра несправядлівасць абмежаванняў па прыватызацыі службовага жылля на тэрыторыях, якія пацярпелі ад аварыі на Чарнобыльскай АЭС. Ён паабяцаў разабрацца ў сітуацыі і паставіў вертыкалі ўлады задачу значна падцягнуць узровень жыцця насельніцтва на поўдні і паўднёвым усходзе краіны.
«Мы трохі скарэктуем сваю палітыку ў плане пераадолення наступстваў чарнобыльскай аварыі», — сказаў Прэзідэнт і дадаў, што паказальнай у гэтым плане будзе Магілёўская вобласць.
Ён паабяцаў падчас сваёй традыцыйнай паездкі ў пацярпелыя ад чарнобыльскай катастрофы рэгіёны азнаёміцца з планамі мясцовых уладаў па развіцці гэтых тэрыторый і канцэпцыяй па развіцці паўднёва-ўсходняй часткі Магілёўшчыны. Па меркаванні кіраўніка дзяржавы, гэта будзе паказальна і характэрна і для іншых рэгіёнаў, у тым ліку поўдня Гомельскай вобласці.
Пра магчымасць прыватызацыі жылых памяшканняў камерцыйнага выкарыстання супрацоўнікамі органаў унутраных спраў, суддзямі, пракурорскімі работнікамі, якія маюць стаж вайсковай альбо дзяржаўнай службы больш за 20 гадоў, спытала дэпутат Пастаяннай камісіі Палаты прадстаўнікоў па заканадаўстве Наталля ГУЙВІК (Полацкая гарадская выбарчая акруга № 28).
Гэтая праблема датычыцца вышэйназванай катэгорыі людзей, якія атрымалі ведамаснае жыллё пасля 8 красавіка 2006 года ў сувязі са службовай неабходнасцю. Аляксандр Лукашэнка заўважыў, што калі такое пытанне фармулюе народны выбраннік, значыць, яно патрабуе вырашэння. Ён даручыў сваім памочнікам дэталёва разабрацца ў гэтай праблеме.
Пра павышэнне цэн на алкаголь і тытунь
Дэпутат Пастаяннай камісіі Палаты прадстаўнікоў па адукацыі, культуры і навуцы Наталля КУЧЫНСКАЯ (Іўеўская выбарчая акруга № 53) прапанавала Прэзідэнту павысіць акцызы на алкагольную і тытунёвую прадукцыю, каб накіраваць выручаныя сродкі на культурныя, адукацыйныя і спартыўныя праекты. Аляксандр Лукашэнка адказаў, што да вырашэння такіх задач трэба падыходзіць абдумана. «Мы можам на алкаголь і тытунь павысіць акцызы. Чытай — павысіць цэны. Паўстае пытанне: дзе будзем прадаваць алкаголь і тытунь, асабліва ва ўмовах Мытнага саюза? Калі цана будзе вышэйшай, чым на «барматуху», нават няякасную, якую мы часам атрымліваем з‑за межаў краіны, наш народ будзе піць гэтую «барматуху», аж да адэкалону. Былі ж такія перыяды. Таму павышаць цэны на алкаголь і тытунь трэба вельмі акуратна і асцярожна, каб не закрыць для сябе рынкі і не страціць унутраны рынак».
Пра дэвальвацыю і канкурэнтаздольнасць
Адказваючы на пытанне старшыні Пастаяннай камісіі Палаты прадстаўнікоў па бюджэце і фінансах Людмілы ДАБРЫНІНАЙ (Аршанская гарадская выбарчая акруга № 26), Прэзідэнт запэўніў, што абвальнай дэвальвацыі ў Беларусі не будзе.
«Будзем рабіць усё, каб яе пазбегнуць», — запэўніў кіраўнік дзяржавы. Ён дадаў, што ў Беларусі не маюць намеру праводзіць дэвальвацыю адміністрацыйна, як, напрыклад, у Казахстане. «Калі мы будзем бачыць, што гэта неабходна, што ў нас няма золатавалютных рэзерваў або яны апускаюцца ніжэй за плануемы крытычны ўзровень, мы спакойна правядзём дэвальвацыю. Калі да канца года дабавім яшчэ 5–6 працэнтаў, будзе нармальна», — лічыць Прэзідэнт.
Прэзідэнт назваў скандальнымі чуткі аб тым, што пасля чэмпіянату свету па хакеі ў Мінску будзе дэвальвавана нацыянальная валюта. На яго думку, заклік «бегчы ў абменнікі» з'яўляецца беспадстаўным. «Калі каму-небудзь захочацца бегчы — бяжыце. Там сёння праблем няма. Мяняйце, але крыўдаваць потым будзеце самі на сябе. Абвальваць мы нічога не будзем, не перажывайце, трацьце грошы ў магазінах», — выказаўся Аляксандр Лукашэнка.
Пра жыццё ў новым Саюзе
Адказваючы на пытанне старшыні Пастаяннай камісіі Палаты прадстаўнікоў па эканамічнай палітыцы Віктара ВАЛЮШЫЦКАГА (Брэсцкая-Заходняя выбарчая акруга № 1), што чакае беларускую эканоміку і суб'ектаў гаспадарання пасля стварэння Еўразійскага эканамічнага саюза, кіраўнік дзяржавы падкрэсліў: «Горшых, чым цяпер, умоў не будзе. Можа быць, нават лепш, калі Расія, перш за ўсё, выканае сваё абяцанне. Мой калега, расійскі прэзідэнт, у свой час сказаў, што яны гатовы з 1 студзеня 2015 года зняць выключэнні і абмежаванні. Гэта было сказана ў вузкім і шырокім коле два ці два з паловай гады таму. Прэм'ер-міністр Мядзведзеў пра гэта таксама казаў, яшчэ калі быў прэзідэнтам». Аляксандр Лукашэнка адзначыў, што ўсе гэтыя заявы ён выпісаў і гатовы паказаць на сустрэчы прэзідэнтаў Беларусі, Казахстана і Расіі 29 красавіка ў Мінску.
«Было неаднаразова сказана, што гэтыя выключэнні і абмежаванні будуць зняты. Расія ў гэтым працэсе нават ішла наперадзе. Мы выказвалі насцярожанасць, што гэта можа прывесці да пэўных наступстваў па вытворчасці лекаў, алкаголю, у банкаўскай сферы. Асабліва гэтая сфера і транспарт хвалявалі Казахстан. Мы гэта ўсё выказвалі, але расійскі бок увесь час настойваў на зняцці выключэнняў і абмежаванняў», — паведаміў кіраўнік беларускай дзяржавы. Цяпер сітуацыя некалькі іншая. «Казахстан быццам бы задавальняе ўсё, што адбываецца, таму што яго галоўны прыярытэт — уступіць у Сусветную гандлёвую арганізацыю, а потым у наш эканамічны саюз. Расію нібы таксама задавальняе цяперашняя сітуацыя. Беларусь жа дакладна заяўляе, што мы прытрымліваемся тых нашых заяў, якія былі зроблены раней», — растлумачыў Прэзідэнт.
Вольга МЯДЗВЕДЗЕВА.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.