У вёсцы Стаўбун Веткаўскага раёна да нашых дзён захаваўся традыцыйны абрад «ваджэння і пахавання стралы», які з'яўляецца адной з самых архаічных з'яў беларускай фальклорнай спадчыны
«Бога ў лапці абуваем і на неба адпраўляем», — казалі некалі на Ушэсце ў Стаўбуне і з раніцы, па даўнім звычаі, пяклі блінцы з крухмалу — «Богавы анучы». Старэйшая стаўбунская гаспадыня Ульяна Аніськова ад маленства памятае: «З Вялікадня Бог ходзіць па зямлі, а на Ушэсце цягне каласы за валасы і адпраўляецца на неба». Баба Ульяна цяпер у свае 74 гады спявае стрэльныя песні. Разам з іншымі вяскоўкамі вядзе «стралу» за сяло ў жыта пад агульны спеў:
Ляці, страла, ды ўздоўж сяла!
Ды ўздоўж сяла, ў канец вуліцы!
Не ўбі, страла, добрага молайца!
Па тым молайцу плакаць некаму…»
«Страла» сімвалізуе маланку, здольную нарабіць вялікіх бед, калі яе своечасова не адвесці ад вёскі і не «пахаваць» у жыце. Гэтае павер'е ідзе з сівой мінуўшчыны і нават у часы хрысціянства жыхары Пасожжа не адмовіліся ад ушанавання і «задобрывання» з'яў і стыхій прыроды, «адводу» адмоўнай энергіі з дапамогай земляробскай і ахоўнай магіі. «Стралою» ў паўднёва-ўсходнім рэгіёне Беларусі пачыналі лета, бралі ад зямлі здароўе і аддавалі сваю сілу для ўрадлівасці. Таму прынята было вадзіць карагод па маладым жыце і абавязкова пакачацца ў ім.
З году ў год у Стаўбун прыязджаюць фалькларысты, як да невычэрпнай крыніцы народнай мудрасці. Другі год запар паўдзельнічаць у «пахаванні стралы» прыязджаюць са сталіцы студэнтка-трэцякурсніца Беларускага ўніверсітэта культуры і мастацтваў, будучая фалькларыстка Паліна Курановіч і магістрант Нацыянальнай акадэміі навук Кацярына Плоцкая — павучыцца сапраўдным спевам, далучыцца да жывой традыцыі, каб потым свае веды выкарыстоўваць для захавання і развіцця этнічнай культуры.
Як і ў ранейшыя гады, у абрадзе ўдзельнічалі госці з Санкт-Пецярбурга, Масквы, студэнты з Гомеля, школьніцы мясцовых школ, клубныя работнікі пад кіраўніцтвам Святланы Парашчанкі і, галоўнае, мясцовыя жыхары. У гучных карагодных спевах асабліва адметна гучалі галасы Ульяны Аніськовай і яе суседак Марыі Крупянковай, Ганны Чуяшовай, Марыі Гарошкі, Валянціны Сяргеевай і Наталлі Бойкі. Вяртаючыся з поля, яны спявалі ўжо летнія песні, бо, па народных павер'ях, з Ушэсця пачынаецца лета.
Анатоль Кляшчук.
Фота аўтара.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
Ідэнтычнасць праз спадчыну.