Дабіраць на бюджэтныя месцы будуць аграрыяў, спартсменаў, ваенных і педагогаў
Міністэрства адукацыі аб'явіла пра дадатковы набор ва ўстановы вышэйшай адукацыі на запатрабаваныя эканомікай і сацыяльнай сферай спецыяльнасці. Дадатковы набор будзе весціся толькі на бюджэтныя месцы, якія засталіся вакантнымі пасля залічэння абітурыентаў асноўнага набору.
Па выніках аналізу сітуацыі з запаўненнем бюджэтных месцаў у шэрагу ВНУ быў вызначаны пералік спецыяльнасцяў, куды змогуць паступаць абітурыенты, якія не прайшлі па конкурсе на бюджэтныя месцы падчас першай, асноўнай «хвалі» залічэння.
Да такіх спецыяльнасцяў аднесены: «Пачатковая адукацыя», «Матэматыка і інфарматыка», «Фізіка і інфарматыка», «Прафесійнае навучанне», «Матэматыка» (кірунак «Навукова-педагагічная дзейнасць»), «Фізіка» (навукова-педагагічная дзейнасць), «Прыкладная матэматыка» (навукова-педагагічная дзейнасць), «Прыродаахоўная дзейнасць» (экалагічны маніторынг), «Абсталяванне», «Транспарт», «Металургія» , «Энергетыка», «Лясная прамысловасць», «Хімічная прамысловасць», «Харчовая прамысловасць», «Лёгкая прамысловасць», «Аўтаматызацыя», «Землеўпарадкаванне, геадэзія, картаграфія і тапаграфія», «Ахова навакольнага асяроддзя», «Будаўніцтва», «Лясная гаспадарка і садова-паркавае будаўніцтва», «Забеспячэнне якасці» і «Музычнае мастацтва».
Прэтэндаваць на вакантныя месцы змогуць абітурыенты, якія паступалі на іншую спецыяльнасць або ў іншую ВНУ, але не прайшлі там па конкурсе. Галоўнае, каб яны мелі на руках патрэбны набор сертыфікатаў.
Таксама да конкурсу на вакантныя месцы будуць дапушчаны і абітурыенты, якія не набралі на цэнтралізаваным тэсціраванні ўстаноўленую мінімальную колькасць балаў. Для іх мінімальны парог зніжаны на пяць балаў. Гэта значыць, што ў сертыфікатах па беларускай і рускай мове яны павінны мець 5 балаў і больш. Па матэматыцы, фізіцы, хіміі, і біялогіі — 10 балаў і больш. А па гісторыі Беларусі, сусветнай гісторыі найноўшага часу, грамадазнаўстве, геаграфіі, замежных мовах — 15 балаў і больш.
Яшчэ больш лаяльнае стаўленне да абітурыентаў, якіх запрашаюць заняць вакантныя бюджэтныя месцы ва ўстановах вышэйшай адукацыі, што знаходзяцца ў падпарадкаванні Міністэрства абароны, Дзяржаўнага пагранічнага камітэта Рэспублікі Беларусь, на ваенных факультэтах дзяржаўных ВНУ, у аграрных ВНУ, а таксама да будучых фізкультурнікаў і спартсменаў (кірунак «Фізічная культура і спорт»). Дадатковы набор будзе ажыццяўляцца на групу спецыяльнасцяў «Вытворчасць, захоўванне і перапрацоўка прадукцыі раслінаводства», «Жывёлагадоўля. Рыбагадоўля. Пчолагадоўля», «Сельскае будаўніцтва і ўладкаванне тэрыторый», «Меліярацыя і водная гаспадарка», «Аграінжынерыя».
Для абітурыентаў, якія будуць залічвацца ў рамках дадатковага набору на ўсе гэтыя спецыяльнасці, Міністэрства адукацыі зрабіла мінімальны парог, хутчэй, сімвалічным. Станоўчай будзе лічыцца адзнака ў сертыфікаце ЦТ у 3(!) балы. Прычым гэта датычыцца ўсіх экзаменацыйных дысцыплін цэнтралізаванага тэсціравання: рускай і беларускай мовы, матэматыкі, фізікі, хіміі, біялогіі, гісторыі Беларусі, сусветнай гісторыі найноўшага часу, грамадазнаўства, геаграфіі і замежных моў.
Тэрміны прыёму дакументаў на вакантныя бюджэтныя месцы на ваенныя спецыяльнасці — з 21 па 25 ліпеня, у «творчых» ВНУ — 27-28 ліпеня, ва ўсіх астатніх ВНУ — з 23 па 28 ліпеня.
Надзея НІКАЛАЕВА.м
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.