альбо Крок карэспандэнта «ЧЗ» да сельскагаспадарчага трыумфу
Чым заняць сябе летам? Для многіх студэнтаў гэтае пытанне застаецца актуальным на працягу двух месяцаў адпачынку ад навучання. Але, калі верыць славутаму фізіёлагу і Нобелеўскаму лаўрэату Паўлаву, лепшы адпачынак — перамена віду дзейнасці. З ім пагаджаюцца і студэнты БДУ: сёлета штаб працоўных спраў БРСМ універсітэта арганізаваў 12 студэнцкіх атрадаў, якія працуюць у самых розных установах краіны. Да 25 жніўня студэнты будуць выхавальнікамі, касірамі, прадаўцамі латарэйных білетаў... Карэспандэнт «Чырвонкі» вырашыў на ўласнай скуры адчуць, як гэта — працаваць замест адпачынку, і правёў адзін дзень разам з сельскагаспадарчым студатрадам, што працаваў у РУП «Шчомысліца» пад Мінскам.
24-4
Прадпрыемства «Шчомысліца», што знаходзіцца ў аднайменнай вёсцы пад Мінскам, было створана ў 1965 годзе. Галоўны від дзейнасці — вырошчванне раслін, якія пасля выкарыстоўваюцца для азелянення і ў ландшафтным дызайне. Фактычна гэта адзін вялікі сад з дэкаратыўнымі дрэвамі, кустамі і кветкамі.
Студэнцкі атрад, што працуе ў Шчомысліцы, звычайна пачынае сваю работу а 7 гадзіне раніцы, бо працаваць пад адкрытым небам у спёку не толькі цяжка, але і небяспечна. Сюды з'язджаюцца студэнты розных спецыяльнасцяў і курсаў.
— У студатрады прыходзяць працаваць па самых розных прычынах, — расказвае намеснік сакратара пярвічнай арганізацыі БРСМ БДУ Марыя ПАЎЛОВІЧ, якая ў свой час таксама працавала ў Шчомысліцы. — У першую чаргу — з-за патрэбы ў жыллі. А ўдзельнікі студатрадаў маюць прэферэнцыі пры засяленні ў студэнцкія інтэрнаты. На перыяд працы ўсе таксама жывуць у інтэрнаце. Некаторыя застаюцца ў Мінску па іншай прычыне, а ў студатрад ідуць, каб не здымаць летам кватэру. Раніцай працуюць тут, а ў другой палове дня едуць на практыку. Акрамя таго, гаспадарка выплочвае студэнтам заробак, няхай і невялікі.
Тэатр пачынаецца з вешалкі, а праца ў студатрадзе — з пераапранання. У двары гаспадаркі знаходзіцца бытоўка, у якой студэнты мяняюць цывільнае на працоўную «ўніформу» — спартыўныя штаны і футболкі. Тут жа пакідаюць свае рэчы і прыпасы на абед.
Галоўны від працы — праполка. Ніякіх гендарных забабонаў няма — хлопцы на роўных з дзяўчатамі выдзіраюць з зямлі пустазелле, складваюць яго ў невялікія купкі. Праўда, ужо больш цяжкай працай, такой, як пагрузка травы ў прычэп трактара, займаюцца толькі прадстаўнікі моцнай паловы студатрада. З гэтага для размінкі пачынаю і я.
Работа ідзе даволі хутка, і «пасвячэнне» ў студатрадаўцы я праходжу паспяхова — рукі і адзенне змяняюць колер на цёмна-шакаладны. А спробы выцерці гэтымі рукамі лоб ад поту надаюць аналагічны колер і твару. Не ўзяць на такую працу вядомыя кожнаму дачніку баваўняныя пальчаткі — непапраўная памылка.
Далей рухаемся непасрэдна на рабочы ўчастак. Праз тры хвіліны дабіраемся да «поля бою». Грады, засеяны самымі рознымі культурамі — лічы, вялікі агарод. Здалёк усё выглядае не страшна, а вось убачаныя зблізку радкі раслін трохі пужаюць. Дзённая норма для аднаго студэнта — баразна. Даўжыня — трохі менш за сто метраў. Зрабіў — атрымліваеш «птушачку» і можаш адпачываць. Ніхто не перашкаджае стаць мясцовым «стаханаўцам», перавыканаць норму і зарабіць сабе адгул. Графік фактычна вольны — ніхто ў спіну не падганяе. Можаш расцягваць задавальненне ад праполкі хоць на цэлы дзень. Дарэчы, такія «фанаты» ёсць — парачка хлопцаў убаку ад град п'е гарбату з тэрмаса. Мне тлумачаць: за працу яны звычайна бяруцца ў другой палове дня.
24-6
Заўважыўшы маю, скажам мякка, няўпэўненасць у сваіх сілах, прапануюць пачаць з малога. Палова баразны, недаробленая папярэднікам, пераходзіць пад маю адказнасць. Апынаюся сам-насам з зялёнай масай і, узброены матыкай, раблю першы крок да сельскагаспадарчага трыумфу.
Апошні раз я палоў у глыбокім дзяцінстве. Яшчэ дашкольнікам дапамагаў бабулі ў гэтай справе з маленькай матычкай у руках. Усё звычайна сканчалася хвілін праз пятнаццаць, калі цянёк пад старой яблыняй рабіўся больш прывабным за пустазелле ў барознах. І калі першы раўнд супрацьстаяння з зялёнымі шкоднікамі быў безнадзейна прайграны, то цяпер з'яўляўся нядрэнны шанц на рэванш...
Найвялікшай праблемай на першым этапе для мяне стала адрозніць... карыснае ад шкоднага. Распазнаць патрэбную расліну, якой я пакіну жыццё, атрымалася не адразу. Ды і пустазелля ў маёй баразне было значна больш, чым спірэі японскай, якую трэба было пакідаць. Па некалькі хвілін прыглядаючыся да кожнай сцяблінкі, я пачаў свой рух наперад, але раптам, азадачаны, спыніўся.
Летась на гэтым участку расла бульба, і дзе-нідзе ўзышлі новыя кусцікі. Упершыню ў жыцці прыйшлося ўбачыць гэтую культуру ў ролі пустазелля. Не схлушу, сказаўшы, што сэрца беларуса аблівалася крывёю, калі выдзіраў яе з глебы, і на паверхню траплялі маленькія бульбінкі.
За паўгадзіны працы я трохі прызвычаіўся і рухаўся наперад ужо больш упэўнена. Праўда, адбіваць зямлі паклоны з кожным разам станавілася ўсё цяжэй і цяжэй. Зусім жа расчараваў і першы позірк назад. За ўвесь гэты час я аддаліўся ад пачатку баразны трохі больш, чым на метр. А дзяўчаты, што пачыналі разам са мной, аддаляліся вельмі хутка.
Яшчэ прыкладна праз гадзіну змаганняў з вядомымі і невядомымі раслінамі, большая частка з якіх упіралася і пакідаць наседжанае месца не планавала, стала зразумела, што рэваншу можа і не атрымацца. Спіна ныла ўсё болей, кучкі пустазелля вырасталі да памеру стагоў, а руху наперад амаль не было. Ішлі гадзіны...
Нарэшце маё сапенне і корпанне было заўважана — з другога канца баразны ў мой бок пачала рухацца на дапамогу дзяўчына, што ўжо зрабіла сваю «норму». Колькі хвілін — і мы сыходзімся ў адной кропцы. Мне застаецца толькі з палёгкай уздыхнуць.
— Я з Нясвіжа, вучуся на трэцім курсе хімфака, — распавядае мая выратавальніца Юля БЯЗУШКА. — Праца ў студатрадзе для мяне — добрая магчымасць заслужыць месца ў інтэрнаце. Здымаць кватэру ў Мінску цяпер вельмі дорага, не хочацца браць грошы на гэта ў бацькоў. А новы інтэрнат, у якім мы жывем, па камфартабельнасці мала ў чым саступае здымнай жылплошчы. Раней мне даводзілася дапамагаць родным з праполкай, таму гэтая праца для мяне не такая ўжо і цяжкая. Адпрацоўваеш менш за месяц і эканоміш немалыя грошы, чаму б не? Я думаю, добра, што ёсць такая магчымасць.
...Амаль задаволены, рухаюся да аўтобуснага прыпынку ў Шчомысліцы. Няхай рэванш і не зусім атрымаўся, але любая практыка ідзе на карысць. Тым больш для студэнтаў — у якасці «перамены віду дзейнасці» ды яшчэ і з гарантаваным дахам над галавой на год... Акрамя таго, новыя знаёмствы, свежае паветра — па-мойму, выбар у такой сітуацыі зрабіць проста.
Яраслаў ЛЫСКАВЕЦ.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.