У водпуску ў вёсцы хочацца як мага больш быць на дварэ, на свежым паветры — хоць на сонцы, хоць у цяньку. Таму жыццё навакольных, зразумела, увесь час навідавоку. І ў каторы ўжо раз назіраю знаёмую карціну, калі над плотам па нашым завулку «праплывае» дзіцячая галоўка. Гэта на плячах у бацькі — суседа — едзе дадому яго малодшая дачка (як дагэтуль яшчэ двое дзяцей). Чутны няспешныя размовы, цярплівае тлумачэнне ўсяго, што цікавіць дапытлівы дзіцячы розум. Кожны раз, калі бачу гэтыя «пакатушкі», чамусьці прыгадваю вынікі даследавання, праведзенага сярод студэнтаў сталічных універсітэтаў на тэму гендарнай роўнасці (насамрэч у больш шырокім сэнсе праблема такіх стэрэатыпаў датычыла не толькі моладзі, а ўсяго грамадства ў цэлым).
Сацыёлагі заўважылі, што на працягу многіх гадоў у нашай краіне ідзе паступовае пераасэнсаванне ступені ўдзелу мужчынскай часткі насельніцтва ў вядзенні хатняй гаспадаркі. Не без цяжкасцяў, але гэты працэс мае нарастальную тэндэнцыю. Удзел мужчын у хатніх справах успрымаецца як нармальная з'ява большасцю студэнтаў і студэнтак, аднак амаль 30 працэнтаў мужчын і 12 працэнтаў жанчын лічаць, што мужчына не павінен займацца хатнімі справамі. І вось далей — увага! Разам з тым большасць студэнтаў (86 працэнтаў) і студэнтак (92 працэнты) лічаць, што мужчыны ўмеюць добра клапаціцца пра дзяцей. Як для колішняга хлопчыка, прадстаўніка пакалення, выхаванага з маленства найперш на асабістым прыкладзе бацькі — нямая сцэна, заслона. Ці, гаворачы словамі аднаго з герояў вядомай савецкай кінастужкі «Вялікі перапынак»: «Ходзіш-ходзіш у школу, ходзіш-ходзіш, і тут — бац! — другая змена!»
Гаворка ў даследаванні ідзе пра пакаленне 1990-х гадоў, калі, каб выжыць у складаных эканамічных умовах, бацькі (і найперш, мабыць, таты) надавалі мала ўвагі выхаванню дзяцей, больш дбаючы пра матэрыяльнае забеспячэнне сям'і. А ўсе мы ведаем простую ісціну пра тое, што дзеці, стаўшы дарослымі, капіруюць паводзіны сваіх бацькоў. У тым сэнсе, што ўсё залежыць ад сям'і, ад выхавання. (Выхаваны слесар Іваноў кожны раз, калі трапляў па пальцы малатком, нязменна гаварыў: «Бач ты!»). Зноў жа не сакрэт, што калі бацька хадзіў «налева» або сужэнцы скасоўвалі шлюб, хутчэй за ўсё, гэтым жа шляхам пойдзе і сын. Зноў жа ў пацвярджэнне анекдот. «Бацька, а прыстойная дзяўчына — гэта як?» — «Прыстойная дзяўчына, сынок, гэта калі толькі ты адзін ведаеш, як непрыстойна яна можа сябе паводзіць!»
Не, ніхто не аспрэчвае ролю маці ў выхаванні. У памянёнага суседа з гэтым усё ў парадку: калі дзіця едзе на шыі ў бацькі, яна ідзе побач з сужэнцам, нароўні ўдзельнічаючы ў працэсе выхавання і наталення прагі пазнання свету малечай. Тут галоўнае, каб метады супадалі. Як у чарговым жарце. Муж кажа, звяртаючыся да жонкі: «А ўсё ж добра, што мы дазволілі дачцэ зрабіць сабе пірсінг. Цяпер за кольца ў носе яе стала нашмат лягчэй падымаць у школу». Мы ў нашым кантэксце гаворым менавіта пра бацькоўскі складнік. У традыцыйным сэнсе, прашу заўважыць. А то памятаеце, што ў амерыканца-інтэрна Філа з камедыйнага серыяла «Інтэрны» бацькамі былі тата і... яшчэ адзін тата? Нам гэтага не зразумець, што і пацвярджалі ўвесь час сваімі кпінамі калегі Філа — інтэрны Раманенка і Лабанаў. Зрэшты, калі гаварыць пра рэальнасць, а не пра фільмы, тут апошнім часам таксама не ўсё добра. Перамога Канчыты Вурст на сёлетнім «Еўрабачанні» таму сведчанне. Гэта мужчына ці ўсё ж жанчына? Які пачатак у выхаванні магчымых нашчадкаў возьме верх у гэтага «барадатага твару Еўропы»? (Хлопчык Вова, які ўсё дзяцінства правёў з бацькам на рыбалцы, так і не навучыўся размаўляць...)
А ў маіх равеснікаў з маленства правіла было адно: бацька ўсяму навучыць. Нездарма ж Сямён Слепакоў, выступаючы яшчэ ў камандзе КВЗ, так пра тое і сказаў: «Папа знает, папа пожил — стих на музыку положил». Жарты жартамі, але менавіта праз іх асабісты досвед, праз іх падказкі і дапамогу мы спасцігалі свет. Калі, напрыклад, вучыліся ездзіць на веласіпедзе або трымаць у руках вуду, а пазней — пілу ці сякеру. У падлеткавым узросце роля бацькі ўвогуле — ого-го! Узровень — бог! «Мама, можна я пайду пагуляю?» — «З кім? Як завуць? Колькі гадоў? Дзе вучыцца? Чым займаецца? Хто бацькі?» — «Зразумела... Тата, можна я пайду пагуляю?» — «Ідзі!» Дарэчы, у працяг тэмы: ведаеце, навошта дзіцяці двое бацькоў? Пакуль маці псіхуе, бацька — нармальны, а калі ўжо яго «накрыла» па прычыне дзіцячых «закідонаў», дык маці тым часам «адпусціла».
Не, зараз таты таксама многаму вучаць сваіх дзяцей. Галоўнае, каб не атрымалася, як у тым жарце: выхаванне — працэс сур'ёзны. Таму часцей ім займаецца камп'ютар. А нейкі пасталеўшы нашчадак і сам тату можа навучыць. Студэнт кажа сваім бацькам: «Усё, мне надакучылі вашы ўшчуванні. Я дарослы чалавек, хачу свабоды. Хачу піць піва, сустракацца з дзяўчатамі, позна гуляць. Я сыходжу з дома. І не спыняйце мяне!» Ён накіроўваецца да дзвярэй, бацька кідаецца за ім. «Тата, я ж прасіў не затрымліваць мяне!» — «Сынок, вазьмі мяне з сабой!»
...Сучасныя таты без праблем могуць пайсці ў водпуск па доглядзе дзіцяці. У наш час малады бацька з каляскай на прагулцы — звыклая з'ява. А ўсё чаму? Таму, што — у імя айца, і сына, і добрага выхавання. Папруга! Жартую, вядома. Насамрэч, таму, што мужчыны сапраўды ўмеюць добра клапаціцца пра дзяцей.
Кастусь ХАЦЕЛАЎ-ЗМАГЕЛАЎ.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.