Нават некалькіх імгненняў, калі дзіця сам-насам з навакольным светам, дастаткова, каб здарылася непапраўнае
На нашых мясцовых могілках, акурат «у галавах» маіх бацькі і бабулі, ляжыць хлопчык Саша. Пад маленькім крыжыкам з фота, на якім пазірае ўсмешлівы гарэзлівы тварык. Кожны раз, наведваючы родных, я ў нейкі момант пачынаю ўглядацца ў яго, спрабуючы ўявіць, якім бы гэты навечна чатырохгадовы хлапчук стаў цяпер, кім бы працаваў, ці былі б у яго дзеці: ён усяго на чатыры гады маладзейшы за мяне. Пэўна, быў бы ўжо мажным мужчынам, апорай сваёй ужо цяпер зусім нямоглай маці, дапамогай і сябрам братам і сястры...
Я памятаю, як Саша загінуў. Гэта было ў першыя дні летніх канікул, калі ўся вясковая дзятва гуляла на вуліцы. Конь, запрэжаны ў воз, які нёсся шалёным намётам па нашай ціхай спакойнай вуліцы, не разбіраючы дарогі, выскачыў нечакана, нібы з пекла. (Аказалася, на яго напалі ці то авадні, ці то пчолы, і жывёліна проста звар'яцела, абарвала прывязь і панеслася наўздагад, шукаючы паратунку). Вясковыя дзеці, прывучаныя з маленства, што конь — гэта не толькі дапамога, але і небяспека, мы кінуліся ўроссып на ўзбочыны вуліцы. Саша аказаўся на іншым баку, чым сястра з братам, і вырашыў да іх перабегчы. Не паспеў — трапіў якраз пад капыты ашалелай жывёлы. Цяжкі капыт з лёгкасцю праламаў чатырохгадоваму дзіцяці галаву.
Па Сашу галасіла ўся вёска, бацькі над маленькай дамавінай пачарнелі ад гора. Іх не было побач з дзецьмі ў той трагічны момант, як не было і ўвогуле нікога са старэйшых, хто мог бы спыніць таго каня. Усе былі на працы, дзеці былі самі па сабе: ні дзіцячага сада, ні дзіцячага лагера ў школе (да якой да таго ж тры кіламетры) тады не было. На месцы хлопчыка Сашы мог быць любы з нашай стракатай дзіцячай кампаніі. Летам мы раслі фактычна як трава пры дарозе: кінутыя ў лепшым выпадку на глухаватых і падслепаватых бабуль-прабабуль, ад якіх з лёгкасцю збягалі ў пошуках прыгод, ці на ненашмат старэйшых сясцёр-братоў, якія і самі супроць прыгод нічога не мелі. Успамінаючы сёння гэтыя самыя прыгоды, разумееш, што анёл-ахоўнік быў тады пільнай нянькай, і толькі дзякуючы яму мы перажылі тое сваё небяспечнае дзяцінства...
Мінула больш за трыццаць гадоў, шмат што змянілася, над маленькімі грамадзянамі краіны гэта самая краіна, без перабольшвання, калоціцца: каб усё было бяспечна, каб кожны быў заняты і дагледжаны, каб бацькі маглі спакойна займацца сваёй справай, не хвалюючыся, ці не ўлезла дзіця ў якую шкоду. Летнікі, групы падоўжанага дня, гурткі, клубы па інтарэсах — нават у вясковых невялікіх школах гэтыя паняцці не выглядаюць фантастычнымі. Працуе (і эфектыўна працуе!) цэлая сістэма...
... Але чаму тады на кладах штогод з'яўляюцца свежыя невялікія магілкі з усмешлівымі дзіцячымі тварыкамі на помніках? За апошнія пяць дзён іх у нашай невялікай краіне — як мінімум пяць. Як засведчыла б абыякавая статыстыка — у сярэднім па адным смяротным выпадку за дзень. Маю на ўвазе, калі здарылася не непазбежнае, а недарэчна-выпадковае. У Пінскім раёне шасцігадовы хлопчык перабягаў вуліцу перад грузавіком. Вадзіцель, убачыўшы дзіця, ударыў па тармазах, але гружаная цяжкая машына кацілася яшчэ некалькі метраў і пераехала кволую фігурку. Перад гэтым у Пінску дзесяцігадовая дзяўчынка патанула, ратуючы сяброўку. Купаліся яны ў небяспечным і не прыдатным да купання месцы, дабрацца да якога ўвогуле можна толькі на лодцы або аб'ехаўшы 20 кіламетраў. Дзяўчынку да месца яе гібелі прывёз ў чоўне... уласны дзядуля. У Маларыцкім раёне дванаццацігадовы хлопчык прыехаў з бацькамі купацца (зноў жа ў месцы, дзе рабіць гэта забаронена) і выратаваць яго не ўдалося. У Рагачове ў Дняпры (а хто быў там, ведае, што рака там шырокая, уся «пабітая» вірамі) патануў васьмігадовы хлапчук: ён наогул купаўся без дарослых. 12-гадовую дзяўчынку, якая прыехала паплюхацца ў запоўненым вадой кар'еры з сяброўкамі, вадалазы паднялі з глыбіні 13(!) метраў... Гэты жалобны і жудасны спіс мог бы папоўніцца яшчэ двума выпадкамі: у Гомелі з акна трэцяга паверха выпаў двухгадовы малы, а ў Гомельскім раёне з другога паверха — шасцігадовая дзяўчынка. Дзякуй Богу, дзеці не загінулі, але моцна пакалечыліся, і ад аднаго толькі ўяўлення, як балюча цяпер гэтым маленькім чалавечкам, нават у спёку працінае холад.
Як балюча іх бацькам, родным тых, што загінулі, — страшна нават думаць. Пэўна, стукае ў скроні горкая праўда, якая цяпер з імі будзе назаўжды: не дагледзелі, не засцераглі, пакінулі (няхай сабе і на некалькі хвілін) адных... Нашы дзеці па-ранейшаму — і сёння ў большай ступені, чым трыццаць гадоў назад, менавіта па віне сваіх самых блізкіх дарослых людзей — як трава пры дарозе. Нават некалькі імгненняў, калі яны сам-насам з навакольным светам — і здараецца непапраўнае. Адзіная ў жыцці сітуацыя, якую ніяк не зменіш...
Колькі яшчэ павінна з'явіцца новых маленькіх магіл, каб мы гэта зразумелі? Не чакаючы, пакуль бяда прытупае за дзіцячай труной у хату...
Алена ЛЯЎКОВІЧ.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».