Беларусь і Туркменістан сябруюць культурамі
Дні культуры Туркменістана ў Рэспубліцы Беларусь адкрыліся ў Белдзяржфілармоніі канцэртнай праграмай. Але ёй папярэднічала выкананне гімнаў дзвюх краін. Што цікава: туркмены, якія былі ў зале, слухалі іх, паклаўшы руку на сэрца. Вось жа павага да традыцый, да гаспадароў, падумалася ў той момант. А потым — цягам канцэрта — думка пра традыцыі і павагу да іх толькі ўмацавалася — з пераносам у наш, беларускі бок, з думкамі пра сваю, беларускую культуру: іншыя нас цікавяць яшчэ і тым, што даюць магчымасць зразумець, што такога адметнага (і каштоўнага) ёсць у нас.
Дэлегацыя Туркменістана прадумала, якую праграму весці ў Беларусь: цудоўнае выкананне Шапэна на фартэпіяна прадэманстравала высокі ўзровень сучаснай прафесійнай культуры гэтай краіны. Эстрадныя песні дыскатэчнага гучання паказалі, што развіваецца напрамак моладзевай музыкі, прычым туркменскія артысты ў модных строях (хлопцы і дзяўчаты) спявалі песні ў сучасных рытмах на роднай мове. Але ўсё ж, калі ёсць магчымасць пазнаёміцца з культурай іншых народаў, то больш за ўсё кранае тое, чаго няма ў нас. Нездарма ж традыцыйная песня «Напаі мяне» з вялікім размоўным пралогам па-туркменску выклікала ў зале сярод беларусаў ці не найбольшыя авацыі. У іншай культуры цікавае тое, што ёсць толькі ў ёй і больш нідзе. Нездарма на адкрыцці Дзён культуры Туркменістана ў Беларусі Надзвычайны і Паўнамоцны Пасол Туркменістана ў Беларусі Мурад Язбярдзіеў падкрэсліў:
— Базай любых цывілізаваных чалавечых адносін з'яўляецца культура. Таму кіраўнікі нашых дзяржаў падкрэсліваюць важнасць культурных кантактаў. У выніку правядзенне такіх мерапрыемстваў стала традыцыйным і ўзаемным... У цяперашнім глабалізаваным свеце знаёмства з культурнымі традыцыямі адно аднаго спрыяе яшчэ большаму збліжэнню нашых краін і іх культурнаму ўзбагачэнню. У Туркменістане развіццё культуры і мастацтваў з'яўляецца адным з дзяржаўных прыярытэтаў, які ўплывае на дасягненні ў эканоміцы і сацыяльнай сферы. Вядома, што культура ўплывае на адукацыю і эстэтычнае выхаванне людзей, то бок на чалавечы фактар. Таму прыемна адзначыць, што ў сістэме адукацыі Беларусі цяпер навучаецца больш за 9000 грамадзян Туркменістана. Патэнцыял культурнага ўзаемадзеяння нашых народаў вялізны. І ў гэтыя дні адбудуцца цікавыя сустрэчы, што стане глебай для развіцця кантактаў і новых культурных праектаў.
Насамрэч культурныя стасункі з Туркменістанам у нас сапраўды плённыя — і не скажаш, што вялікая адлегласць паміж нашымі краінамі. У нас, у Беларусі, выходзяць кнігі, напрыклад, зборнік твораў сучасных пісьменнікаў Беларусі і Туркменістана «Сугучча сэрцаў», выходзяць творы класіка туркменскай літаратуры, паэта (а для яго народа — нават прарока) Махтумкулі ў перакладзе на беларускую мову нашых творцаў. Ёсць шмат іншых праектаў, якія ажыццяўляюцца на дзяржаўным узроўні. Напрыклад, Дні культуры Туркменістана ў Беларусі адбыліся ў 2010 годзе, у 2012-м быў візіт у адказ беларускай дэлегацыі з Днямі культуры. Былі Дні беларускага кіно ў Туркменістане. І зноў — госці да нас. І што тут гадаць наконт сакрэту нашай асаблівай блізкасці, нягледзячы на геаграфічную адлегласць?..
Міністр культуры Рэспублікі Беларусь Барыс Святлоў адзначыў:
— Дні культуры падмацоўваюць стасункі паміж краінамі і іх кіраўнікамі. Мы выконваем асаблівую місію па ўмацаванні дружбы паміж народамі Беларусі і Туркменістана. Беларускі і туркменскі народы валодаюць унікальным гістарычным вопытам і багатымі культурнымі традыцыямі, частка з якіх сфарміравана іх сумеснымі намаганнямі. Знаёмства з нацыянальнай спадчынай адно аднаго здольнае яшчэ больш узбагаціць нашы краіны. Адметна, што цяперашняе мерапрыемства праводзіцца ў год 70-годдзя вызвалення Беларусі. Нас звязвае агульная памяць: у мемарыяльнай зале Перамогі музея гісторыі Вялікай Айчыннай вайны РБ ушанаваныя імёны туркменаў, якія атрымалі званні Герояў Савецкага саюза за мужнасць і гераізм, праяўленыя ў баях на беларускай зямлі.
Гісторыя — цікавая з'ява. Мы гаворым пра адзіную, але пры гэтым маем на ўвазе, што кожны народ праходзіў усё ж свой вялікі шлях, няпросты, але адметны менавіта з-за тых умоў, у якіх існаваў. Пра адметнасць туркменскай культуры ў яе гістарычным развіцці можна паразважаць, наведаўшы выставу з фондаў Марыйскага велаяцкага гісторыка-краязнаўчага музея, якая размясцілася ў Нацыянальным гістарычным музеі Беларусі.
Ларыса ЦІМОШЫК.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.