БАТЭ ў першым паядынку трэцяга кваліфікацыйнага раўнда Лігі чэмпіёнаў саступіў венгерскаму «Дэбрэцэну».
Нягледзячы на скептычны настрой большасці айчынных балельшчыкаў, беларускі клуб пачаў гасцявы паядынак з бесперапынных атак на вароты сапернікаў. Барысаўчане дзейнічалі вельмі хутка і на працягу першых 15‑ці хвілін упэўнена кантралявалі ход гульні, адначасова ствараючы небяспечныя моманты каля чужых варот. Праўда, у завяршальнай стадыі беларускім футбалістам нечага не хапала. Магчыма, адбілася адсутнасць у стартавым складзе Сяргея Крыўца і Аляксандра Паўлава — лепшых крэатыўных гульцоў БАТЭ.
Бліжэй да канца першага тайма «Дэбрэцэн» выраўняў сітуацыю і таксама пачаў пагражаць варотам беларусаў. Аднак на перапынак каманды пайшлі, не адкрыўшы лік.
У другой палове ініцыятыва ў большай ступені належала гаспадарам. Складвалася адчуванне, што барысаўчане проста «набегаліся». Свае кіламетры па полі яны працягвалі намотваць, а вось на асэнсаваныя атакі хлопцаў дакладна не хапала. БАТЭ збіўся на пастаянныя навесы з флангаў, якія старанна падпільноўвалі абаронцы і галкіпер «Дэбрэцэна». На 56‑й хвіліне варатар барысаўчан Сяргей Чэрнік неахайна згуляў рукамі ў падзенні, выпраўляючы памылку ўласных абаронцаў, і збіў чарнаскурага нападаючага венграў Ібраіма Сідзібэ. Арбітр прызначыў у вароты БАТЭ пенальці, які ўпэўнена рэалізаваў сам Сідзібэ.
Пасля прапушчанага гола трэнер барысаўчан Аляксандр Ермаковіч тэрмінова выпусціў на поле Крыўца і Паўлава. Забіты ў гасцях гол значна спрасціў бы беларусам задачу на гульню ў адказ. Але да фінальнага свістка БАТЭ так і не здолеў арганізаваць стапрацэнтную галявую магчымасць ля варот «Дэбрэцэна». Мала таго, барысаўчане маглі прапусціць болей. Некалькі разоў нападаючыя венгерскага клуба стваралі вельмі перспектыўныя контратакі, якія павінны былі завяршацца галамі ў вароты Чэрніка. Але свае магчымасці забіць «з гульні» венгры выкарысталі неахайна.
Вынік сустрэчы на пасляматчавай прэс-канферэнцыі пракаментаваў галоўны трэнер БАТЭ Аляксандр ЕРМАКОВІЧ:
— Нам спадабалася ўсё, акрамя ліку на табло. Як мы і чакалі, матч аказаўся вельмі складаным, напружаным. Шкада, што не атрымалася рэалізаваць моманты, якія мы мелі. Іх у такіх паядынках шмат стварыць не даюць. У любым выпадку ёсць яшчэ сустрэча ў адказ, ёсць час, каб падумаць, выправіць памылкі, якія сёння былі. Думаю, гульня ў Барысаве таксама атрымаецца цяжкай. У гэтым супрацьстаянні не ўсё ясна. І мы пастараемся выбрацца з няпростай сітуацыі.
БАТЭ прайграў, але пакінуў за сабой шанц на агульны поспех. У Барысаве нашым футбалістам абавязкова трэба будзе забіваць і не даваць адзначыцца венграм. Пасля першага раўнда супрацьстаяння гэтая задача выглядае даволі цяжкай — «Дэбрэцэн» добра ўмее абараняцца і заўжды гатовы выкарыстаць магчымасць для контратакі. У БАТЭ, у сваю чаргу, з пазіцыйным нападзеннем пакуль што ёсць пэўныя праблемы.
Пажадаем нашым хлопцам удачы падчас гульні ў адказ на «Барысаў-Арэне»! І будзем спадзявацца, што еўракубкавая восень нарэшце вернецца ў Беларусь.
Яраслаў ЛЫСКАВЕЦ.
Уражанні беларускіх і венгерскіх заўзятараў пасля гульні:
sіrenіtі7, by.trіbuna.com:
— Пра гульню БАТЭ вельмі трапна сказаў Эйнштэйн: «Самае вялікае глупства — гэта рабіць тое ж самае і спадзявацца на іншы вынік». Два гады барысаўчане кажуць: «Будзем працаваць, аналізаваць і рабіць высновы»… Ну нельга прывіваць камандзе ўзроўню БАТЭ качанне мяча. Браку шмат, гэта ж не «Барселона». А цяпер так прывыклі качаць мяч, што ўвогуле няма абвастральных праходаў і перадач у штрафную… Трэба гуляць, як раней з «Іроні», дагэтуль памятаю той матч.
RUN_BY, by.trіbuna.com:
— Надта шмат незразумелых навесаў! Столькі атак добрых завяршалася падачай з фланга. Неставала добрай перадачы. Хуткі праход да штрафной саперніка — і ўсё! Крыўца, відавочна, не хапала, ды і Паўлава… Ліхтаровіча, магчыма… Гульца з добрым прыёмам, абвастральным пасам. Ды і ўсе стандарты БАТЭ змарнаваў — то занадта мудрагеліста, то спяшаюцца незразумела куды! Але хлопцы стараліся. Хагуш спадабаўся сваім зарадам на барацьбу. Каманды роўныя. Правільных рашэнняў Ермаковічу па стартавым складзе, а гульцам удачы!
nabukodonozor, csakfocі.hu:
— Гэты БАТЭ проста ніякі, у іх было ўсяго два нармальныя праходы ў пачатку гульні. Больш нічога да канца сустрэчы яны не зрабілі. Беларуская каманда за два гады значна аслабела, наш «Локі» быў відавочна мацнейшы. У «Дэбрэцэна» больш шанцаў, павінны выкарыстоўваць іх і як мінімум выходзіць у Лігу Еўропы.
LowCostCowLost, csakfocі.hu:
— Шчыра кажучы, не бачу нічога складанага для БАТЭ ў тым, каб забіць «Дэбрэцэну» два галы ў сябе на стадыёне. Праблемай для беларусаў можа стаць толькі тое, што яны самі будуць гуляць, як сёння — без сапраўды сур'ёзнага ціску. БАТЭ быў моцным толькі ў стартавыя хвіліны, якія сталі для нашых хлопцаў цяжкімі псіхалагічна. Спадзяюся, нашы хлопцы добра перанясуць падарожжа, выйдуць на поле ў Барысаве з яснай галавой і атрымаюць рэванш за паражэнне двухгадовай даўнасці.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.