Першы тур рэдакцыйнай віктарыны «Звязда» як падручнік» прайшоў напрыканцы чэрвеня. Сёння ж стартуе працяг захапляльнай вандроўкі па старонках гісторыі газеты — і краіны. Самыя памятлівыя, уважлівыя і дасведчаныя ўдзельнікі віктарыны будуць адзначаны прызамі, дый наогул усе, хто далучыцца да гістарычнай вандроўкі, спадзяёмся, зробяць для сябе шэраг цікавых адкрыццяў.
Адказы на пытанні з пазнакай «Віктарына» прымаюцца на паштовы (220013, г. Мінск, вул. Б. Хмяльніцкага, 10А) і электронны (іnfо@zvуаzdа.mіnsk.bу) адрас рэдакцыі да 7 жніўня ўключна. І нагадваем — якасць, г.зн. правільныя і поўныя адказы, можа аказацца куды важнейшай за хуткасць!
1. «Звязда» была першай каляровай газетай у гісторыі беларускай журналістыкі — яшчэ за паўстагоддзя да масавага пераходу на колер. Калі дакладна выйшаў спецыяльны святочны нумар «Звязды»?
— 9 мая 1945 года
— 3 ліпеня 1945 года
— 9 мая 1950 года
— 31 снежня 1944 года
2. «Суджана, стаўлена пад перакладзіны,
Сечана, палена, а не аддадзена,
Не парастрачана і не раскрадзена,
Рупна ў падмуркі на золку пакладзена
Роднае слова».
Паэт, якому належаць гэтыя радкі, пасля дэмабілізацыі з фронту ў 1944 годзе працаваў у «Звяздзе» загадчыкам аддзела культуры, а пазней узначальваў кінастудыю «Беларусьфільм». Сучасныя школьнікі, праўда, знаёмяцца па падручніку не з яго вершамі, а з аповесцю пра «добрага хлопца Дзіка». Як яго імя (прымаецца як пашпартнае, так і псеўданім, пад якім паэт стаў вядомым у беларускай літаратуры)?
3. Колькі каштаваў нумар «Звязды» дваццаць гадоў таму, напрыканцы 1994 года, і якімі ўласна беларускімі купюрамі можна было набраць неабходную суму без здачы?
— 150 рублёў
— 80 рублёў
— 200 рублёў
— 120 рублёў
4. Фірмовы цягнік «Мінск — Санкт-Пецярбург» №51/52 ужо некалькі дзесяцігоддзяў носіць імя «Звязды». Колькі ён праводзіць у дарозе з беларускай сталіцы ў паўночную расійскую?
— 16 гадзін
— 8 гадзін
— 13 гадзін
— 12 гадзін
5. 11 лютага 1972 года «Звязда» пісала: «З кожным днём у крамах нашай рэспублікі можна ўбачыць усё больш і больш прадукцыі з маркай Мінскага трактарнага завода. Не так даўно з'явіўся ў продажы набор для гаспадынь. У прыгожа аформленай скрыні — неабходныя прадметы дамашняга ўжывання... Некалькі тысяч іх было адразу ж распрададзена». Адгадайце лагічным шляхам, што з ніжэйпералічанага ўваходзіла ў «набор для гаспадынь»?
— качалка і патэльня,
— машынка для закатак, нож для кансерваў і накрыўкі для слоікаў,
— мясарубка, бляха і формы для выпечкі,
— металічныя выбівалка, швабра і ражок для абутку.
6. Гэты сусветна вядомы мемарыял («Воін-вызваліцель» у Берлінскім Трэптаў-парку — савецкі салдат ратуе нямецкую дзяўчынку) — звязваюць з імёнамі некалькіх савецкіх салдат, у тым ліку і беларуса, ураджэнца Лагойшчыны. Помнік бачылі многія, а вось імя яго гераічнага прататыпа, занатаванае пісьменнікам Барысам Палявым, ведаюць далёка не ўсе.
У многім дзякуючы публікацыям «Звязды» ў Мінску ў кастрычніку 1997 года з'явілася вуліца, якая носіць імя нашага земляка. Узгадайце яго і вы.
7. У 70—80-я гады мінулага стагоддзя, паводле ўспамінаў былога рэдактара «Звязды» Аркадзя Тоўсціка, была распаўсюджана практыка шэфства над прадпрыемствамі. Якое прадпрыемства па выпуску камбайна «курыравала» «Звязда»?
— «МАЗ»
— «Гомсельмаш»
— «Бабруйскаграмаш» (тады Бабруйскі завод машын для ўнясення ўгнаенняў)
— «БелАЗ»
8. Вытрымка з публікацыі ў «Звяздзе»: «Першыя ўзоры новай школьнай формы для дзяўчат выпушчаны на Гродзенскай швейнай фабрыцы. У камплект формы для вучаніц малодшага ўзросту ўваходзяць жакет, камізэлька, сарафан і блузка. Такі набор дазваляе выкарыстоўваць форму ў залежнасці ад пары года і надвор'я. У камплекце для вучаніц 9-10 класаў сарафан заменены спадніцай. Усе вырабы шыюцца з сіняватай з блакітам ваўнянай тканіны, а блузка — з папліну шэра-блакітнага ці белага колераў». Узгадаўшы перыпетыі школьнай формы ў СССР, паспрабуйце адказаць, у якім годзе была надрукавана гэта заметка?
— 1950 год
— 1965 год
— 1972 год
— 1984 год
9. Ужо амаль 10 гадоў у сталіцы існуе праспект газеты «Звязда» — гэта перайменаваны паводле рашэння Мінскага гарадскога савета дэпутатаў (16.06.2005 г.) былы праспект газеты «Известия». Адным з самых актыўных ініцыятараў перайменавання, дарэчы, выступіў...
— пісьменнік Іван Шамякін
— былы рэдактар газеты «Звязда» Васіль Пыжкоў
— архітэктар Леанід Левін
— мастак Міхаіл Савіцкі
10. Перыядычныя выданні святкуюць не толькі круглыя даты з дня заснавання, але і круглыя лічбы выхаду. Так, паводле архіўных звестак, у 1923 годзе калектыў тагачаснай «Звязды» шырока святкаваў выхад 1500-га нумара газеты. Журналісты падлічылі, у прыватнасці, што за 6 гадоў існавання ў «Звяздзе» было змешчана 10,5 тысячы артыкулаў, 180 тысяч карэспандэнцый і 200 тысяч заметак.
А ўжо ў новым тысячагоддзі, прытым параўнальна нядаўна, «Звязда» адзначала выхад 25-тысячнага нумара. Калі ён убачыў свет?
— у жніўні 2004 года
— у сакавіку 2008 года
— у снежні 2003 года
— у кастрычніку 2010 года.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».