Пры раскопках выяўлены рэчы перыяду культуры шнуравой керамікі
Каля вёскі Дразды Стаўбцоўскага раёна, што на Міншчыне, знойдзены ўнікальныя рэчы: гліняны гаршчок, дзве сякеры — свідраваная каменная і крэмніевая шліфаваная. Сярод знаходак і наканечнікі стрэл, дрэўкі, апярэнні якіх не захаваліся. Гэтыя прадметы належаць да другой паловы ІІІ тысячагоддзя да нашай эры. Хутчэй за ўсё, прышлі да высновы спецыялісты, у пахаванні знайшла спакой душа прадстаўніка культуры шнуравой керамікі. Яго цела было спалена, а попел рассыпаны ў яме памерам два на тры метры.
Культура шнуравой керамікі — група археалагічных культур позняга неаліту і бронзавага веку Сярэдняй і Усходняй Еўропы, неаліту Паўночнай Еўропы. Агульнымі прыкметамі яе з'яўляюцца наяўнасць керамікі, на якой зроблены арнамент з дапамогай шнура ці своеасаблівымі насечкамі, якія нагадваюць адбітак шнура. Характэрныя для той пары і сякеры, выяўленыя пад Стоўбцамі. Адсюль і яшчэ адна назва гэтай культуры — культура баявых сякер.
— Гэтыя рэчы знайшлі падчас раскопак студэнты гістарычнага факультэта Белдзяржуніверсітэта, — паведаміла старшы выкладчык кафедры археалогіі і спецыяльных дысцыплін гістфака БДУ Аляксандра Зуева. Цяпер прадметы знаходзяцца на кафедры археалогіі. Тут яны будуць захоўвацца часова. Пасля іх перададуць у лабараторыю музейнай справы для фарміравання калекцыі для музея гістарычнага факультэта.
Таццяна ЛАЗОЎСКАЯ.
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.