Ператвараемся ў «віртуальных рэспандэнтаў». А што становіцца з намі — сапраўднымі?
Аб тым, які ў 18-гадовай Юлі са Смалявіцкага раёна быў прыгожы і пачуццёвы твар, сёння ведае бадай што ўся краіна. Дзяўчына, пэўна, пра гэта і марыла — каб на яе глядзелі і любаваліся сотні людзей — калі размяшчала свае найлепшыя фота ў сацыяльных сетках на сваёй старонцы. Але яна наўрад ці думала, што гэтыя здымкі пройдуць на шматлікіх сайтах і ў газетах як ілюстрацыя да страшнай навіны: «У лесапарку знойдзены астанкі, як мяркуе следства, менавіта Юліі С., якая знікла ў сярэдзіне ліпеня»...
Яна, напэўна, нават не думала, што падобнае магчыма, калі ішла позна ўвечары на спатканне з хлопцам, якога ніколі не бачыла — пазнаёмілася і знайшла з ім агульную мову ў тых жа сацыяльных сетках. Я не ведаю, якія прыгожыя словы выскоквалі ад яго на экране манітора, якімі кампліментамі ці абяцаннямі ў віртуальнай прасторы ён завабіў дзяўчыну, што яна згадзілася сустрэцца з чалавекам, якога ніколі ў жыцці не бачыла, амаль ноччу ды яшчэ ў яго на кватэры... Усё пачыналася з бяскрыўнай перапіскі, а скончылася незваротна-жудасна: пра дзяўчыну пішуць: «астанкі», яе знаёмы разам з маці пад следствам як галоўныя падазраваныя ў забойстве...
Гэты страшны выпадак (даруйце за цынізм) — максімальна яскравая ілюстрацыя таго, як моцна мы — пакаленне ад сарака (ці нават пяцідзесяці) і менш — загразлі ў віртуальным свеце. Яго Вялікасць інтэрнэт — адзіны, да каго мы звяртаемся і каму поўнасцю давяраем, няважна, пра што ідзе размова: пра інфармацыю аб паўстанні Івана Балотнікава, якую нам выдасць Вікіпедыя, або пра звесткі аб віртуальным новым знаёмым. І калі з Вікіпедыяй бяда не такая вялікая: ну, падумаеш, звесткі недакладныя, — можна сцерці пыл з папяровай энцыклапедыі (балазе, яны яшчэ ёсць і нават перавыдаюцца) і ўсё ўдакладніць, дык з чалавечымі адносінамі справа нашмат больш складаная. Бо чалавек, які ў сацыяльных сетках прадстаўляецца начытаным інтэлігентам або паспяховым бізнесменам, насам-
рэч можа аказацца пакрыўджаным на ўвесь свет маньякам або сексуальным вычварэнцам, які шукае чарговую ахвяру.
На жаль, мала хто з маладых (ды і са старэйшых) пра гэта думае. Прыклады шчаслівых знаёмстваў і шлюбаў, якія пачыналіся менавіта віртуальна, і гэтае дзівоснае пачуццё раскаванасці, калі можна не саромецца, не думаць, як ты выглядаеш, і немагчымасць знайсці час для знаёмстваў і зносін нармальных, стагоддзямі правераных — вось што цягне народ у сацыяльныя сеткі. Ах, ну яшчэ сусветны бестселер паляка Януша Вішнеўскага «Адзінота ў сеціве». Кніга-прароцтва — Вішнеўскі прыдумаў рамантычную гісторыю знаёмства і кахання менавіта ў віртуальнай прасторы тады, калі нават слова «мадэм» было ва ўсіх мовах неалагізмам. Нават сталыя «цёткі», прачытаўшы гэтую настольную кнігу ўсіх аматараў рамантычных адносін праз камп'ютар, кідаюцца адкрываць сваю старонку ў «Аднакласніках» ці «Вконтакте»...
І яно, вы ведаеце, зацягвае. Спачатку думаеш, як гэта зручна: з сябрамі, якіх не бачыў колькі гадоў, з новымі знаёмымі, якіх не бачыў (дый можаш і не пабачыць) ніколі, можна «балбатаць» і па справе, і проста так, не ўстаючы з-за камп'ютара або з дарогі. Яно і праўда, зручна. Але — і апісаны вышэй выпадак таму сведчанне — не заўсёды бяспечна. Літаральна: для жыцця.
А яшчэ — для душы. Ператвараемся ў «віртуальных рэспандэнтаў», а што становіцца з намі — сапраўднымі?
Учора быў дзень нараджэння ў сяброўкі-аднакурсніцы, з якой пазнаёміліся яшчэ падчас паступлення на журфак, дурнымі галасамі спявалі «Странник мой, дорогой...» у старым корпусе на Маскоўскай, дзяліліся ў інтэрнаце апошнім пачастункам з дому, дый пасля заканчэння ўніверсітэта нярэдка збіраліся цёплай дзявочай кампаніяй... Цяпер не збіраемся: усе вельмі занятыя. Дзякуй «Аднакласнікам» — выручаюць. Яны ж і паведамленне на электронную пошту прыслалі: маўляў, у Аксаны сёння дзень нараджэння...
Я яе павіншавала. У «Аднакласніках». Напісала добрыя пажаданні, прыляпіла пацешны «смайлік». Спачатку хацела патэлефанаваць — і не стала гэтага рабіць. Мы, жывучы і працуючы ў адным горадзе, ужо гадоў пяць — вось так, жыўцом, няхай сабе нават па тэлефоне — не размаўлялі. Што гаварыць, з чаго пачынаць? Ці атрымаецца тая размова? Ці застанемся мы пасля яе такімі, якія мы ёсць у сеціве, — добрымі сяброўкамі, якім ёсць што ўспомніць і пра што пагаварыць?..
Перачытайце Вішнеўскага. Адкінуўшы рамантычны настрой і ўласны, зусім не песімістычны досвед. З чаго пачынаецца і чым заканчваецца «Адзінота ў сеціве» — вось што галоўнае. Герой, які чакае на пустым берлінскім вакзале хуткага цягніка, каб скочыць пад яго і скончыць тое, што пачыналася як перапіска па глабальнай сетцы. Прычым гэтая перапіска ні да чаго не абавязвала. (І ён абавязкова скочыць — у тым няма ніякага сумнення!). Як прароцтва, як папярэджанне ўсім нам. Вось дзеля чаго пісалася ўся кніга. Прынамсі, так падумалася, калі перачытала яе нядаўна. Ну, яшчэ, можа, дзеля гэтай вось фразы галоўнага героя: «Божа, дапамажы мне быць такім чалавекам, якім лічыць мяне мой сабака»...
Алена ЛЯЎКОВІЧ
Мерапрыемства праводзіцца на добраахвотнай аснове.
Не выявіць ні секунды абыякавасці.