2 жніўня прыёмная кампанія ў беларускіх ВНУ афіцыйна завяршылася: апошнімі былі агучаны прозвішчы абітурыентаў, залічаных на платную форму атрымання вышэйшай адукацыі. У тых, каму з паступленнем не пашанцавала, яшчэ ёсць магчымасць паступіць у сярэднія спецыяльныя навучальныя ўстановы.
2
Прыём дакументаў у абітурыентаў, якія паступаюць на бюджэтныя месцы ў ССНУ на аснове агульнай сярэдняй і прафесійна-тэхнічнай адукацыі, заканчваецца 6 жніўня. Прычым гэта тычыцца ўсіх формаў навучання: дзённай, вячэрняй і завочнай. Нагадаем, што абітурыенты, якія паступаюць у ССНУ на аснове агульнай сярэдняй адукацыі, могуць падаць у прыёмную камісію сертыфікаты ЦТ з любой сумай балаў, акрамя нуля. На платную форму навучання дакументы будуць прымацца ў ССНУ да 14 жніўня.
Таксама працягваецца прыёмная кампанія і ва ўстановах, якія рэалізуюць праграмы прафесійна-тэхнічнай адукацыі. Абітурыентаў тут чакаюць па 20 жніўня ўключна. Але пры неабходнасці прыём дакументаў можа быць падоўжаны да поўнага ўкамплектавання груп — да 15 верасня.
У новым навучальным годзе ў ССНУ распачнецца навучанне па новых спецыяльнасцях. Напрыклад, у Мінскім архітэктурна-будаўнічым каледжы адкрываецца спецыяльнасць «Абслугоўванне і эксплуатацыя жылых дамоў». У Мінскім дзяржаўным вышэйшым радыётэхнічным каледжы — спецыяльнасць «Мікра- і нанаэлектронныя тэхналогіі і сістэмы». У Мінскім політэхнічным каледжы — «Электроніка механічных транспартных сродкаў». У Магілёўскім тэхналагічным каледжы пачнуць рыхтаваць мехатронікаў 5 разраду, якія будуць спецыялізавацца на вытворчасці халадзільнага абсталявання.
А ў Мінскім дзяржаўным каледжы сферы абслугоўвання адкрываецца падрыхтоўка па спецыяльнасці «Дашкольная адукацыя» з прысваеннем кваліфікацыі «Выхавальнік дашкольнай адукацыі». На навучанне за кошт сродкаў бюджэту будуць набраны 2 групы навучэнцаў: 25 чалавек на аснове базавай адукацыі і 25 чалавек — на аснове агульнай сярэдняй адукацыі.
Пры асваенні спецыяльнасці «Дашкольная адукацыя» на аснове агульнай базавай адукацыі прадугледжана спецыялізацыя «Сацыяльна-педагагічная дзейнасць», якая мае на ўвазе паглыбленае вывучэнне навучэнцамі сацыяльнай педагогікі і псіхалогіі, валеалогіі, асноў сямейнай падрыхтоўкі і прававой абароны апекі і папячыцельства ў Рэспубліцы Беларусь.
А пры атрыманні спецыяльнасці «Дашкольная адукацыя» на аснове агульнай сярэдняй адукацыі прадугледжана спецыялізацыя «Замежная мова», якая ўключае практыку вуснай і пісьмовай замежнай мовы, вывучэнне краіназнаўства і методыкі навучання дзяцей замежнай мове. Тэрмін атрымання адукацыі на аснове агульнай сярэдняй адукацыі складае 2 гады 10 месяцаў. Залічэнне адбываецца па выніках цэнтралізаванага тэсціравання па беларускай (рускай) мове і біялогіі. Сёлета падрыхтоўка выхавальнікаў будзе весціся толькі на дзённай форме атрымання адукацыі, але ў перспектыве ў каледжы збіраюцца арганізаваць і навучанне ў завочнай форме.
На ўзроўні прафесійна-тэхнічнай адукацыі таксама плануецца пашырыць спектр новых кваліфікацый. Напрыклад, Мінскі прафесійна-тэхнічны каледж лёгкай прамысловасці і бытавога абслугоўвання насельніцтва распачне навучанне па кваліфікацыі «Майстар па педыкюры». У Мінскім прафесійна-тэхнічным каледжы дэкаратыўна-прыкладнога мастацтва пачнуць рыхтаваць цесляроў-бетоншчыкаў і дарожных рабочых, а ў Мінскім прафесійным ліцэі № 14 — машыністаў экскаватара.
З 1 верасня Мінскі дзяржаўны прафесійны ліцэй № 8 будзе перайменаваны ў Мінскі дзяржаўны механіка-тэхналагічны прафесійна-тэхнічны каледж. У гэтай навучальнай установе адкрываецца падрыхтоўка рабочых з сярэдняй спецыяльнай адукацыяй па спецыяльнасці «Мехатроніка» (спецыялізацыя — «халадзільнае абсталяванне»), з прысваеннем выпускнікам пасля здачы іспытаў 5 разраду.
Надзея НІКАЛАЕВА
Мерапрыемства праводзіцца на добраахвотнай аснове.
Не выявіць ні секунды абыякавасці.