Як хутка змяняецца жыццё! Проста не паспяваеш да ўсіх гэтых перамен хоць неяк прыстасавацца...
Напрыклад, яшчэ гадоў дзесяць таму мабільныя тэлефоны прадметам раскошы лічыліся, а зараз яны — амаль што ў кожнага, пачынаючы ледзь не з ясельнага ўзросту.
А ўзяць той жа інтэрнэт з камп'ютарам! Ды я зараз без іх жыцця свайго не ўяўляю і здзіўляюся, як гэта мог раней пісаць п'есы ці празаічныя творы ад рукі! Пісаць, выпраўляць, зноўку перапісваць. І толькі потым іх на машынцы перадрукоўваць (з непазбежнымі пры гэтым памылкамі).
А зараз я ўсё гэта раблю выключна на камп'ютары. Вельмі зручна, нават памылкі камп'ютар сам выяўляе і адразу ж падкрэслівае іх чырвонай рыскай. Альбо зялёнай, калі гэта проста недакладнасць нейкая...
Ці ўзяць, напрыклад, электронныя кнігі!
Можна купіць дыск з сотняй і тысячай кніг, і гэта абыдзецца танней нават, чым купіць адну папяровую кнігу ў кнігарні. Ды і дыск без патрэбы, калі залезці самому ў сусветнае павуцінне. А потым запампаваў усё, што трэба, ва ўласны камп'ютар — і чытай на здароўе! І столькі месца ў кватэры адразу ж вызваліцца... ды і пылу там куды менш стане.
А колькі дрэў такім чынам захаваць можна, не пусціўшы іх на паперу!
А яшчэ пры чытанні з экрана можна павялічыць шрыфт, нават змяніць яго, як, дарэчы, і колер.
Праўда, камп'ютар (у адрозненне ад кнігі) даволі грувасткая рэч, але ёсць жа і невялікія ноўтбукі. Ёсць, у рэшце рэшт, і зусім маленькія планшэты, куды таксама можна запампаваць столькі кніг, што за год не прачытаеш...
А ўзяць, напрыклад, такую рэч, як аўдыякнігі!
Для людзей з праблемамі зроку гэта вялікі плюс, ды і не толькі для іх. Ідзеш па вуліцы... ды не проста ідзеш, а слухаеш, напрыклад, «Капітанскую дачку» Пушкіна. Ці «Салярыс» Станіслава Лема... тут ужо на свой, як кажуць, густ...
Усё гэта добра, толькі вось адно мяне непакоіць — лёс папяровых кніжных выданняў. Колькі ім яшчэ жыць засталося пры такіх тэмпах развіцця электронных сродкаў масавай інфармацыі?
Аб тым, што ў будучым электронныя кнігі цалкам выцясняць з нашага ўжытку кнігі папяровыя, кажуць ужо даўно. Пытанне толькі ў тым, як хутка такое можа адбыцца...
Дабіраючыся штодня раніцай да месца работы на метро, я звярнуў увагу на тое, як многа людзей у час паездкі бавяць час за чытаннем. Прычым амаль усе яны чытаюць электронныя кнігі, і рэдка хто папяровую.
Яно і зразумела: чым браць з сабой таўшчэзны кніжны том, лепш усё гэта запампаваць у тоненькі планшэт. Ды туды ўсё можна запампаваць: падручнікі, вучэбныя дапаможнікі, класіку, сучасную літаратуру розных жанраў...
Нібыта і радавацца трэба, што людзі па-ранейшаму любяць чытаць... Але штосьці перашкаджае гэтаму радавацца. Неяк крыўдна становіцца за старую добрую папяровую кнігу. Тым больш, што і сам пісьменнік. Нядаўна вось чарговая кніга выйшла. Папяровая, як і ўсе папярэднія...
Але ж прагрэс, як кажуць, не спыніць. Вось ужо і ў школы ідуць электронныя падручнікі... І не трэба будзе дзецям згінацца пад цяжарам дзясятка кніг на кожны школьны дзень. Палёгка, ды яшчэ якая!
Электронныя падручнікі, электронныя дзённікі... Ды і сшыткі таксама хутка электроннымі стануць. А замест ручкі ці, скажам, алоўка — клавіятура... Заадно і праблема дрэннага почырка цалкам здымаецца...
Толькі вось як гэта адаб'ецца на зроку нашых дзяцей? Калі і зараз так шмат блізарукіх сярод школьнікаў, то тады, напэўна, вучань без акуляраў музейнай рэдкасцю стане...
Як і сама папяровая кніга...
Ці, можа, я занадта згушчаю фарбы? Бо і тэатру прадказвалі хуткае знікненне яшчэ ў самым пачатку ХХ стагоддзя, пасля з'яўлення кінематографа і кінатэатраў. А потым, з развіццём тэлебачання, відэаапаратуры і інтэрнэту, гэткія ж вешчуны і прарокі прадракалі хуткую смерць ужо самім кінатэатрам...
І што?
Тэатры (і драматычныя, і оперныя) народ як наведваў, так і працягвае наведваць, хоць куды там тэатральным падмосткам да кампьютарных «наваротаў» у сучасных фільмах! І кінатэатры змаглі адстаяць сваё месца пад сонцам, прыстасавацца, ператварыцца ў 3D... і нават 5D...
Дык, можа, і папяровая кніга здолее захавацца, знайшоўшы сваю нішу? Тут як у музыцы: камусьці падабаецца сучасная поп-музыка, а камусьці больш даспадобы опера ці балет.
Так і з кнігамі. Электронныя — для шырокага ўжытку, папяровыя — рарытэт, прыкмета высокай культуры іх уладальніка. І, зразумела ж, гэта будуць не танныя кніжкі ў мяккіх вокладках, а прыгожа аформленыя, дарагія фаліянты...
Вось толькі б і ў будучым людзі набывалі гэтыя шыкоўныя кнігі, у першую чаргу, для чытання, а не проста для таго, каб паставіць акуратна на палічку і час ад часу дэманстраваць гасцям і знаёмым прыгожа аформленыя вокладкі.
Генадзь АЎЛАСЕНКА
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.