У Заслаўі распачаўся VІ чэмпіянат свету па веславанні на байдарках і каноэ сярод студэнтаў
Адказнасць і засяроджанасць адчувалася на тварах спартсменаў на цырымоніі адкрыцця спаборніцтваў. Так, удзельнікі, седзячы на трыбуне, усміхаліся ў аб'ектывы фотакамер, віталіся са сваімі старымі знаёмымі-сапернікамі, але, відаць, думалі не толькі пра цудоўную шоу-праграму ад беларускіх гаспадароў. Да першых папярэдніх заездаў заставалася літаральна некалькі гадзін…
Між іншым, як адзначыў Адам Рошэк, прэзідэнт Еўрапейскай асацыяцыі студэнцкага спорту, сёлетні чэмпіянат пабіў рэкорд сярод удзельнікаў. Тут, пад Мінскам, сабраліся 252 весляры з 22 краін. Сваіх спартсменаў у Мінск накіравалі нават заакіянскія Мексіка і Бразілія!
— На гэты чэмпіянат прыехалі годныя сапернікі. Тут ёсць за каго «пахварэць» і на каго паглядзець, — кажа адзін з лідараў нашай каманды весляроў-байдарачнікаў Алег Юрэня, двухразовы чэмпіён Еўропы. — Напрыклад, за Чэхію выступае Ёзэф Достал, які сёлета двойчы перамагаў на чэмпіянаце свету. У мацнейшым складзе прыехала зборная Польшчы. Шмат вядомых імёнаў і сярод нашых дзяўчат-байдарачніц. А гэта і Марына Літвінчук (Палтаран), Вольга Худзенка, Надзея Ляпешка (Папок), бронзавыя прызёркі алімпіяды ў Лондане, Маргарыта Цішкевіч, пераможца першынства Еўропы, Сафія Юрчанка (Міхейчык), уладальніца сярэбранай узнагароды чэмпіянату свету‑2014. Ад нас патрабуецца добрае выступленне, і мы паспрабуем зрабіць усё для гэтага.
Дарэчы, і сярод канаістаў таксама будзе на каго звярнуць увагу. За «золата» пазмагаюцца добра вядомыя айчыннаму балельшчыку Андрэй Багдановіч, пераможца Алімпіяды ў Пекіне на каноэ-двойцы на дыстанцыі 1000 м, а таксама Дзяніс Гаража, шматразовы чэмпіён свету і Еўропы.
— На гэтых спаборніцтвах у беларусаў падабраўся моцны склад, — заўважае Сяргей Макаранка, чэмпіён Алімпіяды ў Рыме‑1960 на байдарцы-двойцы. — А таму ў нашых спартсменаў ёсць шанцы патрапіць на п'едэстал.
Фінальныя заезды адбудуцца ў суботу і нядзелю. Пачатак ранішняй праграмы ў 9:00. Прыязджайце — не пашкадуеце!
Тарас ШЧЫРЫ.
Фота аўтара.
Мінскі раён
Эрык СЭНТРОН, генеральны сакратар Міжнароднай федэрацыі студэнцкага спорту (FІSU):
— Беларусь ужо каля 20 гадоў з'яўляецца актыўным членам FІSU і ўдзельнічае ў спаборніцтвах, але яшчэ ніколі не выступала ў ролі арганізатара. Атрымліваецца, што гэта мерапрыемства — гістарычны момант. Для веславання на байдарках і каноэ вельмі важны высокі ўзровень інфраструктуры. І гэты вяслярны канал адказвае ўсім еўрапейскім і сусветным стандартам, з'яўляецца лепшай пляцоўкай для правядзення падобнага чэмпіянату. Насамрэч я прыехаў да вас не толькі для таго, каб пракантраляваць і даць ацэнку бягучаму чэмпіянату, а яшчэ і для сустрэчы з прадстаўнікамі ўлады, абмеркаваць далейшае супрацоўніцтва. У прыватнасці, магчымасць правядзення ў Беларусі шматдысцыплінарных мерапрыемстваў. Такіх як летнія ці зімнія ўніверсіяды. Я высока ацэньваю вынікі свайго візіту і спадзяюся, што ўжо ў бліжэйшы час мы вернемся да вас з рабочай групай, каб прадставіць поўны пакет дакументаў, неабходных для арганізацыі ўніверсіяды ў наступныя гады.
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.