Калі ўпершыню трапляеш сюды, то душа замірае ад прыгажосці, а вусны шэпчуць: «Божа мой! І ёсць жа яшчэ рай на Зямлі!..»
Сапраўды, перад вачыма раскрываюцца шырокія прасторы з высокімі шаўковымі травамі, якія павольна калышуцца пад лёгкімі подыхамі ветру; велічная плынь Дзісны з зелянінай дрэў уздоўж рэчышча, блакітным небам з цёплымі промнямі ласкавага сонца, і над усім гэтым — прыгожы беламураваны храм. Сярод садоў, што цягнуцца ўздоўж ракі, сям-там праглядаюцца стрэхі хат, і новая думка нараджае словы: «Ёсць жа людзі, якім Бог даў шчасце жыць у Раі...»
Але гэта — першае ўражанне. І здалёк. А заходзіш у вёску — і жах напаўняе душу, сэрца ўзрушваецца ад крыўды і болю за тое відовішча, якое паўстае перад вачыма. Вясковыя хаты — гэта калекі-прывіды з павыбіванымі вокнамі, выразанымі сценамі, разрабаваным і раскіданым начыннем. Сады — перакручаныя зараснікі здзічэлых яблынь і сліў, якія параслі высачэзнай крапівой і чарнобыльнікам. Нідзе не запяе певень, не заквохчуць куры, не рыкне карова. Не чуваць людскіх галасоў. Паўсюль мёртвая, жудасная цішыня... Вёска памерла, а белы храм узвышаецца над ёй, як помнік. Толькі помнік каму і чаму?..
У вёскі пакуль што ёсць імя і адрас: Рымкі, Пастаўскі раён Віцебскай вобласці. Яшчэ ў
60-70-я гады ХХ стагоддзя вялікія паселішчы цягнуліся суцэльным ланцужком уздоўж Дзісны, утвараючы вялікі вяскова-местачковы мегаполіс. Зараз гэтыя мясціны — сапраўдныя беларускія пустыні. У Рымках у 1941 годзе былі 84 двары з 317 жыхарамі, у 1963-м — 41 двор з 153 жыхарамі, у 2001 годзе — 11 двароў з 12 жыхарамі, а зараз — нікога... Падобная сітуацыя і ў суседніх вёсках.
Сёння велізарныя пласты гісторыі і культуры асобных рэгіёнаў і раёнаў не толькі не апісаны і не зафіксаваны, а сыходзяць у нябыт разам з марнеючымі вёскамі і іх апошнімі жыхарамі. Думаецца, збор як мага найбольш поўнай інфармацыі пра асобныя населеныя пункты, якім наканавана лёсам у бліжэйшы час сысці ў вечнасць, — адна з актуальных агульнабеларускіх задач. Вось прыклад з Пастаўшчыны: у 2001 годзе ў Пастаўскім раёне налічвалася 516 населеных пунктаў, з якіх у 123-х пражывала менш за 10 жыхароў, а ў 55-ці — менш за пяць. Сёння на месцы большасці з гэтых вёсак засталіся закінутыя хаты ды зарослыя быллём сады. А тут жылі людзі, якія працавалі, спявалі, расказвалі гісторыі, адзначалі святы, ладзілі вяселлі, выраблялі калаўроты, бочачкі, сані, ткацкія станкі і шмат-шмат чаго іншага, але свайго, адметнага, непаўторнага. Вёскі, якія цяпер, на жаль, знікаюць, напоўнены матэрыяльнымі і духоўнымі скарбамі, а мы не звяртаем на гэта ўвагі, не надаём ім значэння ці то ад уласнай душэўнай пустэчы, ці то ад звычайнай абыякавасці. Варта зразумець, што разам са знікненнем у гэтых паселішчах хат, хлявоў, прылад працы, студняў і іншых пабудоў і рэчаў адбываецца зняменне тутэйшых мясцін, якое вядзе да спусташэння і абяднення нашай мовы. Вакол кожнай вёскі ўсе адметныя мясціны мелі свае слоўныя абазначэнні, якія ведаў кожны яе жыхар. Калі казалі пра «выган», «лучыху», «маргі», «хвацень», «рум» ці штосьці іншае, то ўсім было вядома, пра што ідзе гаворка. Але старыя людзі паміраюць, вёскі знікаюць або засяляюцца прышлымі — і назвы адыходзяць у нябыт. У ідэале мы для кожнай беларускай вёскі павінны б былі мець карты або схемы ваколіц з адлюстраваннем на іх усіх аб'ектаў, якія мелі мясцовую назву. Але ці ўзгадае хто-небудзь пра іх праз 15-20 гадоў, калі мы зараз не паспеем гэта зрабіць?
А пакуль паміраючыя вёскі, як шчарбатыя старыя, сумна стаяць у акружэнні здзічэлых садоў і разважаюць пра свой лёс, да іх марудна рухаюцца экскаватар і бульдозер: першы выкапае яму, а другі сапхне туды рэшткі пабудоў і дрэў. Стане чыста і роўна. Будзе парадак на зямлі. А ў душах?
...Ціша і спакой у Рымках парушаюцца штогод у пачатку жніўня: сюды, на сваю Бацькаўшчыну, да царквы Дабравесця прасвятой Багародзіцы з'язджаюцца людзі. Збірае іх на радзіме вялікае свята — першы Спас, або, як яго яшчэ называюць, Мокры (ці Мядовы) Спас. Гэтая ўрачыстасць, якая ладзіцца штогод з часу заснавання царквы, не толькі яшчэ адна магчымасць ачысціць душу і напоўніць яе святасцю, але і шанц сустрэцца з блізкімі, сябрамі і знаёмымі, прайсціся па родных дварышчах, наведаць магілы продкаў і паставіць за бацькоў і дзядоў у храме свечкі.
Многа людзей збіраецца на свята. Царква ледзь змяшчае ўсіх ахвотных. А перад службай — сардэчныя сустрэчы родных і знаёмых. Людзі вітаюцца, абдымаюцца, а то і плачуць ад радасці, што ўдалося сустрэцца з тымі, каго не бачылі «сто гадоў». Мужчыны і жанчыны збіраюцца групкамі, размаўляюць, успамінаючы дзяцінства і юнацтва.
Але як адрадзіць вёску? Сапраўды, ці можна адрадзіць Рымкі, адгарнуць новую старонку ў яе гісторыі? Пакуль што нідзе ні ў якіх планах, ні ў выступленнях высокіх асоб не ўдалося знайсці якія-небудзь згадкі па праблеме вёсак, якія знікаюць. Нібыта працэс гэты натуральны, незваротны і на яго ніякім чынам немагчыма паўплываць. Мне ж думаецца, што «беларускія пустыні» на Падзісеншчыне яшчэ можна адрадзіць. І тут бачацца два шляхі.
Першы — мост. Пабудаваўшы каля вёскі Рымкі мост цераз Дзісну, удасца пазбавіць тутэйшы край яго «тупіковасці», якая зараз створана сутокамі трох рэк. Ажыўленне руху дасць штуршок для развіцця паселішчаў як уздоўж Дзісны, так і па берагах рэк Паловіца і Галбяіца, якія таксама паступова мялеюць. Але, прадчуваю, будзе сказана, што грошай на будаўніцтва няма...
Шлях другі — спадзяванне на манахаў-месіянераў. Браты-хрысціяне, пабудаваўшы каля храма манастыр, сваёй рупнасцю маглі б у хуткім часе вярнуць гэтай мясцовасці Боскі выгляд. І тады ў падарожніка, які ўпершыню патрапіць у гэты край, зашчыміць сэрца ад прыгажосці, а вусны прашэпчуць: «Божа мой! І ёсць жа яшчэ рай на Зямлі!»
Ігар ПРАКАПОВІЧ
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.