Дзяржаўтаінспекцыя заклікае бацькоў напярэдадні новага навучальнага года правесці сваіх дзяцей па бяспечным маршруце ў школу і праверыць наяўнасць у іх на сумках і вопратцы флікераў.
— Дзеці, якія зараз вяртаюцца з адпачынку ў горад, вельмі расслабленыя, ім праблематычна сканцэнтраваць увагу і кантраляваць сітуацыю. Таму трэба сваім дзецям дапамагчы — прайсці з імі разам да школы і паказаць усе небяспечныя ўчасткі, дзе можна пераходзіць дарогу з інтэнсіўным аўтатранспартным рухам, — тлумачыць старшы інспектар аддзела арганізацыі міжведамаснага ўзаемадзеяння і прафілактыкі бяспекі дарожнага руху УДАІ Міністэрства ўнутраных спраў Станіслаў САЛАВЕЙ.
Прадстаўнік ДАІ паведаміў, што за 7 месяцаў гэтага года дзеці сталі ўдзельнікамі 233 дарожна-транспартных здарэнняў (ДТЗ): за гэты час 20 дзяцей загінулі і 237 атрымалі раненні. 13 дзяцей, якія загінулі на дарогах, былі пешаходамі, 5 — пасажырамі і 2 — веласіпедыстамі. Для параўнання: за 7 месяцаў 2013 года загінулі 12 дзяцей.
— 68% усіх дарожна-транспартных здарэнняў з удзелам дзяцей адбыліся па віне дарослых, — падкрэсліў Станіслаў Салавей, — хоць яшчэ пяць гадоў таму сітуацыя была кардынальна іншай: віна была пераважна на дзецях. Гэта значыць, што школьнікаў мы навучылі паважаць Правілы дарожнага руку, а з дарослымі пакуль не атрымалася. Тым больш што 54 ДТЗ з удзелам дзяцей адбыліся на пазначаных пешаходных пераходах. І толькі ў шасці выпадках дзеці пераходзілі дарогу на чырвоны сігнал святлафора. А ва ўсіх астатніх выпадках яны паводзілі сябе на пераходах правільна, у адрозненне ад дарослых за рулём.
Па словах Станіслава Салаўя, яшчэ адна «хворая» кропка — гэта дваравыя тэрыторыі:
— Рухацца на аўтатранспартным сродку па ўнутраных тэрыторыях жылых масіваў трэба на мінімальнай хуткасці. Кіроўца павінен быць гатовы да таго, што з-за любой машыны яму пад колы можа выбегчы дзіця. У чалавека за рулём павінна заставацца магчымасць, каб паспець спыніцца. Асабліва гэта актуальна тады, калі школа ці дзіцячы садок знаходзіцца ўнутры мікрараёна. Бацькі падвозяць сваіх дзяцей, тыя выбягаюць з аўтамашыны і могуць стаць ахвярай наезду на іх іншага аўтамабіля.
У Рэспубліканскім навукова-практычным цэнтры траўматалогіі і артапедыі ў рамках праекта «Стратэгія прафілактыкі дзіцячага траўматызму ў Рэспубліцы Беларусь» аналізавалася сітуацыя з дарожна-транспартным траўматызмам, пачынаючы з 2001 года па сёння.
— Мы пераканаліся ў тым, што колькасць ДТЗ з удзелам дзяцей ва ўзросце да 15 гадоў знізілася за гэты час з 753 да 534. Колькасць пацярпелых дзяцей зменшылася з 783 да 568, параненых — з 717 да 533, і тых, хто загінуў, — з 66 да 32, — паведаміў загадчык кансультатыўна-паліклінічнага аддзялення цэнтра Генадзь Ур'еў. — Аднак, нягледзячы на зніжэнне абсалютных лічбаў колькасці ДТЗ і пацярпелых, рызыка агульнага траўматызму (колькасць пацярпелых на 100 ДТЗ з удзелам дзяцей) мае тэндэнцыю да росту. Да таго ж дарожна-транспартныя траўмы часта становяцца прычынай устойлівай страты здароўя і інваліднасці і з'яўляюцца асноўнай знешняй прычынай смерці дзяцей і падлеткаў.
Між іншым, па віне нецвярозых кіроўцаў адбываецца ад 10% да 15% ДТЗ, у якіх церпяць дзеці.
— Кіроўцам трэба абавязкова ўлічваць псіхалогію дзіцяці, яго мысленне. Напрыклад, па псіхалагічнай ацэнцы дзіця ўспрымае вялікі аўтамабіль як небяспеку меншага значэння, чым легкавы аўтамабіль. У дзіцяці парушана ацэнка прасторы: ён няправільна ацэньвае адлегласць да аўтатранспартнага сродку, які рухаецца. Менавіта таму мы часта назіраем нелагічныя, на наш погляд, паводзіны, калі дзіця стаіць на абочыне дарогі і раптам, пры набліжэнні аўтамабіля, кідаецца перабягаць перад ім дарогу. Таксама дзіця часта не гатова да таго, што з-за вугла можа выехаць аўтамабіль, — у яго проста не хапае для гэтага жыццёвага досведу. Таму дзеці да 5—6 гадоў не могуць знаходзіцца на вуліцы без суправаджэння дарослых.
Станіслаў Салавей паведаміў, што з 25 жніўня па 5 верасня ў краіне пройдзе акцыя «Увага! Дзеці!». Падчас акцыі Дзяржаўтаінспекцыя абследуе ўсе навучальныя ўстановы на наяўнасць знакаў і разметак, якія забяспечваюць бяспечнасць дарожнага руху. Ва ўсіх школах павінен быць абсталяваны так званы «вугалок бяспекі», дзе ўвазе школьнікаў будзе прадстаўлены самы бяспечны маршрут да школы ва ўсіх напрамках, а таксама размешчана інфармацыя аб правілах дарожнага руху.
Надзея НІКАЛАЕВА.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».