Удзельнікі педагагічнага форуму лічаць, што кіраўнікоў трэба выхоўваць са школьнай парты
Старшыня Мінскага абласнога выканаўчага камітэта Сямён Шапіра прапанаваў у будучым праводзіць педагагічныя форумы цэнтральнага рэгіёна ў новым фармаце. У прыватнасці, даклад упраўлення адукацыі па ўдасканаленні вучэбнага працэсу накіроўваць ва ўстановы адукацыі загадзя, каб педагогі змаглі з імі папярэдне азнаёміцца ўжо непасрэдна падчас самога мерапрыемства. Такую ініцыятыву ён агучыў ва Уздзе на канферэнцыі педагагічных работнікаў Міншчыны «Адукацыя — стратэгічны рэсурс у інавацыйным развіцці Мінскай вобласці».
Начальнік упраўлення адукацыі Мінаблвыканкама Галіна Казак распавяла, што на Міншчыне шукаюць новыя тэхналогіі, фінансавыя механізмы і магчымасці, каб выхаваць усебакова адукаванага, духоўна багатага чалавека. Напрыклад, пачалі цесна супрацоўнічаць з Беларускім дзяржаўным педагагічным універсітэтам імя М. Танка, які з'яўляецца своеасаблівай кузняй кадраў для вобласці. І ўжо сёння 668 чалавек паступілі на педагагічныя спецыяльнасці, 158 — па мэтавым накіраванні. А гэта значыць, што будучыя выпускнікі вернуцца дадому, каб жыць і працаваць на роднай зямлі, у школах, якія закончылі самі.
Працягваюцца праекты па эканамічнай адукацыі. У іх межах створаны і паспяхова працуюць школьныя бізнес-кампаніі. Летась іх было 76, сёлета ўжо 84. Тут дзеці не толькі вучацца дзелавым якасцям, але і зарабляюць грошы ад продажу асабістай прадукцыі, частка якіх ідзе на выплату ім заработнай платы. Азнаёміцца з прадукцыяй юных бізнесменаў можна было і падчас работы педканферэнцыі. Як заўважыў міністр адукацыі Сяргей Маскевіч, уражанне такое, што ў параўнанні з мінулым годам асартымент іх вырабаў павялічыўся на працэнтаў 70. Ён адзначыў, што сістэма адукацыі Мінскай вобласці — адна з самых перспектыўных у інавацыйным развіцці. А ўпраўленне адукацыі, на думку міністра, адмовілася ад ролі непасрэднага кіраўніка, які аддае загады, што і як рабіць на месцах. Яно выконвае функцыю каардынатара. У педагогаў і вучняў вобласці даволі шмат ініцыятыў, і яны знаходзяць падтрымку ў вышэйшых структурах.
Так, на Міншчыне ўпершыню стартаваў новы праект сумесна з Нацыянальным банкам па навучанні дзяцей фінансавай граматнасці. На першым этапе неабходныя веды набываюць педагогі, якія на факультатывах па эканоміцы перададуць іх дзецям. Новы для Міншчыны і такі кірунак школьнай дзейнасці, як «легаканструяванне», для заняткаў якім ужо вызначана некалькі пляцовак. З мінулага года ў школах Маладзечна ўкараняецца сумесны праект з Акадэміяй кіравання пры Прэзідэнце Рэспублікі Беларусь «Школьная акадэмія». Тут вывучаюць такія цікавыя дысцыпліны, як «Электронны ўрад», «Тэхналогія кіравання».
— Літаральна за год заўважаем пазітыўныя змены ў развіцці нашых дзяцей: павысілі бал па агульнаадукацыйных прадметах, паспяхова выступілі на алімпіядах, — сцвярджае Галіна Казак. — Вельмі добра, што тут нашы хлопчыкі і дзяўчынкі атрымліваюць навыкі кіравання. Мяркую, у перспектыве сённяшнія вучні стануць спецыялістамі, якія ўнясуць добры ўклад у айчынную эканоміку.
Што тычыцца аптымізацыі сістэмы адукацыі, то яна прадоўжыцца. 1 верасня закрыюцца 24 установы, у тым ліку 6 міжшкольных вытворчых камбінатаў. Раней тут старшакласнікі паралельна атрымлівалі рабочую спецыяльнасць. Сёння такую магчымасць ім прадастаўляюць прафесійна-тэхнічныя ўстановы. Акрамя таго, 30 сярэдніх школ будуць рэарганізаваны ў базавыя. У асноўным у сельскай мясцовасці.
— Пры закрыцці школ для нас важнае значэнне маюць не толькі эканамічныя паказчыкі, але і якасць адукацыі. Сельскія вучні павінны быць канкурэнтаздольнымі. Атрымаць добрыя веды яны змогуць у школе, дзе створаны належныя ўмовы, ёсць неабходнае абсталяванне і тэхніка, камп'ютарныя і лінгафонныя класы, спартыўныя залы, — канстатавала Галіна Казак.
У сістэме дашкольнай адукацыі будуць адкрывацца групы кароткага і доўгатэрміновага знаходжання дзяцей. Сёлета прадоўжыцца стварэнне ў дзіцячых садках дадатковых месцаў шляхам вываду адсюль першакласнікаў, а таксама адкрыцця груп, якія функцыянавалі раней. Заканчваецца будаўніцтва дзіцячых садкоў у Слуцку і ў Смалявічах — кожны на 230 месцаў. А да канца года садок будзе ўзведзены ў аграгарадку Самахвалавічы. У бліжэйшай перспектыве з'явяцца дашкольныя ўстановы ў Мачулішчах, Сеніцы, Калодзішчах, Хацежына, Бараўлянах, Міханавічах. Акрамя таго, сёлета плануецца адкрыць і тры дзіцячыя дамы сямейнага тыпу.
На педканферэнцыі сабраліся сотні настаўнікаў і іх вучняў з усяго сталічнага рэгіёна. Яны змаглі папрацаваць на 9 дыялогавых пляцоўках, абмяняцца вопытам, абмеркаваць ролю педагога, розныя аспекты вучэбнай дзейнасці. У рабоце гэтых пляцовак удзельнічалі і маладыя спецыялісты. Ім расказалі аб нарматыўным заканадаўстве, што рэгулюе працоўныя адносіны, азнаёмілі з правамі, абавязкамі, ільготамі, якія ім належаць. У рабоце форуму прынялі ўдзел і расійскія калегі.
Таццяна ЛАЗОЎСКАЯ
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».