"Падзяліцца" аўтамабілем ці ездзіць на веласіпедзе — што выберуць мінчане?
Сталічныя эколагі ўжо даўно "ламаюць" галаву над пытаннем разгрузкі горада ад "лішніх" аўтамабіляў. Паводле інфармацыі Мінскага гарадскога камітэта прыродных рэсурсаў і аховы навакольнага асяроддзя, 85% забруджвання паветра прыходзіцца менавіта на долю гарадскога транспарту. Даследаванне сітуацыі паказала: для перасоўвання мінчане аддаюць перавагу найперш уласнаму аўтамабілю. Па фінансавых выдатках высветлілася, што ён — самы танны від транспарту. А з пункту гледжання экалогіі — самы шкодны.
Санкцыі на аўто і "эфект веласіпеда"
"Ужо распрацавана канцэпцыя па ўдасканаленні якасці гарадскога транспарту на 2015—2020 гады, — паведаміў дырэктар Беларускай асацыяцыі экспертаў і сюрвеераў на транспарце Юрый ВАЖНІК. — Мы імкнёмся атрымаць парытэт паміж грамадскім і уласным транспартам".
Для рэгулявання колькасці ўласных аўто ў хуткім часе пачнуцца мерапрыемствы па ўвядзенні сістэмы платных парковак. Пілотнай зонай стане новы паркінг на вуліцы Гікала, які адкрыецца 1 верасня. Пасля завяршэння праекта ў Мінску з'явяцца 12 тысяч парковачных месцаў. Мяркуецца, што ўвядзенне абавязковай платы за паркінг заахвоціць людзей карыстацца грамадскім транспартам, а не ўласным. "Горад да гэтага падрыхтаваны, — падсумаваў спецыяліст. — Мы чакаем, што людзі ўсё ж пачнуць думаць не толькі пра сябе, але і пра экалогію". Да таго ж уносіліся прапановы зрабіць для кіроўцаў аўто платным уезд у цэнтр Мінска.
Веласіпед — яшчэ адзін дзейсны спосаб разгрузіць горад ад аўтамабіляў. За апошнія гады ён стаў ледзь не часткай іміджу, а калі дадаць, што гэты від транспарту, умоўна кажучы, бясплатны і да таго ж экалагічны, — цаны яму няма.
"У сярэднім, веласіпед акупляецца за 18 месяцаў, — адзначыў супрацоўнік энергетычнай праграмы Цэнтра экалагічных рашэнняў Павел ГАРБУНОЎ. — Што датычыцца хуткасцяў, то на невялікіх адлегласцях ён "абганяе" аўтамабіль" і не стаіць у заторах. Велааматары зрабілі калькулятар, на якім можна будзе падлічыць свае расходы на праезд у грамадскім транспарце і на веласіпедзе. Праблемы, якія хвалююць веласіпедыстаў, — адсутнасць веладарожак, канфлікты з пешаходамі, неадукаванасць у пытаннях Правілаў дарожнага руху. Тым не менш у вялікіх арганізацыях назіраецца тэндэнцыя да перасоўвання менавіта на веласіпедзе, а не на аўтамабілі.
Скінуцца на паліва дзеля экалогіі
Альтэрнатывай веласіпеду ў Беларусі можа стаць карпул — сумеснае выкарыстанне ўласнага аўтамабіля для перавозак. Знайсці спадарожніка можна з дапамогай спецыяльных сайтаў — такая практыка ўдала дзейнічае ў Еўропе. Звычайна ўласнік машыны прапануе падзяліць са спадарожнымі выдаткі на паліва і ўтрыманне машыны. Гэта дазваляе камфортна і бюджэтна перасоўвацца, не выкарыстоўваючы лішняга транспарту. Адзін з распрацоўшчыкаў сайта carpool.by Юрый КАЗЛОЎ заўважыў, што першымі "дзяліцца" сваімі аўто сталі амерыканцы падчас Другой сусветнай вайны.
Увогуле існуюць тры кірункі карпулу. Класічны — знайсці спадарожнікаў на адну паездку і на вялікую адлегласць. Дынамічны — на меншую адлегласць. Эколагі прапануюць рэкламаваць менавіта рэгулярны карпул — гэта пастаянныя паездкі на працу ці вучобу. Па словах Юрыя Казлова, у сярэднім па Мінску можна дабрацца да месца прызначэння за 5—10 тысяч рублёў. Даехаць з камфортам з Мінска да Мазыра можна за 24 тысячы. Часцей за ўсё беларускія карпульшчыкі жадаюць дабрацца да Мінска, Масквы, Вільнюса, Санкт—Пецярбурга.
Для адной вялікай арганізацыі быў прапанаваны варыянт карпаратыўнага карпулу. "З 1200 супрацоўнікаў каля 800 маюць ўласныя аўто, сама фірма знаходзіцца за кальцавой, а паркінг разлічаны на 300 месцаў, — распавядае Юрый Жбанкоў. — Мы падказалі ім "дзяліцца" машынамі — і гэтая практыка ўдала прыжылася сярод калег".
Асноўнымі праблемамі карпулу ў Беларусі з'яўляюцца недавер і нягнуткасць маршрутаў. Да таго ж мала хто ведае, што праз інтэрнэт можна знайсці сабе спадарожніка. Але ўжо зараз на сайце — каля сотні актуальных паездак па Беларусі і ў бліжэйшыя краіны.
Эколагі нагадалі, што з 16 па 22 верасня ў Беларусі пройдзе тыдзень мабільнасці. У рамках гэтай акцыі будуць папулярызавацца экалагічныя віды транспарту. Завершыць яго ўжо традыцыйны "дзень без аўто": беларускім аўтаўладальнікам прапануюць на дзень адмовіцца ад свайго жалезнага сябра.
Кацярына РАДЗЮК.
Фота Надзеі Нікалаевай.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.