Ацяпляльны сезон пачынаецца з прамысловай бяспекі
Надвор'е ў Беларусі пакрысе перанастройваецца на восеньскі лад. А гэта азначае, што ўжо не за гарамі і пачатак ацяпляльнага сезона. Падрыхтоўка да яго прадугледжвае ў тым ліку і кантроль за выкананнем тэхнікі бяспекі. Аб гэтым на спецыяльнай нарадзе, прысвечанай ходу падрыхтоўкі цеплакрыніц сталіцы да працы ў асенне-зімовы перыяд, расказаў начальнік Мінскага гарадскога ўпраўлення Дзяржпрамнагляду Васіль Галкоўскі.
Пазапланавая праверка ведаў і адказ рублём
«Пад наглядам Мінскага гарадскога ўпраўлення Дзяржпрамнагляду знаходзяцца 250 прадпрыемстваў і арганізацый, якія, у сваю чаргу, абслугоўваюць 360 кацельных. З іх 119 забяспечваюць цяплом сацыяльна значныя аб'екты. Па стане на 7 жніўня мы праверылі пазапланава 61 кацельную. Але, на жаль, адпаведныя тэхнічныя патрабаванні добрасумленна выконваюць не паўсюль. Так, мы выявілі ажно 319 фактаў іх парушэння! У выніку чаго 26 адказных спецыялістаў былі вымушаны прайсці пазапланавую праверку ведаў. А двух чалавек давялося аштрафаваць...»
Прамысловая бяспека — не «для галачкі»
«Заключэнне аб падрыхтаванасці цеплакрыніцы да працы ў будучым ацяпляльным сезоне мы выдаць не можам, калі пры праверцы выяўляем грубыя парушэнні патрабаванняў дзеючых тэхнічных нарматыўных прававых актаў. Яны накіраваны на выкананне прамысловай бяспекі. Як правіла, парушэнні часцей за ўсё звязаны з двума фактарамі. У першым выпадку ў катлоў адсутнічаюць аўтаматызаваныя прылады кантролю герметычнасці запорнай арматуры перад кожнай гарэлкай. Гэты захад накіраваны на павышэнне выбухабяспекі. У другім выпадку памяшканні кацельных не абсталяваны сістэмай кантролю паветра па колькасці ў ім аксідаў вугляроду. Пры гэтым асноўнае ацяпляльнае абсталяванне, якое працуе на газе, патрабуе пастаяннага назірання з боку персаналу.
Летась 3 чэрвеня надзвычайнае здарэнне здарылася на Ваўкавыскім мясакамбінаце, калі там узарваўся паравы кацёл. Рэактыўная сіла, якую стварыла паравадзяная сумесь, што пачала выходзіць з пашкоджанага барабана, частку катла падкінула ўверх. Кацёл ударыў у перакрыццё і разбурыў тры пліты. Былі парушаны аконныя праёмы кацельнай і, вядома, выведзены са строю сам кацёл. На шчасце, апорныя канструкцыі будынка не пацярпелі. Застаўся цэлым і персанал. Прычына аварыі — перагрэў сценкі катла з боку топачнай камеры ў межах 700–1000 градусаў. А гэта адбылося, у сваю чаргу, з‑за недахопу ўзроўню вады.
Трэба зазначыць, што Мінскае гарадское ўпраўленне Дзяржпрамнагляду накіравала ўладальнікам аналагічных катлоў інфармацыйныя лісты з патрабаваннем выканання пэўнага шэрагу мерапрыемстваў дзеля папярэджання ўзнікнення такіх сітуацый і абавязковага прадастаўлення справаздачы. Да 1 студзеня ўсе 46 арганізацый нашы патрабаванні выканалі.
17 сакавіка ў Цэнтр аператыўнага рэагавання Слонімскага МНС паступіла паведамленне аб частковым абрушэнні дымавой трубы на будынку кацельнай мясцовай камвольна-прадзільнай фабрыкі. Без цяпла засталіся 126 шматкватэрных жылых дамоў, 6 інтэрнатаў, 7 дзіцячых садкоў і 3 школы, а таксама сацыяльны прытулак. А на вуліцы слупок тэрмометра стаяў каля адзнакі ў 4 градусы цяпла… Уявіце сабе, наколькі камфортна адчувалі сябе жыхары аб'ектаў, якія засталіся без цяпла? У бальніцу з траўмамі рознай ступені цяжкасці быў дастаўлены слесар па рамонце газавага абсталявання. Яшчэ 3 чалавекі, якія знаходзіліся з ім, не пацярпелі. Былі пашкоджаны канструкцыі будынка кацельнай на плошчы 80 квадратных метраў. Добра яшчэ, што спрацавала аўтаматыка, якая адключыла падачу газу, і толькі таму не адбылося ўзгарання…
Апошняя аварыя здарылася зусім нядаўна, 28 чэрвеня, у кацельняй на тэрыторыі Карэліцкай цэнтральнай раённай бальніцы. Кацёл літоўскай вытворчасці працаваў на цвёрдым паліве. Механізаваная сістэма падачы паліва на момант аварыі была няспраўнай. Машыніст не пацярпеў толькі дзякуючы таму, што знаходзіўся ў гэты час у іншым памяшканні. А тут ужо не абышлося без пашкоджання апорных канструкцый пабудовы. Па сутнасці, памяшканне кацельнай знішчана. Панелі, якія ўпалі з‑за ўзрыўной хвалі пашкодзілі шафы ўпраўлення двух іншых катлоў. Сілкавальныя лініі катлоў былі завалены абломкамі цэглы. Адна з прычын аварыі — кіраўніцтва не арганізавала адпаведны кантроль. Як вынік, абслуговы персанал не выконваў ускладзеныя на яго па інструкцыях абавязкі.
Без гарачай вады тады засталіся 18 шматкватэрных дамоў, бальніца і іншыя сацыяльныя аб'екты…»
Не працяг рэсурсу працы, а мадэрнізацыя
«Каб ацяпляльны сезон быў без аварый і іншых надзвычайных здарэнняў, супрацоўнікі арганізацый і прадпрыемстваў павінны якасна выконваць абавязкі, якія на іх ускладзены. А кіраўніцтва, у сваю чаргу, павінна ўважліва сачыць не толькі за працоўнай дысцыплінай і парадкам на месцах, але і за тым, каб недахопы, якія перашкаджаюць устойлівасці працы цеплакрыніц, былі своечасова выяўлены і ліквідаваны. Таксама трэба пастаянна павышаць узровень прамысловай бяспекі. У першую чаргу гэта датычыцца працуючага абсталявання. Калі яно адпрацавала нарматыўны тэрмін службы, яго неабходна своечасова мадэрнізаваць, а не працягваць разліковы рэсурс працы. Ад усяго гэтага і будзе залежыць як цеплыня батарэй у халодны час года, так і наяўнасць гарачай вады…»
Валяр'ян ШКЛЕННІК.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».