Колькасць заданняў з варыянтамі адказаў трэба скарачаць
«Новая рэдакцыя правілаў прыёму ў ВНУ і сярэднія спецыяльныя навучальныя ўстановы дазволіла зняць шэраг праблемных пытанняў, якія ўзнікалі ў папярэднія гады, і аптымізавала механізм адбору найбольш падрыхтаванай для навучання моладзі», — заявіў на сустрэчы з журналістамі старшыня Савета Рэспублікі Нацыянальнага сходу Рэспублікі Беларусь, старшыня Дзяржаўнай камісіі па кантролі за ходам падрыхтоўкі і правядзення ўступных іспытаў Анатоль РУБІНАЎ.
Пра тое, што абноўленыя правілы прыёму не выклікалі нейкай незадаволенасці з боку грамадскасці, сведчыць той факт, што колькасць зваротаў у дзяржаўную камісію скарацілася ўдвая. Прычым большасць зваротаў мела кансультатыўны характар.
Па словах Анатоля Рубінава, увядзенне ў гэтым годзе дадатковага набору істотна зменшыла колькасць незапоўненых бюджэтных месцаў. Пасля другой хвалі залічэння абітурыенты запоўнілі амаль 1,5 тысячы вакантных месцаў па вострадэфіцытных для беларускай эканомікі спецыяльнасцях. А незапоўненымі засталіся толькі крыху больш за 80 месцаў на 6 спецыяльнасцях сельскагаспадарчага профілю ў Беларускай дзяржаўнай сельскагаспадарчай акадэміі.
Для абітурыентаў дадатковага набору планка на ЦТ была зніжана на 5 балаў па кожным прадмеце. А для асоб, якія паступалі на ваенныя, сельскагаспадарчыя і спартыўныя спецыяльнасці, мінімальнае значэнне складала 3 балы па кожным з усіх прадметаў. Цікава, што прахадныя балы пры дадатковым наборы ў большасці выпадкаў аказаліся вышэйшымі, чым пры асноўным наборы. Як такое магло адбыцца? Анатоль Рубінаў патлумачыў, што некаторыя з абітурыентаў няўдала здалі адну з дысцыплін, прычым не заўсёды профільную (напрыклад, правалілі экзамен па дзяржаўнай мове). Затое ў іх былі высокія балы па двух іншых прадметах.
— Аднак пры дадатковым наборы было залічана і каля 200 чалавек, якія не пераадолелі ўстаноўлены на ЦТ парог адначасова па двух прадметах, а 12 чалавек правалілі экзамен па ўсіх трох дысцыплінах. Але яны таксама сталі студэнтамі. Мяркуем, што ў будучыні пры дадатковым наборы такія асобы не павінны дапускацца да ўдзелу ў конкурсе. Трэба будзе прапісаць у нашых правілах, што ўдзельнічаць у дадатковым наборы могуць абітурыенты, якія не змаглі пераадолець мінімальны парог на ЦТ не больш чым па адным прадмеце, — падкрэсліў старшыня дзяржкамісіі.
Шэраг пытанняў, па меркаванні членаў дзяржкамісіі, патрабуе вырашэння. У прыватнасці, трэба скараціць тэрміны правядзення цэнтралізаванага тэсціравання за кошт аб'яднання дзвюх дысцыплін. Можна праводзіць у адзін дзень у адных і тых жа пунктах ЦТ экзамен па двух прадметах, не звязаных у адзін блок у якасці профільных па спецыяльнасці. Напрыклад, у адзін дзень экзаменаваць абітурыентаў па хіміі і гісторыі Беларусі або па біялогіі і грамадазнаўстве. Гэта дазволіць скараціць працягласць правядзення ЦТ як мінімум на 25% і зменшыць як фінансавыя выдаткі, так і выдаткі працоўнага часу асоб, што задзейнічаны ў правядзенні ўступнай кампаніі. Трэба перагледзець таксама і суму платы, якую ўносяць абітурыенты пры рэгістрацыі на ЦТ. Яна ўжо шмат гадоў не змянялася і складае ўсяго 10 тысяч рублёў.
Патрабуюць удасканалення структура і змест тэставых заданняў. Па-ранейшаму асноўная роля ў тэстах адводзіцца заданням часткі А — гэта значыць, заданням з варыянтамі адказаў, з якіх трэба выбраць правільны. Як паказваюць разлікі, выпадковае ўгадванне, якое дазваляе пераадолець парогавае значэнне, нельга цалкам выключыць. «Мяркуем, што трэба пашыраць частку В», — патлумачыў Анатоль Рубінаў.
Дзяржаўная камісія таксама лічыць, што трэба перагледзець сістэму падліку балаў удзельнікаў цэнтралізаванага тэсціравання, можна было супастаўляць яе з сістэмай выстаўлення адзнак у школе.
— Бацькам незразумела, чаму іх дзіця атрымлівае ў школе «васьмёркі» па прадмеце, а на тэсціраванні набірае ўсяго 30 балаў. А гэта адбываецца таму, што, калі з адным і тым жа заданнем справілася вялікая колькасць удзельнікаў ЦТ, яно ацэньваецца з мінімальным каэфіцыентам. З аднаго боку, такая сістэма дазваляе ўсіх абітурыентаў ранжыраваць, але не ўсім яна зразумелая, — дадаў Анатоль Рубінаў.
Яшчэ адна задача на заўтра — распаўсюджванне практыкі электроннага залічэння, якая ўжо не першы год паспяхова рэалізуецца ў БДУІР, на іншыя ВНУ. Хутчэй за ўсё, ужо ў наступным годзе яна можа ахапіць спецыяльнасці аднаго профілю ў розных ВНУ. Напрыклад, абітурыенты, якія будуць падаваць дакументы на эканамічныя спецыяльнасці, змогуць расстаўляць свае прыярытэты, выбіраючы з пераліку ўсіх ВНУ, дзе рыхтуюць спецыялістаў эканамічнага профілю.
Надзея НІКАЛАЕВА
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».