Беларускі тэлеканал пакажа фільмы пра беларускія дзіцячыя стужкі
Культуру — у масы! Асабліва выбітныя яе ўзоры — раз, і нацыянальную культуру — два. З верасня кожны ахвотны зможа далучыцца да дзіцячага савецкага (а дакладней усё ж — беларускага) кіно праз экран тэлевізара. Калі акцэнтаў на беларускім кіно занадта мала, штуршкоў і магчымасцяў для яго прагляду таксама, то прапанова тэлеканала «Беларусь 3», які пазіцыянуе сябе як культурны канал, становіцца асабліва цікавай.
Справа ў тым, што ў верасні тэлеканал запускае ў эфір новы праект пад назвай «Старыя казкі», які складаецца з 16 (магчыма, гэта яшчэ не мяжа) праграм, кожная з якіх раскажа нам пра адзін з дзіцячых фільмаў, на якіх беларусы, можна сказаць, выраслі, а хто не вырас, павінен зацікавіцца. Як ствараўся фільм, хто ў ім удзельнічаў, якія нестандартныя сітуацыі адбываліся падчас здымак — праграмы з удзелам акцёраў, кампазітараў, сцэнарыстаў будуць выходзіць па нядзелях, пасля чаго будзе дэманстравацца сам прадмет размовы — фільм. Ужо 7 верасня першая перадача раскажа пра карціну «Корцік» Мікалая Калініна. Паказ фільма прыкладаецца.
З цыкла можна будзе даведацца аб такіх стужках, як «Прададзены смех», «Пра Чырвоны Каптурок», «Расклад на паслязаўтра», «Восеньскі падарунак фей», «Рыжы, сумленны, закаханы», «Прыгоды Бураціна» і іншых.
Тыя, хто небеспадстаўна наракае на тое, што нашы дзеці не бачаць старых, добрых фільмаў, зараз могуць планаваць уключаць тэлевізар у дзве гадзіны па нядзелях. Кажуць, гэтыя казкі — зусім не казкі ў прамым сэнсе слова, а фільмы і для дарослай аўдыторыі ў тым ліку. Ці нават для «дзяцей, якія выраслі», словамі Юрыя Варатніцкага (акцёра, які выканаў ролю ў фільме «Расклад на паслязаўтра» Ігара Дабралюбава).
«Гэта паўнавартасны сезон. Я бачу сваю задачу ў тым, каб наша культура стала найбольш «медыядызавана». Каб дзякуючы сродкам масавай інфармацыі і камунікацыі яна змагла стаць больш даступнай для насельніцтва нашай краіны. Наша задача — запоўніць лакуну, якая ўтварылася ў беларускіх медыя», — сказаў Віктар Маючы, галоўны дырэктар галоўнай дырэкцыі тэлеканала «Беларусь 3».
Выхад цыкла прымеркаваны да 90-годдзя беларускага кіно. І сапраўды, з'яўленне тэлепраграмы такога кшталту — крок наперад для самаідэнтыфікацыі беларусаў (не пабаюся гэтых слоў) і крок уверх для прэстыжу тэлеканала.
Ірэна КАЦЯЛОВІЧ.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».