Што рабілі? Спявалі «Купалінку» і гулялі ў «Ручаёк»!
Сёлета каля 180 беларускіх скаўтаў наведалі «Еўраджэм» — агульнаеўрапейскі скаўцкі лагер, які ладзіўся непадалёк ад нармандскага горада Лізьё, што ў Францыі. Пра ўражанні ад мерапрыемства і ўвогуле пра скаўцкі рух нам распавялі Хрысціна ГУЛЕВІЧ і Ганна ЖУРКО.
Дэвіз: рабі як я!
Гамяльчанка Хрысціна далучылася да гэтага руху паўтара года таму: якраз у той час у горадзе распачаўся набор дзяўчат-скаўтаў (хлопчыкі збіраюцца ў Гомелі ўжо на працягу пяці гадоў). Па ўзросце, а зараз Хрысціне 17 гадоў, наша гераіня трапіла ў «Зялёную галіну» — скаўтынг для падлеткаў. Сёлета дзяўчына паступіла ў БНТУ, але пакідаць рух не збіраецца.
— Скаўтынг — гэта развіццё асобы, духоўнае і фізічнае, — тлумачыць Хрысціна. — Наш рух арыентаваны перш за ўсё на рэлігію. Напрыклад, мы разам абмяркоўваем асобныя ўрыўкі з Бібліі, прапануем сваю дапамогу людзям.
Беларускія скаўты ў кожную пару года выязджаюць пажыць на прыродзе альбо ладзяць пілігрымкі да каталіцкіх святынь. Так яны прывучаюць сябе жыць у «дзікіх умовах» — традыцыя пачалася яшчэ ад заснавальніка руху Роберта Бадэна-Паўэла, які рыхтаваў будучых «разведчыкаў» у лесе. Кожны скаўт вучыць іншых майстэрству на ўласным прыкладзе. «Трэба ўмець і палатку паставіць, і агонь распаліць, і абед прыгатаваць, — распавядае Хрысціна. — Усе разумеюць: калі нехта не зробіць сваю справу, то астатнія застануцца ні з чым — варта думаць і пра іншых».
Дзяўчына адзначыла, што спачатку будучыя «разведчыкі» жылі ў палатках на лецішчы, каб прызвычаіцца да новых умоў, а пасля сталі «вылазіць» у лес. У сваім кап'і — так называецца малая група скаўтаў да 9 чалавек — Хрысціна адказная за гатаванне, бо гэта ў яе добра атрымліваецца.
Адпачынак ці... выпрабаванне?
Глабальны лагер скаўтаў «Еўраджэм» праводзіцца раз на дзесяцігоддзе, і сустрэча гэтым летам была чацвёртай па ліку. Скаўты з усёй Еўропы сабраліся разам на 10 дзён у нармандскім лесе. «Еўраджэм» — гэта сустрэча скаўтаў з розных краін з мэтай пазнаёміцца і падзяліцца вопытам, знайсці агульную мову», — кажа Хрысціна. Але праблемы з моўным пытаннем узнікалі: мала хто з моладзі ведаў добра англійскую. Скаўты з іншых краін былі больш вопытныя і навучылі беларусаў некаторым «фішкам»: напрыклад, італьянцы паказалі, як прасцей зрабіць паходны стол і навучылі завязваць цікавыя вузлы.
«Мы прыехалі за некалькі дзён да афіцыйнага адкрыцця «Еўраджэма», каб разбіць лагер, — распавядае дзяўчына. — Кожны дзень нам прапаноўвалася некалькі варыянтаў праграм, і мы маглі выбіраць для сябе занятак. Так, першы дзень быў актыўным — скаўты шмат гулялі, танцавалі і зрабілі прэзентацыю Беларусі, бо многія не ведалі пра нашу краіну. Разам з «разведчыкамі» з іншых краін мы развучылі і праспявалі «Купалінку» і добра пацешыліся падчас народнай гульні «Ручаёк». Пасля такога ўсе добра паразумеліся».
У вольны дзень скаўты наводзілі парадак у сваім лагеры. Дадаткова яны павінны былі «выканаць» місію — дапамагчы мясцовым жыхарам, зрабіўшы частку іх працы, альбо зрабіць генеральнае прыбіранне ў касцёле. Аднак у той дзень ішоў моцны дождж, і праца «адмянілася», «разведчыкі» сядзелі па палатках. Пасля скаўты пайшлі на ферму, дзе трымаюць коней. Але замест прыбірання стайні атрымалася добрая экскурсія.
Ганна ЖУРКО па-іншаму ўбачыла лагер. «Еўраджэм» не стаў для мяне забавай, — прызналася суразмоўца. — Гэта было вялікае выпрабаванне: пяць дзён з сямі ішоў дождж! А тут яшчэ і працаваць трэба, і ў дзяўчат агонь на кухні не распальваецца — проста жах! Пасля прыйшло разуменне, што вось яно, фарміраванне твайго характару, індывідуальнасці, тэхнічных уменняў.
Мне здаецца, што гэтая сустрэча з усімі яе выпрабаваннямі прайшла б для мяне лягчэй, калі б я паспела прайсці праз тое, праз што праходзяць дзяўчаты і хлопцы ў скаўтынгу, у падлеткавым узросце. Затое пасля «Еўраджэма» цвёрда вырашыла, што хачу працаваць у «Зялёнай галіне» руху».
Чым здзівіла Францыя?
Беларускія скаўты дабіраліся да Францыі на аўтобусах праз Польшчу — першую ноч яны правялі ў Гнезна. Праездам былі ў Парыжы, дзе гулялі дзевяць гадзін. «Здаецца, не так і многа, але за гэты час мы шмат усяго ўбачылі, а галоўнае — Нотр-дам-дэ-Пары», — дзеліцца ўражаннямі Хрысціна. Абавязковымі пунктамі наведвання сталі Эйфелева вежа, Елісейскія палі і Луўр.
Амаль увесь час «разведчыкі» правялі ў нармандскім лесе, але здараліся вылазкі і да святых мясцін. Адна з іх — горад Лізьё, які стаў паломніцкім цэнтрам дзякуючы святой Тэрэзе — кармеліцкай манахіні. «З усёй вандроўкі мне найбольш запомнілася базіліка, пабудаваная ў гонар святой Тэрэзы, дзе зараз захоўваюцца яе мошчы, — распавядае Хрысціна. — Вядома, сабор Парыжскай Божай Маці — шыкоўнае месца, але мала хто ведае пра гэтую базіліку. Вялікая царква са званіцамі выглядае надзіва лёгкай, «паветранай» і вельмі прыгожай, як звонку, так і ўнутры».
На долю скаўтаў выпала пілігрымка па Нармандыі працягласцю ў восем кіламетраў. Яна выдалася цяжкай, бо падлеткі ўвесь час падымаліся ўгару — сапраўднае выпрабаванне для дзяўчат.
«Нягледзячы на прыгожую старажытную архітэктуру, мяне надта здзівіла, што ў Францыі вельмі брудна, — адзначыла Хрысціна. — Пасля Беларусі бачыць брудныя парыжскія вуліцы было непрыемна».
Абедзве дзяўчыны спадзяюцца наведаць наступны «Еўраджэм», які адбудзецца праз дзесяць гадоў. Па ўзросце яны перайшлі ў «Чырвоную галіну» скаўтынгу.
Кацярына РАДЗЮК.
Рух скаўтаў з'явіўся ў 1907 годзе ў Вялікабрытаніі — у жніўні быў арганізаваны першы скаўцкі лагер на востраве Браўнсі. Афіцэр кавалерыі Роберт Бадэн-Паўэл пачаў распрацоўваць новы метад працы ў малых групах для навучання сваіх салдат і заадно рыхтаваў маладых скаўтаў, альбо разведчыкаў. Сучасны скаўтынг (Федэрацыя скаўтаў Еўропы) падзяляе педагогіку на тры ўзроўні, або «галіны», у залежнасці ад узросту ўдзельніка. Малодшая «Жоўтая галіна» разлічана на дзяцей 10—12 гадоў. «Зялёная галіна» — гэта педагогіка для падлеткаў. Старэйшая «Чырвоная галіна» разлічана на дзяўчат і хлопцаў ва ўзросце ад 18 гадоў.
На Беларусі гэты рух з'явіўся каля 12 гадоў таму. Сёння колькасць прадстаўнікоў каталіцкага скаўтынгу налічвае больш за 500 чалавек. Скаўты працуюць пры парафіях у Мінску, Гомелі, Гродна, Віцебску, Івянцы, Лынтупах, Паставах, Барысаве. Стаць скаўтам можа кожны, хто належыць да каталіцкай царквы і мае ахвоту і жаданне развівацца самому і дапамагаць у развіцці іншым. Грашовы ўнёсак складае 30 тысяч рублёў за год.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!