Па выніках апублікаванага рэйтынгу ўніверсітэтаў свету вядомага брытанскага агенцтва QS (THE — QS World Unіversіty Rankіngs) БДУ ўвайшоў у ТОП‑500 лепшых універсітэтаў свету і размясціўся ў групе ВНУ, якія займаюць 491–500 пазіцыю. Упершыню за ўсю гісторыю ўдзелу ў сусветных рэйтынгах беларускі ўніверсітэт размясціўся так высока.
Брытанскае агенцтва QS ужо 10 гадоў ранжыруе ўніверсітэты свету, і ў ТОП-ліст звычайна ўключаюцца толькі першыя 700–800 вышэйшых навучальных устаноў, або 3% ад усіх універсітэтаў свету.
Рэйтынг абапіраецца на аналіз звестак аб вышэйшай навучальнай установе і апытанні незалежных экспертаў. Ацэньваюцца акадэмічная рэпутацыя ўніверсітэта, вынікі апытанняў працадаўцаў, індэкс цытавання навуковых работ за апошнія пяць гадоў, суадносіны колькасці выкладчыкаў і студэнтаў, колькасць замежных студэнтаў і выкладчыкаў.
Узначальвае рэйтынг Масачусецкі тэхналагічны інстытут (ЗША). За ім ідзе Кембрыджскі ўніверсітэт (Вялікабрытанія). З расійскіх ВНУ лепшыя, чым у БДУ, пазіцыі ў Маскоўскага дзяржаўнага ўніверсітэта (114), Санкт-Пецярбургскага дзяржаўнага ўніверсітэта (233), МДТУ імя Баўмана (322) і яшчэ ў шасці ўніверсітэтаў.
З беларускіх ВНУ ў рэйтынгу QS прадстаўлены толькі Беларускі нацыянальны тэхнічны ўніверсітэт (701+).
Вядучыя ўніверсітэты суседніх краін занялі ў рэйтынгу наступныя пазіцыі: Варшаўскі ўніверсітэт (335), Тартускі ўніверсітэт (379), Кіеўскі нацыянальны ўніверсітэт імя Тараса Шаўчэнкі (421–430), Талінскі тэхнічны ўніверсітэт (501–550), Вільнюскі ўніверсітэт (551–600) і Латвійскі ўніверсітэт (701+).
Трэба дадаць, што БДУ ў апошнія гады прадстаўлены ў міжнародных рэйтынгах вельмі годна і пастаянна ўваходзіць у «вышэйшую лігу».
Надзея НІКАЛАЕВА
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.
