У панядзелак сур'ёзныя дажджы, а з аўторка — холадна
Гэтымі днямі на тэрыторыі нашай краіны будзе і надалей гаспадарыць антыцыклон, таму ападкаў не будзе, паведаміла рэдакцыі спецыяліст Рэспубліканскага гідраметцэнтра Мінпрыроды Вольга Фядотава.
Тэмпература паветра ўдзень складзе 16-21 цяпла. І ў суботу ў нас захаваецца павышаны фон атмасфернага ціску, аднак у паўднёва-заходніх рэгіёнах краіны пачне адчувацца ўплыў атмасферных франтоў, якія рухаюцца да нас з боку Заходняй Еўропы. Уначы па крайнім захадзе, а ўдзень і ўвогуле па паўднёва-заходняй палове краіны пройдуць кароткачасовыя дажджы. Раніцай месцамі туман. Тэмпература паветра ўначы на суботу складзе ад 1 цяпла па ўсходзе, да плюс 11 градусаў па захадзе краіны. На ўсходзе Беларусі ўначы на глебе магчымы слабыя замаразкі да 0 — мінус 2 градусаў. Удзень будзе плюс 13-20 градусаў. У нядзелю франтальны раздзел працягне рухацца далей на ўсход. Таму месцамі там чакаюцца кароткачасовыя дажджы. Тэмпература ўначы на нядзелю складзе плюс 3-10 градусаў, а ўдзень — 12-20 цяпла.
Паводле доўгатэрміновых прагнозаў айчынных спецыялістаў, на пачатку наступнага тыдня надвор'е пагоршыцца. У панядзелак дажджы чакаюцца амаль па ўсёй тэрыторыі Беларусі. Удзень месцамі прагназуюцца сапраўды моцныя дажджы, часам з навальніцамі і моцным ветрам. Уначы на панядзелак будзе плюс 5-11 градусаў, удзень — толькі 10-17 цяпла, у Гомельскай вобласці да плюс 20 градусаў. Бліжэй да сярэдзіны наступнага тыдня ў Беларусь прыйдзе халоднае паветра з боку Скандынавіі. Чакаецца ветранае надвор'е, месцамі з кароткачасовымі дажджамі. Тэмпература паветра ўначы складзе плюс 1-6 градусаў, а ўдзень — усяго 7-14 цяпла. Згадзіцеся, што гэта ўжо сур'ёзна. Аднак сіноптыкі разлічваюць, што недзе праз тыдзень нас яшчэ парадуе бабіна лета.
Сяргей КУРКАЧ.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.
