У спажывецкім лізінгу выкарыстанне замежнай валюты Нацбанкам нават не разглядаецца
Учора 12 лізінгавых арганізацый краіны атрымалі пасведчанне аб уключэнні ў рэестр Нацбанка. Вядома, што з першых дзён верасня юрыдычныя асобы, якія маюць намер ажыццяўляць лізінгавую дзейнасць на сістэматычнай аснове, абавязаны ў вызначаным парадку звярнуцца ў Нацыянальны банк з заявай аб уключэнні ў рэестр лізінгавых арганізацый. Пры гэтым юрыдычныя асобы, якія ажыццяўлялі лізінгавую дзейнасць на гэтую дату, маюць права займацца лізінгам без уключэння ў рэестр да 1 сакавіка 2015 года.
Намеснік старшыні праўлення Нацбанка Сяргей Дубкоў патлумачыў кіраўнікам гэтых кампаній, што лізінгавым арганізацыям з моманту ўключэння ў рэестр будуць прад'яўляцца патрабаванні па раскрыцці інфармацыі аб лізінгавай дзейнасці ў парадку, вызначаным Нацбанкам.
Сяргей Дубкоў таксама адзначыў, што зараз актыўна вядзецца распрацоўка адпаведнага заканадаўства, якое дазволіць выкарыстоўваць так званы спажывецкі лізінг здзелак па нерухомасці. Аднак спецыяліст падкрэсліў, што выкарыстанне замежнай валюты па такіх здзелках на цяперашнім этапе цалкам выключаецца. Спецыяліст тут жа патлумачыў, што будзе зроблена ў бліжэйшы час для таго, каб знізіць стаўкі па лізінгавых аперацыях. Нагадаю, што цяпер яны аказваюцца для фізічных асоб значна даражэйшымі за крэдыт, у першую чаргу за кошт выплаты па такіх аперацыях падатку на дабаўленую вартасць (ПДВ) у памеры 20%.
Пытанне аб адмене ПДВ для «фізікаў» будзе вырашана ўжо сёлета, бо праект адпаведных змен у Грамадзянскім кодэксе ўжо ўзгоднены і накіраваны ў Палату прадстаўнікоў. На восеньскай сесіі дэпутаты разлічваюць прыняць яго ў двух чытаннях, паведаміў Сяргей Дубкоў.
Адмена ПДВ — не адзіны неабходны крок. «Заканадаўства дзейнічае часта па прынцыпе «што не дазволена, то забаронена». Таму нам трэба практычна ва ўсе лакальныя дакументы ўнесці змены аб магчымасці лізінгу для фізічных асоб. І гэта не механічная работа, а глабальная перапрацоўка», — адзначыў суразмоўца.
Намеснік старшыні Нацбанка асобна спыніўся на тэме псеўдавалютнага лізінгу, па якім у спецыялістаў ёсць дакладнае разуменне, што гэта пэўны сурагат валютнага крэдытавання, якое банкам забаронена.
Першымі ў рэестр лізінгавых кампаній, у прыватнасці, уключаны акцыянерныя таварыствы «АСБ Лізінг», «Інтэркансалтлізінг», «РЕСТ-БелЛізінг», «Астра-Лізінг», ТАА «Фінпрафіт», «Дэн Інвест», «Смарт Партнёр», «Белрасаграсэрвіс», «Райфайзен-Лізінг», «Прыват-Лізінг», «Авангард-Лізінг» і «Цэнтрыус-Лізінг».
Сяргей КУРКАЧ
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».