або Як можна паўплываць на свядомасць бацькоў?
Як забяспечыць даступнасць дашкольнай адукацыі? Ці мэтазгодна адкрываць міні-садкі на першых паверхах шматкватэрных дамоў? Што перашкаджае стварэнню ў Беларусі прыватных дзіцячых садкоў і прыцягненню прыватнага капіталу ў гэту сферу? Хто можа працаваць на пасадзе выхавальніка ва ўстановах дашкольнай адукацыі? Як спыніць у дзіцячых садках паборы з бацькоў? Гэтыя і многія іншыя пытанні, якія тычацца функцыянавання сістэмы дашкольнай адукацыі, аказаліся ў цэнтры ўвагі членаў рабочай групы па комплексным аналізе спраў у сістэме адукацыі. «Дэсант» прафесіяналаў высадзіўся ў Капылі, а пляцоўку для дыскусіі прадаставіў санаторны яслі-сад, размешчаны ў райцэнтры. Між іншым, экскурсія па садку, арганізаваная для гасцей, таксама падштурхнула членаў рабочай групы да пэўных высноў...
У крокавай даступнасці
— Наша з вамі задача — усё прааналізаваць, абагульніць і накіраваць свае прапановы кіраўніку дзяржавы, каб затым можна было ўнесці адпаведныя карэкціроўкі ў нарматыўную і заканадаўчую базу, — падкрэсліў віцэ-прэм'ер беларускага ўрада, кіраўнік рабочай групы Анатоль ТОЗІК. — Упэўнены, што ў нас ёсць магчымасць у рамках тых фінансавых рэсурсаў, што мы маем сёння, вырашыць усе праблемы, у тым ліку забяспечыць работнікам дзіцячых садоў годны заробак. І самі садкі забяспечыць усім неабходным, каб бацькам не даводзілася несці туды то сшытак, то аловак, то мыла.
У чарзе на прадастаўленне месца ў дзіцячым садку сёння стаяць па краіне 29 тысяч дзяцей дашкольнага ўзросту— гэта дзеці, якім не змаглі на момант звароту бацькоў прапанаваць месца ў дзіцячым садку па месцы жыхарства сям'і. Праблема ў забеспячэнні ўстаноў дашкольнай адукацыі крокавай даступнасці актуальная найперш для мікрараёнаў-новабудоўляў. Толькі ў сталічным мікрараёне «Каменная Горка» ў чарзе стаяць больш як 7 тысяч чалавек.
— Шчыра кажучы, я зусім не разумею сталічныя ўлады: як можна ўводзіць у эксплуатацыю жылыя дамы, не спланаваўшы, каб на момант іх засялення побач ужо былі ўзведзены дзіцячы сад і школа? — задаў зусім не рытарычнае пытанне Анатоль Тозік. — Я не разумею, чаму мы ніяк не можам зрушыць з месца праблему стварэння невялікіх дзіцячых садкоў, садкоў сямейнага тыпу, асабліва ў сельскіх населеных пунктах?
Сёння знята забарона на размяшчэнне дашкольных устаноў на першых паверхах жылых дамоў. Чаму ніхто не карыстаецца прадастаўленай магчымасцю? Чаму не ствараюцца невялікія дзіцячыя садкі (на 40-50 чалавек), якія хутчэй забяспечаць крокавую даступнасць? За мяжой на буйных прадпрыемствах ствараюцца карпаратыўныя дзіцячыя садкі, куды бацькі, ідучы на работу, могуць завесці сваё дзіця, і яно знаходзіцца там пад наглядам педагогаў, пакуль дарослыя працуюць.
А ў нас мы назіраем рэчы, якія зусім не адпавядаюць здароваму сэнсу і прынцыпам справядлівасці. Сёння ў бацькоў ёсць магчымасць не адпраўляць сваё дзіця ў школу ў 6 гадоў, чым многія актыўна і карыстаюцца. Каля 25 тысяч дзяцей без усялякіх падстаў засталіся ў садку яшчэ на год. І на іх утрыманне дзяржава выдаткоўвае паўтрыльёна рублёў. Атрымліваецца, што пры існаванні дэфіцыту месцаў у дашкольных установах шасцігадовае дзіця, якога чакалі ў школе, займае ў садку фактычна чужое месца? А бюджэт нясе неабгрунтаваную дадатковую нагрузку...
Анатоль Тозік прапанаваў (і ўсе прысутныя яго падтрымалі) занатаваць у дакументах, што пакідаць дзіця ў дзіцячым садку да сямі гадоў можна толькі пры наяўнасці медыцынскіх паказанняў, а калі дзіця і фізічна, і псіхалагічна гатова да навучання ў школе, то яно павінна вызваліць месца для іншага. А калі бацькі ўсё ж хочуць працягнуць бесклапотнае жыццё для сваёй малечы (і, чаго таіць, для сябе) яшчэ на год, то няхай цалкам аплачваюць знаходжанне дзіцяці ў садку.
Між іншым, медыкі сцвярджаюць, што надзеі бацькоў на тое, што дзіця за лішні год знаходжання ў дашкольнай установе падужэе і перастане хварэць, часцей за ўсё не спраўджваюцца. Рэспіраторная захваральнасць ва ўзроставай групе дзяцей ад 5 да 8 гадоў не зніжаецца. І толькі пасля дасягнення дзесяцігадовага ўзросту дзеці хварэюць радзей.
Штрафы — за «прагулы»
Незадаволены педагогі таксама і адсутнасцю законных падстаў для адлічэння дзяцей з садкоў: некаторыя бацькі прыводзяць дзіця ў садок усяго некалькі разоў за месяц. Штодня ад 25 да 30 працэнтаў выхаванцаў дашкольных устаноў не наведваюць садок без уважлівых прычын. Атрымліваецца, што бацькі браніруюць месца для свайго дзіцяці, а далей кіруюцца прынцыпам «хачу — вяду, а хачу — не вяду».
Выхавальнікі лічаць, што трэба дакладна сфармуляваць важкія прычыны адсутнасці выхаванцаў і ўстанавіць плату за дні, прапушчаныя без прычыны, як гэта было раней. А калі дзіця адсутнічае па няўважлівых прычынах працяглы час, то яго месца трэба перадаваць іншай сям'і, якая стаіць у чарзе і мае вострую патрэбу ва ўладкаванні дзіцяці ў садок...
23-38
Яслі — на платную аснову?
— А чаму мы выплачваем дзяржаўныя дапамогі маладым маці, якія аддаюць сваіх дзяцей у дзіцячы садок, яшчэ знаходзячыся ў дэкрэтным адпачынку? — пацікавіўся Анатоль Тозік. — Выходзіць, што мы двойчы іх «субсідзіруем»: дзяржава аплачвае ўтрыманне дзіцяці ў дзіцячым садку плюс выплачвае дапамогу на дзіця ва ўзросце да трох гадоў непрацуючай маці. Але ж ці справядліва гэта?
З іншага боку, калі маці выходзіць на працу, мы выплачваем ёй толькі палову ад устаноўленай дапамогі на дзіця да трох гадоў — незалежна ад таго, аддала яна сваё дзіця ў садок ці не. Калі маці выходзіць на працу і пакідае дзіця, скажам, на бабулю, не перакладваючы клопат на плечы дзяржавы, то навошта мы адбіраем у яе дапамогу? Можа, трэба ўвесці іншы крытэрый: калі маці аддае сваё дзіця да 3 гадоў у садок, не выходзячы на працу, мы пакідаем ёй дапамогу на дзіця, але кажам: калі ласка, за знаходжанне дзіцяці ў садку заплаціце, прычым, не толькі за харчаванне, як гэта практыкуецца сёння. На мой погляд, гэта будзе больш зразумела і справядліва.
Мушу канстатаваць, што ў бацькоў нярэдка прысутнічае спажывецкае стаўленне да дашкольнай адукацыі. І праблема ўтрыманства ў нашым грамадстве ўжо ператварылася ў пагрозу нацыянальнай бяспецы. Я нідзе ў іншых краінах не бачыў такіх раскошных умоў, якія мы ствараем для дзяцей у нашых садках, і такіх цудоўных умоў, якія ёсць у садку, дзе мы з вамі знаходзімся. Але ж дзяржаўны бюджэт — не бяздонны. Усе павінны гэта зразумець...
Партнёрства з прыватнікамі
Начальнік аддзела дашкольнай адукацыі Міністэрства адукацыі Альбіна ДАВІДОВІЧ расказала, што для таго, каб ліквідаваць чаргу, што стварылася на ўладкаванне ў дашкольныя установы, трэба пабудаваць аж 143(!) дзіцячыя садкі — для гэтага патрабуецца выдаткаваць 8,6 трлн рублёў. Але ж ці магчыма гэта зрабіць толькі за кошт сродкаў мясцовых бюджэтаў, без прыцягнення сродкаў забудоўшчыкаў?
Дзейснай мерай магло б стаць размяшчэнне дзіцячых садкоў ці асобных груп на першых паверхах шматпавярховікаў і павелічэнне колькасці сямейных садкоў у тых раёнах, дзе будаўніцтва асобнага дзіцячага садка нерэнтабельнае. Але для павелічэння колькасці сямейных дзіцячых садкоў трэба спрасціць патрабаванні, што да іх прад'яўляюцца (як гэта было зроблена ў Расійскай Федэрацыі). Трэба павялічыць колькасць груп кароткачасовага знаходжання, зарыентаваўшы адкрыццё такіх груп на дзяцей ранняга ўзросту (да трох гадоў) і на дзяцей пяцігадовага ўзросту — для падрыхтоўкі апошніх да школы.
Магчыма, варта часткова скарыстацца досведам Вялікабрытаніі, Ізраіля, ЗША, Чэхіі, дзе паслугі для дзяцей ранняга ўзросту аказваюцца выключна прыватнымі структурамі на платнай аснове.
— Актыўнае прыцягненне ў сферу дашкольнай адукацыі прыватных структур і сродкаў прыватных інвестараў дазволіць, з аднаго боку, зменшыць выдаткі дзяржбюджэту, а з другога — паспрыяе здаровай канкурэнцыі на рынку адукацыйных паслуг, — падзялілася сваім поглядам Альбіна Давідовіч. — Мяркуем, што трэба ў бліжэйшы час наладзіць работу на мясцовым узроўні па прагназаванні сетак такіх устаноў адукацыі, ствараючы для гэтага адпаведныя ўмовы. Напрыклад, сфарміраваць у кожным рэгіёне пералік будынкаў, якія могуць быць аддадзены пад прыватныя дзіцячыя сады, і асабліва шырока інфармаваць пра гэта ўсіх зацікаўленых, у тым ліку і аб парадку адкрыцця дзіцячых садкоў прыватнай формы ўласнасці.
На нарадзе прагучала прапанова правесці конкурс сярод архітэктараў або выпускнікоў архітэктурнага факультэта на праект сучаснай дашкольнай установы, каб адысці ад тыпавых праектаў...
Грошы — услед за дзіцем
— Мы прапануем у наступным годзе ўвесці ў бюджэтным заканадаўстве норму, якая дазваляла б мясцовым бюджэтам выдзяляць грошы на паслугі дашкольнай адукацыі любой установе і любой юрыдычнай асобе, якія бяруцца гэтую паслугу выканаць, — паведаміў Анатоль Тозік. — Сёння выдаткі на аднаго выхаванца складаюць 19-20 мільёнаў рублёў, дык давайце адпраўляць гэтыя грошы ўслед за дзіцем. Тыя сродкі, што закладзены дзяржавай на ўтрыманне дзіцяці ў дзяржаўнай установе, можна аддаць і прыватніку.
Пакуль што ў краіне дзейнічаюць усяго 10 прыватных дзіцячых садкоў, 7 з якіх размешчаны ў Мінску. І калі бацькі выбіраюць, у якую дашкольную ўстанову аддаваць сваё дзіця — дзяржаўную або прыватную — часцей за ўсё зыходзяць са сваіх фінансавых магчымасцяў, бо плата за наведванне прыватных устаноў дасягае 500 умоўных адзінак у месяц. Магчыма, калі з бюджэту будзе пакрывац-ца хоць частка выдаткаў, то прыватныя садкі стануць даступнымі для большай колькасці сем'яў?
Яшчэ адна перашкода для з'яўлення новых прыватных садкоў — высокі кошт іх будаўніцтва, а таксама куплі або арэнды памяшканняў, якія адпавядалі б усім санітарным нормам і правілам для дзіцячых устаноў. Увогуле жорсткія патрабаванні санітарнай службы да функцыянавання дашкольных устаноў нярэдка ставяць «крыж» і на адкрыцці невялікіх дзіцячых садкоў у прыстасаваных памяшканнях. Скажам, шматдзетная сям'я можа жыць у прыватным доме з адным санвузлом (агульным і для дарослых, і для дзяцей), звычайнай кухняй, адным уваходам (без дадатковага пажарнага выхаду), дзе маці і бацька — і выхавальнікі, і кухары, і прыбіральшчыкі ў адной асобе, а вось для дашкольнай установы на 6—7 дзяцей дзейнічаюць зусім іншыя крытэрыі.
— Прабачце, ну няўжо шматдзетная маці выкарыстоўвае на сваёй кухні некалькі апрацоўчых сталоў? — запытаўся Анатоль Тозік. — Дык чаму для дзіцячага садка сямейнага тыпу мы прад'яўляем невыканальныя патрабаванні?
Штогадовы ўзнос
Што датычыцца пастаянных пабораў у дзіцячых садках, то, як запэўніла Альбіна Давідовіч, набыццё мыйных і гігіенічных сродкаў фінансуецца з бюджэту, таму дзеянні кіраўніцтва дзіцячага садка, якое прапануе бацькам самастойна паклапаціцца пра набыццё, скажам, мыла, патлумачыць немагчыма:
— У Пастанове Міністэрства адукацыі № 50 прыведзены дакладны пералік таго, што павінна набывацца за кошт сродкаў бацькоў — а гэта выключна сродкі навучання. Але на практыцы, мы ведаем, бацькам выдаюцца зусім іншыя спісы...
Каб не дапускаць такія непрыгожыя сітуацыі, ёсць прапанова пераняць досвед краін, дзе практыкуюцца першапачатковыя ўзносы пры паступленні дзіцяці ў садок. Магчыма таксама ўвесці фіксаваную суму штогадовага ўнёску на матэрыяльна-тэхнічнае забеспячэнне ўстановы адукацыі...
Дарэчы, у Расіі развялі два паняцці «дашкольная адукацыя» і «догляд за дзіцем». За дзённы догляд там устаноўлена аплата.
І яшчэ адну важную праблему ўзняла Альбіна Давідовіч:
— Толькі 14% груп у дашкольных установах арганізуюць адукацыйны працэс на беларускай мове. Патрэба ёсць, але няма дастатковага кадравага і навукова-метадычнага забеспячэння. Нам трэба павялічваць колькасць такіх груп і забяспечваць адукацыйны працэс вучэбнымі дапаможнікамі на беларускай мове. Рашэнне гэтай праблемы залежыць як ад Міністэрства адукацыі, у прыватнасці, у пытаннях стварэння вучэбных выданняў і падрыхтоўкі кадраў, так і ад упраўленняў і аддзелаў адукацыі на месцах.
Надзея НІКАЛАЕВА.
Фота аўтара.
Мінск — Капыль — Мінск.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».