Ёсць жыццёвая пазіцыя — заяві!
Грамадскае аб’яднанне «Беларускі рэспубліканскі саюз моладзі» аб’явіла старт адкрытага дыялогу «Моладзь Беларусі: традыцыі і будучыня». Мэта агульнарэспубліканскага праекта — даць магчымасць маладым людзям заявіць пра сваю актыўную жыццёвую пазіцыю і ўмацаваць у грамадскай свядомасці імідж моладзі як актыўнай часткі беларускага грамадства.
Тэмы, пытанні, праблемы і прапановы, узнятыя падчас правядзення адкрытага дыялогу, і стануць асновай для вызначэння новага вектара ў рабоце з моладдзю — як з боку грамадскіх фарміраванняў, так і з боку органаў дзяржаўнай улады. На ўсіх этапах адкрыты дыялог будзе праходзіць з выкарыстаннем інтэрнэт-рэсурсаў, сацыяльных сетак, з прыцягненнем сродкаў масавай інфармацыі — каб запрасіць да дыялогу як мага больш шырокае кола ўдзельнікаў: прадстаўнікоў грамадскіх арганізацый і аб’яднанняў, культуры, навукі, палітыкі, бізнесу, вядомых спартсменаў, маладых людзей, якія дасягнулі высокіх вынікаў у розных сферах дзейнасці і г.д.
Інавацыйныя ідэі і крэатыўныя прапановы па актуальных пытаннях маладзёжнай палітыкі стануць асновай пры падрыхтоўцы і правядзенні агульнарэспубліканскага дыялогу. Плануецца, што дыялог «Моладзь Беларусі: традыцыі і будучыня» стане адкрытай пляцоўкай як для моладзі Беларусі, так і для міжнароднай супольнасці. Ідэі, канцэпцыі, праграмы, стратэгіі і інавацыі ў сферы маладзёжнай палітыкі будуць акумуляваны для ўнясення прапаноў у рэспубліканскія органы дзяржаўнай улады.
«Чырвонка» таксама далучаецца да адкрытага дыялогу і дае слова першаму неабыякаваму прадстаўніку беларускай моладзі.
Яўген КІСЛЫ, выпускнік БДУ, галоўны спецыяліст аддзела ідэалагічнай работы, культуры і па справах моладзі Свіслацкага раённага выканаўчага камітэта, удзельнік праекта «Разумныя сеткі» (27 гадоў):
— Дзяржаўная маладзёжная палітка — гэта сад, які прыносіць плады не тым людзям, якія яго закладвалі. Аднак, адмовіўшыся ад «інвестыцый у моладзь», можна застацца без будучыні.
Паняцце «маладзёжная палітыка» надзвычай шырокае: яно ўключае сістэму сацыяльных, эканамічных, палітычных, арганізацыйных і прававых захадаў, скіраваных на падтрымку маладых грамадзян, сістэму дзяржаўных прыярытэтаў, скіраваную на паспяховую сацыялізацыю і самарэалізацыю моладзі, на стварэнне ўмоў, якія спрыяюць сацыяльнай актыўнасці моладзі, і многае, многае іншае.
Але хто павінен вырашаць усе гэтыя спецыфічныя задачы? Хто павінен каардынаваць дзяржаўную маладзёжную палітыку? На раённым узроўні яе праблемамі сёння займаецца адна структура — раённы камітэт грамадскага аб'яднання «Беларускі рэспубліканскі саюз моладзі». Фактычна на грамадскую арганізацыю ўскладаюцца агульнадзяржаўныя задачы. Аднак трэба мець на ўвазе, што дзейнасць БРСМ распаўсюджваецца не на ўсіх маладых людзей, а толькі на членаў арганізацыі. Да таго ж фінансаванне грамадскага аб'яднання «БРСМ» недастатковае, адчуваюцца цяжкасці з матэрыяльным забеспячэннем яго мерапрыемстваў і акцый. Ёсць і яшчэ адна праблема: раённыя камітэты БРСМ падпарадкоўваюцца толькі свайму абласному кіраўніцтву, а таму канфлікты паміж раённымі камітэтамі маладзёжнай грамадскай арганізацыі і выканаўчай уладай на месцах непазбежныя.
З улікам вышэйсказанага прапаную стварыць самастойны орган выканаўчай улады пры Савеце Міністраў са статусам юрыдычнай асобы (або міністэрства, або дэпартамент), які будзе адказваць за дзяржаўную маладзёжную палітыку, планаваць, рэалізоўваць яе, а таксама каардынаваць і кантраляваць усе грамадскія маладзёжныя аб'яднанні ў краіне.
Трэба выпрацаваць дакладную сістэму сацыяльных «ліфтаў» (у спорце, адукацыі і г.д.). Узроставую планку для маладых людзей, мяркую, трэба пасунуць: каб у катэгорыю маладых траплялі людзі ва ўзросце да 35 гадоў. Неабходна распрацаваць празрыстую сістэму крэдытнай дапамогі маладым людзям пры атрыманні вышэйшай і наступнай адукацыі, для будаўніцтва жылля, на спажывецкія патрэбы, пры нараджэнні дзіцяці і г.д. Каб узмацніць прысутнасць маладых людзей у палітычным жыцці грамадства, можна прадугледзець магчымасць прысутнасці моладзі на пасяджэннях міністэрстваў, аблвыканкамаў, Саветаў дэпутатаў, палат парламента.
Маладым людзям, якія знаходзяцца ў месцах пазбаўлення волі, трэба даць рэальную магчымасць да вызвалення атрымаць рабочую спецыяльнасць (трактарыста, электрыка, плітачніка, печніка і гэтак далей) з наступнай магчымасцю працаўладкавання. У гэтай катэгорыі маладых людзей пры жаданні павінна быць магчымасць атрымліваць сярэднюю спецыяльную і вышэйшую адукацыю.
Можна было б прадумаць механізмы прыцягнення перспектыўнай моладзі з «трэціх краін», прапрацаваць для іх сістэму страхавання, перанавучання, моўныя курсы, паскорыць атрыманне пасведчання на права жыхарства і іншыя захады. Яшчэ адзін важны напрамак — актывізацыя супрацоўніцтва з Еўрасаюзам па ўсіх кірунках дзяржаўнай маладзёжнай палітыкі, у тым ліку і ў рамках Балонскага працэсу.
Надзея НІКАЛАЕВА.
P.S. Калі вам ёсць што сказаць, далучайцеся да дыялогу...
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».