Без настаўніка не можа быць нармальнага грамадства і дзяржавы
Прэзідэнт Аляксандр Лукашэнка напярэдадні Дня настаўніка сустрэўся з фіналістамі рэспубліканскага конкурсу прафесійнага майстэрства педагогаў «Настаўнік года Рэспублікі Беларусь». На сустрэчы ў дружалюбнай атмасферы абмяркоўваліся самыя розныя пытанні, якія датычацца развіцця беларускай школы.
4-22
У першую чаргу кіраўнік дзяржавы падкрэсліў важнейшую ролю прафесіі настаўніка ў сучасным грамадстве, паведамляе БЕЛТА. «Мы жывём у дынамічны час. Удасканальваецца сістэма адукацыі, узбагачаецца яе змест, укараняюцца новыя тэхналогіі, але пры гэтым нязменнай застаецца найвялікшая роля настаўніка. Няма важнейшага ў грамадстве чалавека, чым настаўнік. Без настаўніка не можа быць нармальнага грамадства і дзяржавы», — падкрэсліў беларускі лідар.
Паводле слоў Аляксандра Лукашэнкі, сапраўдны настаўнік — гэта не толькі дасведчаны выкладчык, але і цікавы чалавек, які здольны захапіць дзяцей сваім прадметам, абудзіць у іх энтузіязм і творчую энергію. Прэзідэнт адзначыў, што сучасныя вучні могуць чэрпаць інфармацыю не толькі з кніг і падручнікаў, але і з інтэрнэту, умеюць свабодна абыходзіцца з камп'ютарам. «І школа павінна адпавядаць гэтым рэаліям. Настаўнік не можа адставаць ад вучняў. Яму неабходна стаць аўтарытэтным і дасведчаным старэйшым таварышам. У той жа час у яго багажы павінны быць асноўныя веды і каштоўнасці, напрацаваныя многімі пакаленнямі папярэднікаў»,— упэўнены кіраўнік дзяржавы.
На сустрэчы Прэзідэнт узняў пытанне ўзаемаадносін школы і сям'і. «Бясспрэчны факт, што толькі сумеснымі намаганнямі бацькоў і дзяцей мы зможам падрыхтаваць нашых дзяцей да самастойнага жыцця. І тое, што апошнім часам усё больш і больш мы пачынаем канстатаваць факты негатыўнага ў нашым грамадстве, звязана з вялікім бракам — вашым і маім, — заявіў Аляксандр Лукашэнка. — Тое, што ў нас заложнікаў захопліваюць, кураць, п'юць, больш за тое, ужываюць наркотыкі, — вялікі мінус вам і мне як прадстаўніку ўлады. І мы з гэтым павінны разабрацца, прытым самым радыкальным чынам».
Паводле слоў Аляксандра Лукашэнкі, у гэтай сітуацыі, вядома, можна спасылацца на тое, што дзеці знаходзяцца пад вялікім уплывам вуліцы, свайго асяроддзя і іншых працэсаў. «Але гэта нам дадатковая нагрузка. Усё роўна яны прыходзяць у школу, і мы павінны быць настолькі таленавітымі, каб паказаць, што няправільна», — сказаў кіраўнік дзяржавы.
Прэзідэнт закрануў і праблемы, якія існуюць у сферы адукацыі. «У адрас сістэмы адукацыі гучыць нямала нараканняў, прытым справядлівых. Гэта датычыцца зместу і складанасці вучэбных праграм, якасці падручнікаў, падыходу да моўнай падрыхтоўкі вучняў, шостага школьнага дня і іншых пытанняў. Па маім даручэнні адна камісія ўжо скончыла працаваць, і я катэгарычна не задаволены тым, як праходзіла гэтая работа (асабліва на апошняй стадыі), і ўмяшаннем асобных чыноўнікаў у яе работу. Цяпер разбіраюцца праваахоўныя органы. Ацэнку атрымаюць усе, хто спрабаваў уплываць на вынік работы гэтай камісіі, — заявіў кіраўнік дзяржавы. — Тым не менш мне давялося назначыць паўторную групу спецыялістаў, якія вывучаць усе існуючыя сёння ў школе праблемы — ад скаргаў настаўнікаў на празмерныя нагрузкі (інфармацыі, справаздачы) да скаргаў вучняў, якія не ўспрымаюць тое, чаго не павінна быць у школе». Прэзідэнт падкрэсліў, што да адпаведнай работы неабходна прыцягнуць лепшых настаўнікаў Беларусі, у тым ліку пераможцаў конкурсу «Настаўнік года» розных гадоў.
Што датычыцца ўзроўню зарплат, Прэзідэнт адзначыў, што, нягледзячы на цяжкасці ў эканоміцы, зацяжны сусветны крызіс, апошнім часам былі прыняты рашэнні, накіраваныя на павышэнне матэрыяльнага стымулявання працы настаўнікаў. Разам з тым, Аляксандр Лукашэнка заўважыў, што ў гэтым пытанні многае залежыць і ад саміх педагогаў, іх здольнасці пераарыентавацца і выбудаваць сваю работу з вучнямі ў адпаведнасці з сучаснымі патрабаваннямі, у тым ліку больш шырока выкарыстоўваць дадатковыя заняткі, розныя гурткі і факультатывы.
Гаворачы аб школьных праграмах, Аляксандр Лукашэнка заўважыў, што ў іх пакуль яшчэ шмат фармалізму, асабліва па гуманітарных дысцыплінах. У якасці прыкладу кіраўнік дзяржавы прывёў беларускую літаратуру: «Васіль Быкаў не быў маім прыхільнікам, але ў яго ёсць выдатныя творы — тое, што мы і нашы дзеці павінны ведаць. Але ёсць некаторыя (аўтары, уключаныя ў школьную праграму. — Заўвага БЕЛТА), якія толькі прозвішча беларускае маюць, а чытаць няма чаго».
На сустрэчы таксама абмяркоўваўся змест школьнага курса гісторыі — у прыватнасці, звестак аб Вялікай Айчыннай і Другой сусветнай войнах. Аляксандр Лукашэнка падкрэсліў неабходнасць процістаяць спробам нівеліраваць і забраць у беларускага народа Вялікую Перамогу над фашызмам. Гаворачы ў цэлым аб гісторыі, Прэзідэнт заявіў аб недапушчальнасці яе перапісвання пад тую ці іншую асобу, уключаючы кіраўніка дзяржавы. «Гэта павінна быць аб'ектыўна і сумленна — як было, так трэба і падаваць», — лічыць беларускі лідар.
Аляксандр Лукашэнка таксама запэўніў, што на пасадзе кіраўніка дзяржавы не мае намеру прыкладаць нейкія асаблівыя намаганні, каб прыцягнуць на свой бок прадстаўнікоў творчай інтэлігенцыі: «Гэта ўніжэнне інтэлігенцыі, і я ніколі, пакуль буду Прэзідэнтам, не буду іх прымушаць усхваляць мяне і мой перыяд кіраўніцтва. Гэта пасля мяне яны няхай ацэняць».
На сустрэчы таксама ўзнімалася моўнае пытанне. У гэтым плане Аляксандр Лукашэнка чарговы раз падкрэсліў важнасць захавання і вывучэння абедзвюх дзяржаўных моў — як беларускай, так і рускай. У гэтым, паводле яго слоў, у тым ліку заключаецца багацце беларускага народа.
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.