Вытворчасць шампанскага віна, дакладней, віна пеністaгa, якое насычана вуглякіслым газам з-за натуральнага браджэння, была наладжана ў самым пачатку XVІІІ стагоддзя. Спачатку лішак вуглекіслаты лічыўся заганай віна, але потым вінаробам прыйшло ў галаву, што пры правільным «маркетынгу» ён можа сысці за вартасць. Пераказваць гісторыю французскага шампанскага няма сэнсу, бо яе можна знайсці ў любой энцыклапедыі. Але даведацца, як арыстакратычны напой з'явіўся на нашай зямлі, спадзяюся, будзе карысным для чытача.
[caption id="attachment_55753" align="alignnone" width="600"] «Абед з вустрыцамі» Жана-Франсуа дэ Труа (1735 год) лічыцца самой першай фіксацыяй шампанскага ў выяўленчым мастацтве. Прыкладна ў гэты ж час яно пачало пранікаць у Рэч Паспалітую.[/caption]
Першыя згадкі пра шампанскае ў Рэчы Паспалітай з'явіліся ў эпоху кіравання караля Аўгуста ІІІ (1733 — 1763 гады). У тыя часы самым каштоўным віном у шляхты лічыўся венгерскі такай, за ім — рэйнскія віны, потым французскія, іспанскія, кіпрскія, і толькі ў апошнюю чаргу — малдаўскія віны. Такай як самы дарагі пілі «на штэмпель» — у самім канцы бяседы, каб зафіксаваць менавіта яго смак. Са з'яўленнем жа шампанскага (спачатку толькі пры каралеўскім двары і на дварах найбагацейшых і ўплывовых магнатаў) «на штэмпель», пасля такаю, сталі піць менавіта яго. Яшчэ не асабліва разбіраючыся ў смаку навінкі, але проста з меркаванняў багацця і прэстыжу. Калі самае дарагое віно ў Варшаве апошняга дзесяцігоддзя XVІІІ стагоддзя каштавала 120 грошай за бутэльку, дык шампанскае — утрая даражэй.
У першыя дзесяцігоддзі гісторыі шампанскага на нашых землях ва ўсю Рэч Паспалітую ўвозіліся ўсяго толькі дзясяткі, пазней — сотні бутэлек у год. І толькі невялікая частка з іх магла дасягаць тэрыторыі сучаснай Беларусі — напрыклад, каралеўскай Гародні і радзівілаўскага Нясвіжа.
Некаторыя гісторыкі вінаробства ацэньваюць агульную колькасць разлітых і прададзеных ва ўсім свеце за цэлае ХVІІІ стагоддзе бутэлек шампанскага прыкладна ўсяго толькі ў 300 тыс. штук (мабыць, гэтая лічба істотна паменшаная). Але, напрыклад, адзін толькі сучасны Мінскі завод пеністых вінаў можа сёння выпускаць каля 10 мільёнаў бутэлек штогод! А за цэлае стагоддзе, такім чынам (пазычым яму даўгалецця), — цэлы мільярд бутэлек, або ў тры з лішнім тысячы разоў больш, чым уся правінцыя Шампань часоў французскай манархіі.
Пачаткова эпізадычны доступ да шампанскага мелі ледзьве 0,1% насельніцтва Рэчы Паспалітай, а рэгулярна піць яго маглі сабе дазволіць толькі некалькі сем'яў. Пры гэтым некаторыя замежнікі, якія наведвалі Варшаву таго часу, адзначаюць у сваіх дзённіках, што шампанскае на багатых бяседах лілося амаль як вада. Гэта асабліва датычылася баляў і прыёмаў, які даваў славуты сваёй эксцэнтрычнасцю Караль Радзівіл «Пане Каханку». Часам ён мог сабе дазволіць выдаць гасцям адразу тысячу бутэлек шампанскага за адзін вечар, не лічачы іншых напояў. Як, напрыклад, адбылося на адным з прыёмаў у гонар імянін расійскай імператрыцы Кацярыны ІІ — і гэта пры тым, што яны былі лютымі ворагамі.
Шампанскім на тагачасных банкетах, як правіла, запівалі вустрыц (таксама надзвычай дарагіх) — але менавіта гэтая дарагоўля і стымулявала марнатраўства «Пана Каханку». Найяснейшы князь імкнуўся паказаць усім, што вартасць меню на аднаго госця ў некалькі разоў перавышае гадавы прыбытак яго прыгоннага селяніна.
Шампанскае ўвозілася морам з Гамбурга і іншых паўночнаморскіх партоў у Гданьск — галоўны цэнтр імпартнага гандлю. Пры гэтым і ў самім Гамбургу выраблялі больш або менш якасную імітацыю пеністага напою, з рэйнскіх вінаматэрыялаў, але наогул нямецкіх падробак асцерагаліся. Хадзілі чуткі, што немцы змешваюць таннае піва з галубіным гноем, і што такі пякельны кактэйль можа выклікаць цяжкія атручэнні. А шампанскае ж і так называлі «д'ябальскім віном» — з-за незвычайнай пеністасці, ды і з-за дарагоўлі.
Дарэчы, сучаснае нямецкае пеністае віно называюць sekt. І, што цікава, віно з такой назвай досыць часта сустракаецца ў рэестры выдаткаў магілёўскага магістрата яшчэ на мяжы XVІІІ-XІX стагоддзяў, хоць неабавязкова гэта было пеністае віно — магчыма, сухое рэйнскае, калі сучасная класіфікацыя вінаў яшчэ не канчаткова ўсталявалася.
Дзякуючы таму ж старажытнаму балтыйскаму шляху віннага экспарту, па якім шампанскае трапляла да нас, сапраўдныя яго знаўцы нядаўна атрымалі магчымасць пакаштаваць напой больш як 200-гадовай вытрымкі. У 2010 годзе каля ўзбярэжжа Аландскіх астравоў (аўтаномнай вобласці Фінляндыі) на 50-метровай глыбіні былі знойдзены рэшткі затанулага ў першым дзесяцігоддзі XІX стагоддзя гандлёвага карабля, і ў тым ліку больш за 150 бутэлек шампанскага — пераважна знакамітага Veuve-Clіcquot («Удава Кліко»), але таксама і некалькі бутэлек Heіdsіeck. Да гэтага моманту самым старым у свеце шампанскім лічыліся 2 бутэлькі дома Perrіer-Jouet, разлітыя ў 1825 годзе. Мяркуецца, што патанулы карабель перавозіў шампанскае і іншыя грузы з Гданьска ў Санкт-Пецярбург. Напой, які, магчыма, адрасаваўся царскаму двару, выдатна захаваўся — дзякуючы сталай тэмпературы і адсутнасці сонечнага святла і кіслароду. Як і ўсе белыя віны, з узростам ён набыў насычаны бурштынавы колер і стаў саладзейшым, чым першапачаткова. Шампанскае таксама захавала сваю пеністасць, толькі бурбалкі сталі драбнюткага памеру.
Высокая папулярнасць шампанскага і яго дарагоўля прыводзілі да шматлікіх спроб імітацыі высакароднага напою — перадусім, яго пеністасці. Часам гэта была свядомая імітацыя — гэта значыць, ад пакупнікоў або гасцей не ўтойвалі, што прапанаваны ім напой шампанскім не з'яўляецца. А часам прадастаўлялі падробку, якую свядома выдавалі за сапраўднае віно.
(Заканчэнне матэрыяла чытайце тут:)
Кухмістр Верашчака
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».