Для многіх з нас паштальён— магічная прафесія з дзяцінства, з бадзёрага верша Самуіла Маршака, з мульціка аб Прастаквашыне, са старых кінастужак, дзе мужчыны (абавязкова ў фуражках) прыносілі рамантычным гераіням доўгачаканыя канверты... Так, калісьці быў сапраўдны бум на выпісванне газет, ліставанне. Але і цяпер, як лічыць Аксана ПАЎЛОВІЧ, паштальён 136-га мінскага аддзялення паштовай сувязі, што на Каменнай Горцы, працы на ўсіх хопіць. Карэспандэнты «Звязды» напярэдадні Сусветнага дня пошты змаглі ў тым пераканацца.
«Маёй любімай матулі»
Працоўны дзень у паштальёна звычайна распачынаецца а 7 гадзіне раніцы. Яшчэ раней паштовая машына прывозіць у аддзяленне мяхі з карэспандэнцыяй. І калі паштальёны сядаюць за свой стол, аператар сувязі па дастаўцы ўжо падрыхтаваў для іх свежыя нумары выданняў, канверты, якія застаецца толькі размеркаваць па сваіх адрасах. Гэтым і займаюцца ў 136-м аддзяленні 5 паштальёнаў. Пакуль Аксана Паўловіч разам з калегамі акуратна перабіраюць каляровыя газеты, вока трапляе на прыгожыя, вясёлыя паштоўкі сярод канвертаў з дзелавой перапіскай. У аддзяленні прыгадваюць, як людзі час ад часу забываюцца пісаць імёны, прозвішчы, прызнаюцца на вонкавым баку папяровых прамавугольнікаў у каханні, малююць сэрцайкі, а аднойчы, напэўна, дзіця па наіўнасці ў радку «Каму» так і напісала: «Маёй любімай матулі». На жаль, адрас адсутнічаў, а таму і паведамленне так і не трапіла ў рукі адрасата.
Дарэчы, па выданнях, якія выпісваюцца, тут можна лёгка скласці партрэт мясцовага жыхара. На вуліцах, што кожны дзень абыходзяць паштальёны 136-га аддзялення, попытам карыстаюцца грамадска-палітычныя выданні, часопісы, прысвечаныя тэме здароўя. Цікава, што на суседнім аддзяленні карціна адрозная. Тамтэйшыя шматпавярховікі пераважна насяляюць маладыя сем'і, а таму і выданні выпісваюцца зусім іншыя.
«Жонка, ты мяне разорыш!»
Гадзіннік яшчэ не перасягнуў 9 гадзін, а мы разам з нашай паштальёнкай ужо выйшлі з аддзялення і рухаемся да патрэбных ёй адрасоў. Спадарыня Аксана прызнаецца, што аб такой працы ніколі не марыла, аднак на выбар 5 гадоў таму паўплываў дэкрэт, пасля якога яна і вырашыла павесіць на плячо паштовую сумку.
— А мне вельмі зручна, — прызнаецца жанчына, якая разам з мужам выхоўвае
4 дзяцей. — Перад працай адводжу дзіця ў садок, пасля
16 гадзін яго забіраю, паспяваю прысвяціць час дзецям. Ды і жыву я недалёка ад майго паштовага аддзялення.
— А вам не здаецца, што ваша праца руцінная? — пытаюся.
— Не. Кожны дзень я разношу новыя выданні, размаўляю з маладымі мамамі, раю, на што лепей падпісацца. Старым таксама хочацца камусьці расказаць пра набалелае. Праца не прыелася, а наадварот. З часам усё больш люблю сваю дзейнасць. Я бачу, як многія людзі чакаюць нас, пытаюцца: «А ці прыйшлі да мяне паштоўкі?». Пенсіянеры часам просяць, каб дапамаглі ім за кватэру заплаціць, грошы на тэлефон пакласці. Мы ніколі ім не адмаўляем. Сёння многія збольшага і кантактуюць праз інтэрнэт, але наша праца сваёй значнасці таксама не страціла.
Цікава, што за раз паштальён бярэ з сабой для раскладкі да 7 кілаграмаў карэспандэнцыі. Акрамя звычайных лістоў, газет, прыносяць жыхарам заказнымі лістамі так званыя «пісьмы шчасця» — штрафы кіроўцам за перавышэнне хуткасці, няправільную паркоўку.
— Усе на іх рэагуюць па-рознаму. Некаторыя ўсміхаюцца, чакаюць, а адзін таварыш на мяне пастаянна крыўдзіцца. Нібы гэта я яму штрафы выпісваю. Ёсць нават пастаянныя «кліенты». Аднаму мужчыне прыходзяць штрафы на яго жонку. Дык ён аднойчы так і сказаў: «Божухна, ды яна мяне разорыць!».
Прыходзіцца працаваць Аксане Паўловіч і ў перадсвяточныя дні. Чаго варты Новы год, калі 31 снежня трэба і пошту разнесці, і святочны стол падрыхтаваць!
— У гэты дзень мы разносім дзецям падарункі ад Дзеда Мароза, — узгадвае Аксана, апускаючы газеты ў шэрыя скрыні аднаго са шматпавярховікаў. — Дзеці ад шчасця ў далоні пляскаюць! А за свой стол я не хвалююся. Нешта загадзя паспяваю сама прыгатаваць, а ў астатнім мне дапамагае мая вялікая сям'я. Малодшы сын на кухні на ўсе рукі майстар.
Мы выходзім з пад'езда, сустракаем мясцовую прыбіральшчыцу, якая просіць, каб мы якасна напісалі пра паштальёна, бо «яна і чалавек, і спецыяліст» добры. На ганку гэтага дома мы і развітваемся з суразмоўцай, якой за дзень трэба «абысці», пры наяўнасці пошты, 3 тысячы кватэр! Праца і сапраўды нялёгкая, але прыемная, калі ставішся да яе з любоўю, — як гэта робіць наша гераіня.
Тарас ШЧЫРЫ.
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.