Уладзімір Мулявін стаў персанажам. Хлопец з Екацярынбурга, заснавальнік і нязменны лідар калектыву «Песняры», аўтар музыкі на вершы беларускіх паэтаў, спявак, пясняр — здаецца, вось ён ёсць. То бок быў яшчэ зусім нядаўна на экранах тэлевізараў, спяваў «Марысю» на беларускай мове ў сваім любімым канцэртным касцюме. Просты хлопец з Екацярынбурга (бацькі — рабочы завода і швачка) — таленавіты музыкант — папулярны, як Джон Ленан, лідар калектыву — персанаж. Уладзімір Мулявін стаў галоўным героем, цэнтрам, ды і натхняльнікам музычнага спектакля драматычнага тэатра імя Горкага — «Пясняр». Трывожнага. Хвалюючага. Надрыўнага.
Жывы вобраз спевака яшчэ не патух. Ну блізкі ён, родны нам, дарагі — нездарма. Яго персона пазбаўленая відавочных іміджавых укосаў, гучных фраз, канцэпцый, ідэй, ён «проста складаў музыку на вершы, якія яму падабаліся». Але якую!
Спектакль па п'есе маладога аўтара Васіля Дранько-Майсюка не раскажа гледачу біяграфію Уладзіміра Мулявіна, не пакажа творчы ўзлёт або мукі пры складанні музыкі. Усё, што ў нас, гледачоў, ёсць, — час пасля 14 мая 2002 года, пасля аўтакатастрофы. У спектаклі Уладзімір жыве ў двух светах: у рэальным, дзе бальнічная койка, медсястра, прышлы захоплены кампазітар і ўрачы, якія быццам абмяжоўваюць свабоду, не дазваляюць складаць, успамінаць — успомніць. Але заўважце — без блізкіх. Тут жа праз дзве хвіліны забыццё, нерэальны свет — трызненне, сон, памежны з жыццём і смерцю адначасова. Тут пясняр сярод сваіх — песняроў. Спачатку ён сустракае Янку Купалу, закаханага ў нейкую Мальгэту Якубоўскую, затым Якуба Коласа, які адкрыта гаворыць пра Купалу: «Дзве дзеўкі ўпалі з коней, ляжаць у пікантных позах — вось і ўсё яго натхненне», а сам з болем успамінае выступленне з вершамі ў Ташкенце перад дзецьмі: яго ж, на жаль, ніхто не зразумеў. Тут жа Максім Багдановіч, які пакутуе ад здрады каханай жанчыны, Цётка, якая просіць Мулявіна пісаць музыку на вершы беларускіх паэтаў. Таму што толькі так паэты жывыя і не рызыкуюць ператварыцца ў камень. На гэтым памежжы Мулявін сустракае ўсіх тых, каго «спяваў». Усе яны — ужо звыклыя жыхары гэтага «іншага» свету. Усе яны ў белым паліто. Уладзімір у выкананні Сяргея Жбанкова гэтае паліто пакуль толькі гуляючы трымае ў руках і накрываецца на сваім рэальным бальнічным ложку (што сімвалічна).
Тады, у 2002 годзе, гульня з белым паліто доўжылася восем месяцаў. Гэтае лавіраванне паміж жыццём з урачамі і несвядомым вар'яцкім станам і стала сюжэтам для спектакля. Уладзімір Мулявін тут праходзіць шлях ад непрытомнасці і рэплік «Я не пясняр» да поўнай свядомасці і жадання напісаць музыку. Толькі музыка гэтая не будзе запісана. У канцы спектакля Уладзімір надзене белае паліто (гэтым я не раскрываю інтрыгу, таму што кожны глядач памятае зводкі навін пачатку стагоддзя). Нягледзячы на тое, што ў канцы Мулявін усё-ўсё ўспомніць і надзея на хэпі-энд прамільгне — гэтыя надзеі ж не актуальныя для сюжэтаў, створаных на аснове самога жыцця.
Абыграць гэтае лавіраванне, ды яшчэ з музыкай «Песняроў» — уявіце — у патоку мільгаючых асоб, мелодый (выдатных вакальных партый!), дзіўных для хворага Мулявіна слоў, з якіх ён намагаецца нешта зразумець і ўспомніць. Завязкай усяго (і жыцця, і лёсу, і аварыі, і, здаецца, гэтага спектакля) аказалася гісторыя пра дзяўчыну з томікам беларускай паэзіі, які тая пакінула пасля канцэрту ў Екацярынбургу (Свярдлоўску) з запіскай «Чакаю ў Мінску». І Мулявін прыехаў, натхніўся беларускай літарай «І», папрасіў пачытаць вершы з кнігі, і... цяпер мы глядзім магічны музычны спектакль, у якім ён — галоўны герой. Балюча.
Толькі паглядзеўшы «Песняра» — а прэм'ера адбылася 10 кастрычніка, — пачынаеш разумець, што спектакль з музыкай Мулявіна павінен быў існаваць ужо даўно. Таму што ў беларускай эстрадзе Уладзіміра Мулявіна па неверагоднай сіле таленту і духу, здаецца, не перасягнуў ніхто. Нікому яшчэ не дарылі столькі бясспрэчнай любові і павагі.
Над музычнай канцэпцыяй «Песняра» працаваў Аляксей Еранькоў. Ён жа іграе і спявае падчас спектакля, сціпла, з краю сцэны. Музычныя партыі выконваюць акцёры тэатральнай трупы, якія выдатна пераўвасабляюцца з медпрактыкантаў у прахожых на вакзале або ташкенцкіх дзяцей. Так, музыцы Уладзіміра Мулявіна выдзелена годнае месца, у ідэальнай дозе і з велізарнай — што адзіна правільна — працай над гэтай часткай.
Напэўна, спектакль, прысвечаны памяці Песняра, не мог быць іншым. Седзячы ў зале разумееш, што Мулявін — асоба, страта якой незваротная. Правільнае асвятленне, мінімалізм у антуражы і шчырае здзіўленне галоўнага героя ад таго, што адбываецца вакол, спрацавалі на надрыўную, балючую атмасферу, якая і не аматараў музыкі «Песняроў» натхніць на новыя песні ў плэйлісце.
Паэты ажылі ў спектаклі вельмі прыгожа. Тут яны далёкія ад штампаваных партрэтаў у школьных класах, афіцыйных назваў і статычных вобразаў. Тут яны адчувальна жывыя і адчувальна — свае.
Калі Васіль Дранько-Майсюк задаў спектаклю аб Мулявіне правільны вектар, Аляксей Еранькоў — надзвычайны музычны канцэпт, то рэжысёр-пастаноўшчык спектакля Валянціна Еранькова ўмела папрацавала над мізансцэнамі, якія практычна ніколі не застаюцца статычнымі.
Цудоўна тое, што глядач застаецца ўпэўненым: Мулявін апрануў белае паліто абсалютна шчаслівым. Калі ён праз увесь спектакль пакутліва спрабуе нешта ўспомніць, усвядоміць тое, што адбываецца вакол (а вакол урачы і класікі беларускай літаратуры), — усё ж такі ўспомніў, вызваліўся ад падсвядомых пут і, па-сяброўску абняўшы Купалу, сышоў ад нас, да сваіх, песняроў.
Апагеем захаплення напрыканцы становіцца відэа, на якім спявае Уладзімір Мулявін. Ён яшчэ нядаўна спяваў з экранаў тэлевізараў. Ужо персанаж.
Ірэна КАЦЯЛОВІЧ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».