Прымеркавана яна да стагоддзя з дня нараджэння Данілы Канстанцінавіча, заслужанага дзеяча культуры Беларусі, арганізатара і першага (на працягу дваццаці трох гадоў) дырэктара Дзяржаўнага літаратурна-мемарыяльнага музея Якуба Коласа. Сапраўды, хто лепш захавае спадчыну народнага паэта, знакамітай, можна сказаць, культавай асобы, адшукае і падрыхтуе да паказу новыя экспанаты, чым родны чалавек? Дом-музей Янкі Купалы, напрыклад, арганізавала і ўзначаліла жонка песняра Уладзіслава Францаўна Луцэвіч. Першым збіральнікам рэліквій музея Якуба Коласа стаў старэйшы сын паэта.
Даніла Міцкевіч дзеля музейнай справы, можна сказаць, пакінуў навуковую кар'еру. У свой час ён скончыў хімічны факультэт Беларускага дзяржаўнага ўніверсітэта, дзе пасля працаваў асістэнтам, затым выкладчыкам. Ён прайшоў шмат прыступак, пакуль не стаў навуковым супрацоўнікам, вучоным сакратаром, загадчыкам лабараторыі ў Інстытуце хіміі Акадэміі навук БССР. Адсюль ён і сышоў у 1957 годзе, каб стаць першым дырэктарам Літаратурнага музея Якуба Коласа. Прычым, як успамінаюць людзі, якія з ім працавалі, ён быў адданым сваёй справе музейшчыкам: не проста дарыў музею сямейныя рэчы (якія, напэўна, былі каштоўнымі для яго самога), але і актыўна займаўся пошукам матэрыялаў пра свайго бацьку, беражліва ставіўся да музейных прадметаў (бацькоўскай спадчыны). У архіве музея захаваліся копіі лістоў, якія Даніла Канстанцінавіч рассылаў з мэтай выявіць бацькавыя сляды.
Старэйшы сын паэта арганізаваў тры музейныя экспазіцыі, удзельнічаў у стварэнні філіяла музея на Стаўбцоўшчыне, шмат працаваў, дзякуючы чаму сённяшні музей змяшчае больш за 35 тысяч адзінак захавання. За сваю працу і іншыя заслугі Даніла Міцкевіч атрымаў медаль Францыска Скарыны, медаль «За доблесную працу ў Вялікай Айчыннай вайне 1941-1945 гг.». Ён быў абсалютна самадастатковы і без знакамітага бацькавага імені — дзякуючы сваёй апантанасці, шматграннасці, працавітасці, лёгкасці і гумару, з якімі ён станавіўся цэнтрам любой кампаніі. Ён, з адукацыяй хіміка, выдатна разбіраўся ў мастацтве, пісаў добрыя артыкулы.
Выстаўка пад назвай «І бачу пройдзеныя далі...» (кніга «І бачу пройдзеныя далі ...: Матэрыялы да 100-годдзя Д.К. Міцкевіча» была прэзентавана 30 верасня і прысвечана юбілейнай даце) прадстаўляе асабістыя рэчы Данілы Міцкевіча, дакументы, фотаздымкі (некаторыя ўпершыню), лісты (у тым ліку лісты Якуба Коласа і Марыі Дзмітрыеўны Міцкевіч да сына Данілы), дарчыя надпісы.
Не дзіўна, што сённяшнія музейшчыкі хочуць і маюць што паказаць пра сына Якуба Коласа.
Ірэна КАЦЯЛОВІЧ
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.