У Магілёве стварылі ўнікальную перасовачную выставу, прысвечаную падзеям Вялікай вайны 1914-1918 гадоў на ўсходзе Беларусі
Такая колькасць малавядомых фактаў аб Першай сусветнай вайне, у якой удзельнічалі 38 дзяржаў і на палях якой змагаліся звыш 70 мільёнаў чалавек, сабрана ўпершыню. У аснову выставы пакладзены звесткі яшчэ не выдадзенай кнігі магілёўскага пісьменніка, кіраўніка гісторыка-патрыятычнага пошукавага атрада «Вікру» Мікалая Барысенкі «Рэха Вялікай вайны на Усходзе Беларусі». На ёй прадстаўлены рэдкія фота і дакументы з расійскіх архіваў.
— У той час у склад Магілёўскай губерні ўваходзілі сучасныя Гомельская вобласць і частка Віцебскай, — кажа аўтар. — Гэта быў тылавы раён арміі Расійскай імперыі. Вядома, што тут знаходзілася не менш за 25 шпіталяў, праз губерню праходзілі сотні тысяч бежанцаў. Шмат імён нашых землякоў, якія дэманстравалі прыклады сапраўднай мужнасці на той вайне, несправядліва забытыя. Сёння вядомы імёны толькі 160 Георгіеўскіх кавалераў, ураджэнцаў губерні, з іх 36 — поўных і 2 — уладальнікаў «поўных бантаў». Мы жывём у горадзе, дзе знаходзілася стаўка Мікалая ІІ, але не можам пахваліцца добрым веданнем падзей таго перыяду. І тое, што можна ўбачыць на выставе, для многіх стане сапраўдным адкрыццём.
Перасовачная выстава пабывае ва ўсіх школах Магілёўшчыны. Але гэта толькі невялікая частка той інфармацыі, якая прадстаўлена ў кнізе Мікалая Барысенкі. На жаль, яна пакуль існуе ў адзіным экзэмпляры, і тое камп'ютарным. Затрымка толькі за спонсарам, які не пашкадаваў бы сродкаў на гэта ўнікальнае выданне.
Нэлі ЗІГУЛЯ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».