Толькі яна можа патэлефанаваць а дзявятай вечара і строга запытацца, чаму, маўляў, ты, дзіця, яшчэ не дома ў такі позні час — хоць і час яшчэ, па вялікім рахунку, не позні, і табе ўжо, мякка кажучы, за трыццаць. Толькі яна заўжды пры сустрэчы абавязкова пацікавіцца, ці добра ты ясі і ці надзяваеш шапку. Толькі яна з дакладнасцю да хвіліны помніць час твайго з'яўлення на свет — і ніколі не забываецца павіншаваць з ім. Толькі яна ведае ўсе твае радзімкі і важныя даты, трымае ў памяці імя па бацьку тваёй першай настаўніцы і беражліва захоўвае ў якім-небудзь сакрэтным месцы ўсе твае дыпломы, граматы за збор макулатуры і перамогу ў мастацкай самадзейнасці, і першую шкарпэтку, і бірачку з радзільнага дома...
Толькі яна прыйдзе на дапамогу без усякіх умоў і агаворак. Пагодзіцца пасядзець з унукамі пару гадзін ці цэлы дзень — нават калі, дакладна ведаю, ёй гэта не вельмі зручна. Пераносіць і перакройвае ўласныя планы, каб даць магчымасць дзецям рэалізаваць свае. Цярпліва чакае, пакуль у іх, нарэшце, выпадзе час заехаць у госці — і незалежна ад таго, сыты ты ці галодны, з пустымі рукамі ці з падарункамі, усё адно накорміць і дасць «гасцінчыкаў» з сабой. Сама ж, калі запытаеш, чым дапамагчы, будзе адмахвацца абедзвюма рукамі: «Ды нічога не трэба!» — а калі ўсё ж настаяць на сваім, усю дарогу будзе перажываць, навошта ёй такія дарагія падарункі...
Мама — гэта наогул асобны сусвет, загадкавы і неаглядны, адкрываць які пачынаеш толькі з узростам. Як можна ахвяраваць уласным часам, сіламі, здароўем дзеля дзяцей, разумееш, толькі калі нараджаюцца ўжо свае дзеці... Адкуль бярэцца бясконцы запас цярпення і невычэрпная чаша спагады і ласкі, застаецца адной з вялікіх таямніц.
З іншага боку, толькі яна валодае раздражняльнай уласцівасцю рабіць табе заўвагі пра самае балючае і не прызнаваць уласных памылак і хібаў, ускладняць элементарныя рэчы і крыўдаваць па дробязях. Але, у рэшце рэшт, усё тое можна прабачыць — бо і ў гэтым таксама (што, зноў жа, заўважаеш толькі з узростам) ты вельмі многае бярэш ад яе...
«Мне штосьці дрэннае сёння снілася, вырашыла патэлефанаваць, спытаць, ці ўсё ў вас у парадку». У нас нармальна, а вось ты чамусьці абмінула той момант, што ў цябе пасля працы нямелі рукі і павышаўся ціск. Не важна, хто «здаў», — важна, чаму ты не гаворыш? Яна збянтэжана тлумачыць, што не хоча, каб мы турбаваліся, і што «само пройдзе». Ну-ну. Веру — прыкладна так, як і ты калісьці, у мае шаснаццаць, рабіла выгляд, што верыш, быццам мы трэцюю ноч запар старанна рыхтуемся з сяброўкамі да іспытаў, а гучная музыка — гэта ў суседзяў іграе... Мама смяецца і абяцае ўсё ж схадзіць да ўрача. Я абяцаю пракантраляваць. І мы абедзве ведаем, што свае абяцанні давядзецца выканаць. Гэта ў нас сямейнае, яшчэ ад бабулі.
Вікторыя ЦЕЛЯШУК.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».