У верасні ў Расіі прайшоў незвычайны мотапрабег. Па-першае, арганізаваў яго кіраўнік Сібірскага мотаклуба імя Дзмітрыя Данскога — Андрэй Кочанаў, бацька 5 дзяцей і, як ён сам пра сябе гаворыць, праваслаўны матацыкліст. Па-другое, мэта прабегу, які доўжыўся амаль 1,5 месяца і прайшоў 15 тысяч кіламетраў па маршруце ад Уладзівастока да Масквы, ахапіўшы 25 гарадоў, — прыцягнуць увагу грамадства да шматдзетных сем'яў і іх важнай ролі для будучыні краіны.
Так, па дарозе бацькі-актывісты праводзілі «мужчынскія размовы» — расказвалі пра сямейныя каштоўнасці, пра адказнасць і пазітыўнае стаўленне да шматдзетнасці юнакам у вайсковых часцях, кадэцкіх карпусах, дзіцячых дамах, ладзілі канцэрты, сустрэчы з Героямі Расіі, тэматычныя сямейныя акцыі... А на фінішную кропку маршруту, у Маскву, дзе адбыўся міжнародны форум «Шматдзетная сям'я і будучыня чалавецтва», прывезлі падпісаную тысячамі бацькаў петыцыю з просьбай заснаваць на дзяржаўным узроўні свята Дзень бацькі. Праўда, зрабіць гэта сёлета — 25 кастрычніка, у дзень нараджэння вядомага гістарычнага дзеяча, князя і, дарэчы, бацькі 12 дзяцей Дзмітрыя Данскога, — хутчэй за ўсё, не атрымаецца. А вось налета свята цалкам можа набыць афіцыйны статус.
У наступным годзе да мотапрабегу, цалкам магчыма, далучацца і беларускія грамадскія актывісты. Сёлета ж беларусы выступілі ў падтрымку петыцыі, а таксама ў ліку 1500 прадстаўнікоў з 45 краін свету ўзялі ўдзел у працы форуму «Шматдзетная сям'я і будучыня чалавецтва». У прыватнасці, нашу краіну прадстаўлялі дэлегацыя Міжнароднага дабрачыннага фонду «Сям'я — Яднанне — Айчына», цэнтра падтрымкі сям'і і мацярынства «Матуля», дабрачыннага фонду «Адкрытыя сэрцы».
— Пры тым, што мы падтрымліваем саму ініцыятыву — заснаванне Дня бацькі, безумоўна, паўтараць ініцыятыву за расіянамі не трэба, — лічыць кіраўнік школы «Бацькоўства» пры МБФ «Сям'я — Яднанне — Айчына» Сяргей Кірпіч. — Па-першае, у нас ёсць свае традыцыі, свае святыя, у тым ліку і вядомыя бацькі, не менш вартыя ўшанавання (памяць беларускіх святых, напрыклад, прыпадае на трэцюю нядзелю пасля Пяцідзясятніцы — гэта рухомая дата ў маі—чэрвені). Па-другое, магчыма, не варта вынаходзіць веласіпед — ужо больш за паўстагоддзя ў 50 краінах свету Дзень бацькі адзначаецца ў чэрвені: дзесьці ў першую, дзесьці — у трэцюю нядзелю месяца. Але само па сабе свята, безумоўна, патрэбна — не для таго, каб, прабачце, яшчэ раз выпіць, але для таго, каб падтрымаць бацькаў, якія годна і адказна спраўляюцца са сваімі абавязкамі, якія могуць служыць узорам для іншых. Нарэшце, каб звярнуць увагу грамадскасці на тое, як неверагодна нізка ўпаў узровень адказнага бацькоўства, нагадаць кожнаму пра важнасць ролі бацькі ў жыцці сям'і, дзяцей і падштурхнуць больш часу і ўвагі аддаваць сваім блізкім. Грамадскія арганізацыі, якія абараняюць правы і інтарэсы бацькаў у нашай краіне, з 1990-х гадоў вядуць працу па большай папулярызацыі гэтага свята, але, мяркую, у гэтай справе неабходная адміністрацыйная падтрымка на ўсіх узроўнях.
Вікторыя ЗАХАРАВА
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
Ідэнтычнасць праз спадчыну.