«Звязда» працягвае публікацыю меркаванняў з нагоды грамадскай дыскусіі па праблемах у сістэме адукацыі, аб'яўленай рабочай групай па ажыццяўленні комплекснага аналізу сістэмы адукацыі пад кіраўніцтвам намесніка прэм'ер-міністра Анатоля Тозіка.
22-51
Любыя капрызы — за бацькоўскія грошы
«Хацелася б выказаць абурэнне магчымасцю павышэння аплаты за дзіцячы садок. Бацькі і так робяць шмат капіталаўкладанняў, якія называюцца ў народзе «паборамі».
Прыводжу прыклад. Мая дачка наведвае садок у Савецкім раёне сталіцы. Акрамя аплаты харчавання, якое мы цяпер пакрываем ужо цалкам, аплачваем таксама туалетную паперу, мыйныя сродкі, замену эмаліраванага посуду на металічны, лыжкі, канцтавары, кнігі, новую мэблю, покрыўкі на ложкі, новыя дыванкі пад ногі, подсцілкі пад талеркі, швабры, фартухі, пакрыццё металічнага душавога паддону эмаллю, тэлевізар у групу, жалюзі ў групу, штогадовае ўпрыгожванне на Новы год памяшкання групы і актавай залы, штогадовае азеляненне саду...
Любыя капрызы санстанцыі або загадчыцы садка — за бацькоўскія грошы. І варта адзначыць, што апетыты ў кіраўніцтва садка растуць празмерна. На апошнім сходзе прайшла пагалоска пра нацяжныя столі ў групы, што выклікала абурэнне ў бацькоў. Да гэтага трэба дабавіць штомесячныя папячыцельскія зборы — добраахвотна-прымусовыя, за выдаткаванне якіх мала хто спяшаецца трымаць справаздачу...
Мая прапанова наступная: калі плата за дзіцячы садок усё ж такі павысіцца, то трэба на заканадаўчым узроўні забараніць любыя дадатковыя ўзносы ад бацькоў — аж да адміністрацыйнай адказнасці кіраўніка дашкольнай установы».
Алена Вашкевіч.
Матэматыка — вялікімі порцыямі
«У гэтым годзе амаль палова абітурыентаў «заваліла» на ЦТ матэматыку. Я аналізаваў праблему і ўстанавіў адну з прычын.
Матэматыка, 6 клас. 320 старонак падручніка і 5 гадзін у тыдзень. Вучні ледзьве паспяваюць засвойваць вучэбны матэрыял. На замацаванне навыкаў часу катастрафічна не хапае. А калі дзіця прапускае заняткі па хваробе — сувязь паміж тэмамі губляецца і вучань трапляе ў катэгорыю непаспяваючых.
Матэматыка, 7 клас. Алгебра — 318 старонак і геаметрыя — 197 старонак. Усяго 515 старонак! 4 гадзіны ў тыдзень! Шчыльнасць матэрыялу, які павінны засвоіць дзеці, рэзка ўзрастае. Да таго ж геаметрыя — гэта прадмет, дзе дзеці павінны навучыцца разважаць, даказваць, ствараць малюнкі да задач, развіваць логіку доказаў, сцвярджэнняў, што займае вельмі шмат часу.
Пры такой высокай канцэнтрацыі ўспрымання матэрыялу ў вучняў развіваецца комплекс непаўнацэннасці. Яны пачынаюць думаць, што не здольны ўспрыняць матэрыял, і прылічваюць сябе да гуманітарыяў. Памылкова!
Уявіце сабе, што вы харчуецеся ў сталовай, не спяшаючыся, добра перажоўваеце ежу. І, наадварот, да вас падыходзяць і пачынаюць піхаць ежу ў рот, незалежна ад таго, паспелі вы перажаваць папярэднюю порцыю ці не. Збоку гэта выглядае менавіта так. Некалі рымскі філосаф Сенека казаў, што словы мудрасці падаюць з вуснаў без усялякіх намаганняў, а ў нас на вучняў абрушваецца град...
Раней мы вучыліся 6 дзён у тыдзень, і матэматыка была ў раскладзе кожны дзень, а калі з'яўлялася геаметрыя, то ў другім паўгоддзі дабаўлялася яшчэ адна гадзіна. Гэтае пытанне, безумоўна, трэба вырашаць комплексна, паколькі яно закранае ўсю сетку гадзін і ўвесь вучэбны працэс. Але штосьці яшчэ можна выправіць і ў гэтым навучальным годзе, а на наступны год трэба будзе падысці да вырашэння праблемы больш грунтоўна».
Анатоль Сафонаў.
Галава — не камп'ютар
«А што перашкаджае скараціць школьную праграму? Мора непатрэбнай інфармацыі, якая не прымяняецца на практыцы, толькі знясільвае школьніка і адбівае інтарэс да вучобы. Якасць адукацыі падмяняюць колькасцю інфармацыі. Інтэрнэт і камп'ютар для таго і патрэбны, каб не лічыць у галаве ў «слупок» і не трымаць даты ўсіх рэвалюцый у памяці».
Іван Іванавіч.
Падрыхтавала Надзея НІКАЛАЕВА.
Прапановы па пытаннях развіцця і ўдасканалення адукацыі можна накіроўваць на спецыяльны паштовы адрас урада Рэспублікі Беларусь оbrаzоvаnіе@gоvеrnmеnt.bу, на Нацыянальны адукацыйны партал www.аdu.bу (раздзел «Інфалінія») або на электронны адрас «Звязды» іnfо@zvуаzdа.mіnsk.bу.
Дарэчы...
Разгрузiць настаўнiка
У блiжэйшы час будуць распрацаваны прапановы па разгрузцы настаўнiкаў ад лiшняй працы, паведамiў карэспандэнту БЕЛТА вiцэ-прэм'ер Беларусi Анатоль Тозiк.
«Заканчвае работу група па комплексным вывучэннi становiшча спраў у сiстэме адукацыi. Абмяркоўвалася ў тым лiку праблема па перагрузцы настаўнiкаў непатрэбнымi функцыямi. У блiжэйшы час мы вызначымся, якую дакументацыю павiнен весцi толькi настаўнiк, якую — класны кiраўнiк i адмiнiстрацыя школы. Функцыямi, якiя не павiнен выконваць настаўнiк, павiнны займацца адпаведныя дзяржаўныя органы. Калi кожны пачне займацца сваёй справай, будзе парадак», — сказаў вiцэ-прэм'ер.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.